مەگاپوليس تۇرعىندارىن كولىكتەن شىقپاي-اق كوروناۆيرۋستىق ينفەكتسياعا تەستىلەيتىن ءموبيلدى سكرينينگتىك-ورتالىعىنىڭ اشىلۋ سالتاناتى 9 مامىرعا تۇسپا تۇس كەلدى. وڭتۇستىك كورەيالىق مPK Clinic مەديتسينالىق ۇيىمىنىڭ Covid-19-عا قارسى ورتالىعىنىڭ اشىلۋى جەڭىس كۇنىنىڭ 75 جىلدىعىنا ارنالدى.
ورتالىقتىڭ اشىلۋ سالتاناتىنا قالالىق قوعامدىق دەنساۋلىق باسقارماسىنىڭ باسشىسى تىلەۋحان ابىلداەۆ, Medical Partners Korea قۇرىلتايشىلارى – پروفەسسور عالىمجان توعىزباەۆ, Kazakhstan مرك باس ديرەكتورى, پروفەسسور مين حيسۋك, ستراتەگيالىق ديرەكتور كيم كۆانگبۋم, Seegene Clinical Laboratories ديرەكتورى كيم دە ەنگ, Korean Health Industry Development Institute ديرەكتورى كيم لي حە, سونداي-اق ورتالىقتىڭ العاشقى كەلۋشىلەرى قاتىستى.
وندىرۋشىلەر تەستىلەۋ جۇيەسىنىڭ از ۋاقىتتىڭ ىشىندە بارىنشا كوپ ادامدى سكرينينگتەن وتكىزۋگە مۇمكىندىك بەرەتىنىن, ەڭ باستىسى – كولىكتەن شىعۋدى قاجەت ەتپەيتىن قاۋىپسىز جۇيە ەكەنىن اتاپ ءوتتى.
«العاشقى ءموبيلدى سكرينينگتىك ورتالىق وڭتۇستىك كورەيادا ىسكە قوسىلدى. بۇگىندە بۇل تاجىريبە اقش-تا كەڭىنەن قولدانىلۋدا. الماتى قالاسى دا اتالعان تەستىلەۋ جۇيەسىن العاشقىلاردىڭ ءبىرى بولىپ ەنگىزىپ وتىر. ددۇ-مەن ۇسىنىلعان ءموبيلدى سكرينينگتىك ءادىس ەڭ قاۋىپسىز سانالادى», – دەپ مالىمدەدى MPK قۇرىلتايشىلارىنىڭ ءبىرى, پروفەسسور مين حيسۋك.
ءموبيلدى ورتالىقتا كۇنىنە 100-دەن استام تەست جۇرگىزۋگە مۇمكىندىك بار. ۇيالى تەلەفون قوسىمشاسى ارقىلى الدىن-الا تىركەلگەن جاعدايدا ءبىر ادامدى تەستىلەۋگە شامامەن 3-5 مينۋت قاجەت. بۇل ءداستۇرلى سكرينيگكە شىعىندالاتىن ۋاقىتتان ءۇش ەسە كەم كورسەتكىش. جۇمىس لەگىنىڭ ۇيىمداستىرىلۋىنا بايلانىستى جۇمىسقا شامامەن ءتورت ادامنان سەگىز ادامعا دەيىن جۇمىلدىرىلادى. قىزمەت اقىلى تۇردە وتەدى.
MPK قۇرىلتايشىلارىنىڭ ءبىرى, مەديتسينا عىلىمدارىنىڭ دوكتورى, پروفەسسور عالىمجان توعىزباەۆتىڭ ايتۋىنشا, بيولوگيالىق ماتەريالدى جينايتىن زەرتحانا Seegene تەحنولوگياسى بويىنشا جۇمىس ىستەيدى. دەمەك بۇل زەرتحانا ينفەكتسيالاردى دياگنوستيكالاۋ بويىنشا الەمدەگى كوشباسشى مەكەمە. ايتا كەتەتىنى, وڭتۇستىك كورەيا اۋماعىنان تىس جەردە ورنالاسقان بۇل جالعىز زەرتحانا الماتى قالاسىندا جۇمىس ىستەيدى.
ءموبيلدى ورتالىقتىڭ جۇمىس ىستەۋ كەزەڭدەرى تومەندەگى سىزباعا سايكەس جۇرگىزىلەدى: كىرۋ - تىركەلۋ - تەكسەرۋ - ۇلگىنى الۋ - نۇسقاۋلىق - شىعۋ. تەستىلەنۋشى كىرگەننەن كەيىن جەكە اقپارات, ەپيدەميالوگيالىق فاكتورلار مەن قوسالقى سيمپتومداردان تۇراتىن ساۋالنامانى تولتىرادى. كابينادا دەنە قىزۋى كونتاكتىسىز تەرمومەتر كومەگىمەن ولشەنەدى. وسى كەزەڭدە COVID-19 ۆيرۋسىنا كۇدىكتى بولعان جاعدايدا تەستىلەنۋشى مامانداندىرىلعان اۋرۋحاناعا اۋىستىرىلادى.
«تەستىلەۋدەن وتۋگە نيەت بىلدىرۋشىلەر ءموبيلدى قوسىمشا جانە www.mpk.kz رەسمي سايتى ارقىلى تىركەلە الادى», – دەدى MPK قۇرىلتايشىلارىنىڭ ءبىرى, ستراتەگيالىق ديرەكتور كيم كۆانگبۋم.
