اقتاۋداعى نازارباەۆ زياتكەرلىك مەكتەبىنىڭ ماتەماتيكا ءپانى مۇعالىمى سۆەتلانا وزعان ۇلى جەڭىستىڭ 75-جىلدىق مەرەيتويىندا مايدانگەر اتاسى وزعان قوسانوۆتىڭ جەرلەنگەن جەرىن تاۋىپ الدى. كۇتپەگەن دەرەك ءبىلىم ورداسىنىڭ ۇجىمداستارىنىڭ ارقاسىندا رەسەيلىك «پاميات نارودا» سايتىنان انىقتالعان, دەپ حابارلايدى اتالعان ءبىلىم ورداسىنىڭ ءباسپاسوز قىزمەتى.
سۆەتلانا وزعاننىڭ سوزىنە سۇيەنسەك, سوعىس ارداگەرىن ىزدەۋگە سەبەپ بولعان ۇجىمداستاردىڭ سايتقا سىلتەمە جىبەرۋى.
-بۇل سايتتىڭ بارىن بۇرىننان دا بىلەتىنبىز. بىرنەشە رەت وسىعان دەيىن دە قاراپ, اتام تۋرالى اقپارات تاپپاعان ەدىك. وتكەن اپتادا ارىپتەستەرىم سايتقا سىلتەمە جىبەرگەن سوڭ تاعى ءبىر رەت ىزدەپ كورەيىن دەپ شەشتىم. وسىعان دەيىن وزعان قوسانوۆ دەپ ىزدەپ كەلگەن ەدىك. ال وسى جولى ورىس تىلىندە اتى-ءجونى باسقاشا جازىلعان بولار دەپ ءارتۇرلى ىزدەۋ تۇرلەرىن جاسادىم. ناتيجەسىندە سايتتان «وسگان حاسانوۆ» دەپ شىقتى. سايتتاعى مالىمەتتەرگە سۇيەنسەك ول قازىرگى تۆەر وبلىسىنداعى «بوباچەۆسكي بور» باۋىرلاستار قابىرىندە جەرلەنىپتى, دەيدى ۇستاز قۋانىشىن جاسىرا الماي.
وتىز جىلدان استام مۇعالىم بولىپ ەڭبەك ەتىپ كەلە جاتقان سۆەتلانا وزعاننىڭ اتاسى وزعان قوسانوۆ 1906 جىلى تۋىلعان. ۇلى وتان سوعىسى باستالعان ساتتە سول كەزدەگى گۋرەۆ وبلىسى ماڭعىستاۋ اۋدانى وندى ەلدى مەكەنىنەن جۇبايى ماقپال قوسانوۆانى ەكى ۇلى جانە اكەسى قوسانمەن بىرگە اۋىلدا قالدىرىپ سوعىسقا كەتكەن. اتامىز 1942 جىلدىڭ جەلتوقسانىندا قاتتى جاراقاتتار الىپ, 1943 جىلدىڭ 21 قاڭتارىندا قايتىس بولعان. اۋىلعا قارالى قاعاز كەلگەنمەن مايدانگەر كالينين قالاسىنىڭ تۇبىندە جەرلەندى دەگەن دەرەك قانا بەلگىلى بولعان.
-اتامىزدىڭ جاتقان جەرىن ىزدەستىرىپ, وسى كۇنگە دەيىن تابا الماي كەلگەنبىز. اكەم تۇراش وزعانوۆ اكەسىنىڭ باسىنا توپىراق سالۋدى ارمانداپ كەتكەن. سويتسەك, اتى-ءجونى قاتە جازىلعان ەكەن. 77 جىل وتكەندە جانە ۇلى جەڭىسكە 75 جىل قارساڭىندا «پاميات نارودا» سايتىنان كەزدەيسوق تاۋىپ الدىق. اتامىزدىڭ اتى قاتە جازىلعان ەكەن. توپىراعى تورقا بولىپ, جانى جانناتتا بولسىن, دەدى سۆەتلانا تۇراشقىزى.
ايتا كەتۋ كەرەك, 2007 جىلى رەسەي فەدەراتسياسىنىڭ قورعانىس مينيسترلىگى «1941-1945 جج. ۇلى وتان سوعىسىنداعى قىزىل اسكەر مەن اسكەري-تەڭىز فلوتىنىڭ ارحيۆ قۇجاتتارىن جاريالاۋ» تۋرالى بۇيرىق شىعارادى. ۇستازدىڭ اتاسى تۋرالى دەرەك وسى قۇجاتتا بولعان. سونىمەن قاتار, سايتتا جاۋىنگەرلەر تۋرالى دەرەكتەردەن بولەك, باۋىرلاستار قابىرى تۋرالى دەرەكتەر, جەرلەنگەندەردىڭ اتى-ءجونى كورسەتىلگەن تاقتاتاستاردىڭ فوتوسىنا دەيىن كورسەتىلگەن.
ەندى پەداگوگ وسى جازدا اتاسىنىڭ باسىنا بارىپ, اكەسى ارمانداپ كەتكەن ءبىر ۋىس توپىراقتى سالۋدى جوسپارلاپ وتىر.
ماڭعىستاۋ وبلىسى