شىعىس قازاقستان وبلىسىنىڭ پوليتسيا قىزمەتكەرلەرى يۆان نازاروۆ پەن مەيىرىم ازتاەۆ ءۇش ءبۇلدىرشىندى ورتتەن امان-ەسەن الىپ شىقتى. بۇل تۋرالى ءىىم-ءنىڭ ءباسپاسوز قىزمەتى حابارلادى.
وقيعا ريددەر قالاسىندا 20 ءساۋىر كۇنى بولعان. بۇل جونىندە پوليتسيا قىزمەتكەرلەرى ەگجەي-تەگجەيلى جاريا ەتىپ ايتپاعان. ولاردىڭ جاساعان ەرلىگىن بالالاردىڭ اتا-انالارى حابارلاعان.
تاڭعى ساعات 5.00 شاماسىندا قالالىق پوليتسيا ءبولىمىنىڭ جەدەل ۋاكىلى ينتەرناتسيونالنىي كوشەسىندەگى ۇيلەردىڭ ءبىرىنىڭ اۋلاسىندا شارۋاشىلىق جايلاردان ءورت شىققانىن بايقاپ قالادى. تەز ارادا جالىن شارپىعان تۇرعىن ۇيگە جەتىپ كەلگەن پوليتسيا قىزمەتكەرىنىڭ الدىنان ۇرەيلەنگەن ايەل جۇگىرىپ شىعىپ, ۇيدە كىشكەنە بالالارىنىڭ بارىن حابارلايدى.
جەدەل ارەكەت ەتكەن پوليتسەي يۆان نازاروۆ جانىپ جاتقان عيماراتقا كىرىپ, ءۇش بالانى ەۆاكۋاتسيالاعان. بالالار ءۇي ءىشىن ءتۇتىن باسىپ, كوز الدى تۇماندانعانىنا قاراماستان, اناسى سيپاتتاعان بولمەنى تاۋىپ, ۇيقىدا جاتقان. ساقشى ولاردى كورپەگە وراپ, تىسقا الىپ شىعادى.
«پوليتسيا قىزمەتكەرىنىڭ جيناقى, دۇرىس, ءارى ۋاقتىلى ارەكەتتەرى ءبىزدىڭ وتباسىمىزدى قۇتقارۋعا كومەكتەستى. سونداي-اق ول ءورتتىڭ كورشىلەس ۇيلەرگە تاراتىلۋىنىڭ الدىن الۋعا كومەكتەستى. ءبىز يۆان نازاروۆقا وتە ريزامىز» دەيدى ريددەر قالاسىنىڭ تۇرعىنى گالينا كولەسنيكوۆا.
قازىرگى تاڭدا پوليتسيا قىزمەتكەرلەرى تۇرعىندارعا ءورت كەزىندە جوعالعان قۇجاتتاردى قالپىنا كەلتىرۋگە كومەكتەسىپ جاتىر.
بۇل ريددەر قالاسى پوليتسەيلەرىنىڭ ەرلىگىمەن ەرەكشەلەنگەن جالعىز جاعداي ەمەس. 22 ساۋىردە پوپەرەچنوە اۋىلىنىڭ ۋچاسكەلىك ينسپەكتورى ءوز بەتىنشە شارۋاشىلىق جايلاردان شىققان ءورتتىڭ كوزىن جويدى. ءورتتى كورگەن پوليتسەي مەيىرىم ازتاەۆ ويلانباستان كومەككە جۇگىرىپ كەلىپ, ارنايى قۇرالدارمەن وتتى سوندىرۋگە كىرىسكەن.
«مەيىرىم ازتاەۆ لەزدە قۇدىققا شلانگى تىعىپ, سورعىنى ورناتتى. ءدال كوز الدىمدا قورشاۋعا كىرىپ, ءورتتى سوندىرە باستادى. پوليتسيا قىزمەتكەرى ءبىر ءوزى ءورتتى اۋىزدىقتادى» دەيدى اۋىل تۇرعىنى ماليكا دجامالحانوۆا.
ۋچاسكەلىك پوليتسيا ينسپەكتورىنىڭ جەدەل ارەكەتى ارقاسىندا ءىرى ورتكە جاقىن تۇرعىن ۇيلەر, جايلار, پىشەن سارايى ورتتەن امان قالدى. ريددەر قالاسىنىڭ تۇرعىندارى پوليتسەيلەردىڭ كاسىبيلىگىن جوعارى باعالادى.