مەملەكەتتىك ەمتيحان مەن ديپلوم قورعاۋ ونلاين رەجيمدە وتەدى. تەحنولوگيا ءبىلىم الۋشىنى ەكران ارقىلى باقىلاپ, ەمتيحاندى تولىق ۆيدەوعا جازۋعا مۇمكىندىك بەرەدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
قالالىق ءبىلىم باسقارماسىنىڭ باسشىسى شولپان قادىروۆا كوللەدجدەردەگى ارالىق جانە قورىتىندى اتتەستاتسيا, ديپلوم جۇمىسىن قورعاۋ ءبىلىم بەرۋ ۇيىمىنىڭ وقۋ جوسپارىنا سايكەس جۇرەتىنىن اتاپ ءوتتى. ونىڭ ايتۋىنشا, ءبىلىم بەرۋ ۇيىمى ەمتيحان سۇراقتارىن الدىن-الا ازىرلەپ, جالپىعا قولجەتىمدى بولۋ ءۇشىن قاشىقتان وقىتۋ پورتالىنا ورنالاستىرادى.
«ديپلوم جۇمىسىن (جوبانى) الدىن الا قورعاۋ ءبىلىم بەرۋ ۇيىمى جاساعان كەستەگە سايكەس, ءوز ۋاقىتىندا ورىندالادى. مەملەكەتتىك ەمتيحان قابىلداۋ مەن ستۋدەنتتەردىڭ ديپلومدىق جۇمىسىن قورعاۋ (جوبا) ونلاين رەجيمدە وتەدى. ونلاين-پروكتورينگ ءبىلىم الۋشىنىڭ ءوزىن-ءوزى ۇستاۋىن ەكران ارقىلى باقىلاپ, ەمتيحاندى ۆيدەوعا جازۋعا مۇمكىندىك بەرەدى», – دەپ ءتۇسىندىردى ش.قادىروۆا.
سونداي-اق بارلىق كوللەدجدەردە وقىتۋشى, ستۋدەنت, اتا-انالارعا ۋاقتىلى تەحنيكالىق قولداۋ (ونلاين-كەڭەس) كورسەتىپ, وقۋ پروتسەسىنىڭ ۇيىمداستىرىلۋىن ۇنەمى باقىلاۋدا ۇستاپ, كەرى بايلانىس ورناتۋدى قامتاماسىز ەتەتىن شتاب قۇرىلدى.
ءبىلىم باسقارماسى باسشىسىنىڭ ايتۋىنشا, تەحنيكالىق جانە كاسىپتىك ءبىلىم بەرۋ ۇيىمدارىنا وقۋعا قابىلداۋ ەرەجەلەرىنە سايكەس, كوللەدجگە قۇجات تاپسىرۋ 20 ماۋسىم مەن 25 تامىز ارالىعىندا باستالادى. قۇجاتتاردى كوللەدجدىڭ قابىلداۋ كوميسسياسىنا قاعاز تۇرىندە نەمەسە e.astana.kz سايتىنا ەلەكتروندى تۇردە تاپسىرۋعا بولادى.
«تالاپكەردى قابىلداۋ ەمتيحاندارى كوللەدج بازاسىندا تاڭدالعان ماماندىققا بايلانىستى وتەدى. ەلىمىزدە سانيتارلىق-ەپيدەميولوگيالىق رەجيم ۇزارعان جاعدايدا, قۇجات قابىلداۋ مەن ەمتيحان وتكىزۋ فورماسى تۋرالى ءوتىنىش يەلەرىنە قوسىمشا اقپارات بەرىلەدى», – دەيدى ش.قادىروۆا.