«قازىر كوروناۆيرۋستى انىقتاۋ ءۇشىن ءموبيلدى تەستىلەۋ پۋنكتتەرى دامۋدا. ولار جاعدايدى تۇراقتاندىرۋ بويىنشا جۇمىستارعا ۇلكەن سەپتىگىن تيگىزىپ, ينفەكتسيانىڭ تارالۋىنا توسقاۋىل بولا الادى. بۇل پۋنكتتىڭ اشىلۋى تۇرعىندار اراسىندا بۇعان دەيىن بەلگىسىز بولعان اۋرۋ وشاقتارىن تابۋعا جانە ۆيرۋسقا قارسى شارالاردى جۇزەگە اسىرۋعا مۇمكىندىك بەرمەك. وڭتۇستىك كورەيادا وسى ىسپەتتەس ورتالىقتاردىڭ كوبەيۋى ارقاسىندا ونداعى جاعداي تۇراقتالىپ, اۋرۋدىڭ ودان ءارى تارالۋ قارقىنى باسەڭدەدى. جوسپار بويىنشا الماتىدا تاعى وسىعان ۇقساس بىرنەشە ورتالىقتار اشىلماق. بۇگىنگە دەيىن قالادا 80 مىڭ ادام تەكسەرىلىپ ۇلگەردى. الماتى تەستىلەۋ بويىنشا ەل ىشىندە كوشباسشى سانالادى», – دەپ اتاپ ءوتتى قالالىق قوعامدىق دەنساۋلىق باسقارماسىنىڭ باسشىسى تىلەۋحان ابىلداەۆ.
«اتالعان ءموبيلدى پۋنكتتە ءۇش اۋىسىمدا 18 ادام جۇمىس ىستەيدى. ءبىز 25 مىڭ رەاگەنت اكەلدىك. ونىڭ 15 مىڭى قولدانىلدى. جاقىن ارادا تاعى 50 مىڭ رەاگەنت اكەلۋدى جوسپارلاپ وتىرمىز. قوسىمشا مامانداردىڭ دا كەلۋى كۇتىلۋدە», – دەپ تولىقتىردى ءسوزىن Seegene Clinical Laboratories ديرەكتورى كيم دە ەنگ.
ءموبيلدى تەست الۋدىڭ بۇل ءتۇرى COVID-19 ۆيرۋسىنا سكرينينگ جاساۋدا قاۋىپسىز جانە ءتيىمدى بولىپ سانالادى.
«كورەيا ويلاپ تاپقان كوروناۆيرۋسپەن كۇرەسۋدىڭ الەمدىك مودەلىنىڭ قۇپياسى دياگنوستيكالىق تەستتەردىڭ كوپ مولشەردە جاسالۋىندا جانە ونىڭ ناتيجەسىنىڭ تەز شىعارىلىپ, جۇقتىرعاندار مەن جۇقتىرىلۋى مۇمكىن جاعدايلاردى تەز وقشاۋلاۋ, سونىمەن بىرگە, الداعى جۇقتىرۋ جاعدايلارىن ەسەپكە الۋ ءۇشىن ۆيرۋستىڭ ورىن اۋىستىرۋ باعىتتارىن قاداعالاۋ تەحنولوگياسىن قولدانۋ بولىپ تابىلادى. كوروناۆيرۋسپەن كۇرەستەگى كورەيانىڭ جەتىستىكتەرىنىڭ ءبىرى – ءجۇرىپ بارا جاتقان كەزدە, كولىكتە جۇرگىزىلەتىن تەكسەرۋلەر. ءبىز كورەيالىق نوۋ-حاۋدى قازاقستاندا تانىستىرىپ جاتقانىمىزعا قۋانىشتىمىز جانە دياگنوستيكالىق تەكسەرىستىڭ جىلدام ءارى قاۋىپسىز شارالارىنىڭ ارقاسىندا كوروناۆيرۋسپەن بايلانىستى بۇل جاعدايدا تەز ارادا تۇراقتاندىرۋ مۇمكىن بولادى دەپ سەنەمىز», – دەدى KHIDI-ءدىڭ تمد ەلدەرى بويىنشا ديرەكتورى كيم لي حە.
ءموبيلدى سكرينينگ-ورتالىق ساعات 09.00-دەن 16.00-گە دەيىن دەمالىسسىز جۇمىس ىستەيدى. اتالعان ورتالىق ەپيدەميا اياقتالعانعا دەيىن قىزمەت كورسەتەدى.
«اۆتوكولىك جۇرگىزۋشىلەرگە بۇل وتە ىڭعايلى. ءبىرىنشى كەزەكتە, كولىكتەن شىعۋدىڭ قاجەتى جوق جانە تىعىز بايلانىس جاسامايسىڭ. تەزىرەك تىركەۋدەن ءوتىپ, كەلگەننەن كەيىن سەنەن تالداما الادى جانە بىردەن كەتىپ قالۋعا بولادى. كوپ ۋاقىت كەتپەيدى. مۇنداي تەستىلەۋدىڭ تاعى ءبىر وڭتايلى تۇسى, ونىڭ جابىق عيماراتتا ەمەس, اشىق اسپان استىندا, دالادا وتەتىندىگىندە جانە بۇل قاۋىپسىز بولىپ سانالادى», – دەيدى ادىلبەك ەسىمدى اۆتوكولىك جۇرگىزۋشىسى.
سونىمەن بىرگە, جاقىن ارادا الماتىدا جاياۋ جۇرگىنشىلەر ءۇشىن دە COVID-19-عا تەست جاسالاتىن وسى سىندى پۋنكتتەردى اشۋ قاراستىرىلۋدا.
الماتى