كوكشەتاۋدا ادەبي-مۋزىكالىق جۋرنال جارىق كورەدى

ايگۇل دوسماعامبەتوۆا قۇرمانعازى اتىنداعى قازاق ۇلتتىق كونسەرۆاتورياسىنىڭ تۇلەگى. ونەر يەسىنىڭ ايتۋىنشا, بالالار ءانىنىڭ ءوز دەڭگەيىندە ناسيحاتتالماي كەلە جاتقانى بالاباقشالار مەن باستاۋىش سىنىپ وقۋشىلارىنا ارنالعان ادەبي-مۋزىكالىق جۋرنال شىعارۋعا تۇرتكى بولدى. جۋرنالدىڭ العاشقى شىعارىلىمى 2012 جىلى جارىققا شىقتى. باسىلىمنىڭ نەگىزىن قالاۋشىلارىنىڭ ماقساتى – زاماناۋي بالالار مۋزىكاسى مەن ءان ماتىندەرىن قالىپتاستىرۋ, وسى تاقىرىپتا ەڭبەك ەتىپ جۇرگەن اقىن-كومپوزيتورلارعا رۋحاني قولداۋ كورسەتۋ, وسكەلەڭ ۇرپاقتىڭ مۋزىكالىق تانىم-تۇسىنىگىن كەڭەيتۋ.

 –جۋرنال شىعارۋ قيىن بولسا دا, ءبىز ءۇشىن وتە قىزىقتى. تالماي ەڭبەكتەنۋدىڭ ناتيجەسىندە,  مەرزىمدىك الماناحتىڭ بۇگىندە 100 شىعارىلىمى جارىققا شىقتى. ونىڭ ارقايسىسىندا بالالارعا ارنالعان دايىن اندەر مەن مۋزىكالىق سۇيەمەلدەۋلەر جازىلعان, سونىمەن قاتار ولەڭدەر مەن ۇلتتىق سالت-داستۇرگە قۇرىلعان دايىن ستسەناريلەر مەن جۇمباقتار دا بار. وسى جۋرنالدى جارىققا شىعارۋدىڭ ارقاسىندا مەن كوپتەگەن تالانتتى اقىن, سازگەرلەرمەن, سۋرەتشىلەرمەن تانىستىم,–دەيدى ايگۇل دوسماعامبەتوۆا.

جۋرنالدىڭ وقىرماندارى كوبەيىپ كەلەدى. نەگىزىندە جۋرنال رەسپۋبليكا بويىنشا تارايدى. وسى ۋاقىتقا دەيىن جۋرنال ارقىلى بالالارعا ارنالعان 300-گە تارتا ءانى نوتاسىمەن, ماتىنىمەن, اۋديو نۇسقاسى جانە اۋەنىمەن جارىققا شىعارىلدى.

–جۋرنال 3 ايدا ءبىر رەت شىعادى. بۇگىندە 500-دەي وقىرمانى بار. ولار نەگىزىنەن بالاباقشا تاربيەشىلەرى مەن مۋزىكا مۇعالىمدەرى جانە بالالارىنىڭ شىعارماشىلىق قابىلەتتەرىن دامىتۋعا دەن قويعان اتا-انالار. جۋرنالدىڭ بىردەن-ءبىر ەرەكشەلىگى ونىڭ قازاق جانە ورىس تىلىندە بولۋى,–دەيدى جۋرنالدىڭ باس رەداكتورى ۆياچەسلاۆ فرانك.

«زەرەك-بوتاقان» ادەبي-مۋزىكالىق جۋرنالى وبلىستىق «التىن قالام» بايقاۋىندا «ۇزدىك باسپا» دەپ تانىلعان. ءبىر جاقسىسى, ايگۇل دوسماعامبەتوۆانىڭ 100-گە تارتا اۆتورلىق ءانى دە بار.