وبلىس اكىمى ەرمەك مارجىقپاەۆتىڭ توراعالىعىمەن وتكەن اپپارات كەڭەسىندە اۋىل شارۋاشىلىعى جەرلەرىن پايدالانۋ بارىسىندا كەزدەسىپ جاتقان بىرقاتار ماسەلەلەر مەن وڭىردە جۇرگىزىلىپ جاتقان جول قۇرىلىسى جۇمىستارىنىڭ جاي-كۇيى تالقىلاندى.
اپپارات كەڭەسىنىڭ كۇن تارتىبىنە وراي جەردىڭ پايدالانىلۋى مەن قورعالۋىن باقىلاۋ باسقارماشىسىنىڭ باسشىسى ەرعالي شورين اۋىل شارۋاشىلىعى جەرلەرىن پايدالانۋ بويىنشا جۇرگىزىلىپ جاتقان جۇمىستار تۋرالى بايانداما جاسادى. باسقارما باسشىسىنىڭ مالىمدەۋىنشە, وتكەن جىلى وبلىستا 1,5 ميلليون گەكتار اۋىل شارۋاشىلىعى جەرلەرىنىڭ بوس جاتقاندىعى انىقتالىپتى. اۋداندىق اكىمدىكتەردىڭ مالىمەتتەرىنە سۇيەنسەك, 764,3 مىڭ گەكتاردان استام جەر پايدالانۋعا بەرىلگەن, ياعني ونىڭ 148 مىڭعا جۋىق گەكتارى ەگىستىك القاپتارى بولسا, 603 مىڭ گەكتار جەر مال جايىلىمدارىنا ارنالىپتى. بوس جاتقان جەرلەردى انىقتاۋ بويىنشا بىرقاتار تۇيتكىلدى جايلار ايتىلدى. وبلىس اكىمى اۋدان باسشىلارى مەن اتالمىش باسقارماعا بوس جەرلەردى نەعۇرلىم كوبىرەك انىقتاپ, ولاردى ءتيىمدى پايدالانۋ ءارى زاڭعا ساي يگەرۋدى قاداعالاۋدى تاپسىردى. اۋدانداردا بۇل جۇمىس ءالى دە باسەڭدەۋ جۇرگىزىلىپ جاتقاندىعىن ەسكەرتتى. سونداي-اق, جەرگىلىكتى ورىنداردا پايدالانىلمايتىن جەرلەردى مەملەكەتكە قايتارۋ, ونى اينالىمعا جىبەرۋ جۇمىستارىن ۇيىمداستىرۋدى جاندىرۋ قاجەتتىگىن اتاپ ءوتتى. بۇل ورايدا, اتباسار, بۋراباي, تسەلينوگراد اۋداندارى مەن ستەپنوگورسك قالاسىندا حالىققا بوس جاتقان جەرلەردى يگەرۋ بويىنشا تۇسىندىرمەلىك جۇمىستار وڭ ناتيجەگە يە بولعاندىعى ايتىلدى. قازىرگى ۋاقىتتا بىرقاتار اۋدانداردا بوس جاتقان جەرلەردى انىقتاۋ بويىنشا جۇمىستار ۆەب-پورتال ارقىلى جۇرگىزىلۋدە. دەگەنمەن, جەرلەردىڭ ءتيىمدى يگەرىلۋىنە تەكسەرىس جۇرگىزۋگە قازىر موراتوري جاريالانعان ەكەن.
جەر قاتىناستارى باسقارماسىنىڭ باسشىسى باۋىرجان ەرنازاروۆ اۋىل شارۋاشىلىعى القاپتارىن تسيفرلاندىرۋ جانە جەكە قۇرامعا جايىلىمدىق جەرلەردى بەرۋ تۋرالى باياندادى. قازىرگى ۋاقىتتا جەر قاتىناستارى سالاسىندا اۋىل شارۋاشىلىعى القاپتارىن ەسەپكە الۋ, حالىققا جەكە ماقساتتارىندا پايدالانۋعا جەرلەردى بەرۋ ماسەلەلەرىنە ەرەكشە كوڭىل ءبولىنىپ جاتىر. بۇل ماسەلە مەملەكەت باسشىسىنىڭ دا جەكە باقىلاۋىندا ەكەندىگى بەلگىلى. وبلىستا اۋىل شارۋاشىلىعى ماقساتىندا 11 ميلليون گەكتارعا جۋىق جەر بار. سولاردىڭ ىشىندە بۇگىنگى كۇنى 10 ميلليون 356 مىڭ گەكتارى عانا Qoldau.kz پورتالىندا ەسەپكە الىنىپتى. باسقارما باسشىسىنىڭ مالىمدەۋىنشە, ەرەيمەنتاۋ اۋدانىنان باسقا اۋدانداردا جەرگىلىكتى تۇرعىندار ءۇشىن پايدالانىلاتىن القاپتار تاپشى. وڭىردەگى 617 اۋىلدى جەردىڭ 495-ىندە مال جايۋعا ارنالعان جەرلەر جوق دەسە دە بولادى. وسى تۇستا اۋىلدى ايماقتارداعى مال جايىلىمدارىنىڭ ماسەلەلەرى, جەردى يگەرۋگە العان سۋبەكتىلەردىڭ زاڭنامالىق قۇجاتتاردى تولتىرۋداعى ولقىلىقتارى مەن جەردى يگەرە الماۋ جاعدايلارىنا قاتىستى داۋلى جايتتاردىڭ دا بارى ايقىن كورىندى. شىنتۋايتىنا كەلگەندە, اۋىلدى ايماقتارداعى بوس جاتقان جەرلەردى كەيبىر تۇرعىندار بەلگىلى ءبىر كاسىپ باستاماقشى بولىپ, اتىنا ءتۇسىرىپ الىپ, كەيىن ول جەردە نە ءشوپ شىقپايدى, نە مال باعۋعا بولمايدىنىڭ كەبىن كيەتىنى بار. وسى ورايدا, اۋىل تۇرعىندارى مالدارىن جايا الماي, ءارى-ءسارى كۇيگە ءتۇسىپ, مالدارىنىڭ ەگىندىك جەرلەرگە شىعىپ كەتپەۋىنە, بىرەۋدىڭ يەلىگىندەگى جەرگە كەتىپ قالماۋىنا شىر-پىر بولاتىنى دا بار. قازىرگى تاڭدا وسى ماسەلەلەردى شەشۋ بويىنشا ارنايى جۇمىستار جۇرگىزىلىپ جاتىر دەدى باسقارما باسشىسى.
ايماق باسشىسى سونىمەن بىرگە كوروناۆيرۋس پاندەمياسى بويىنشا وبلىستا جاعداي تۇراقتى ەكەندىگىنە نازار اۋدارىپ, ىندەتپەن كۇرەسىپ, ناۋقاستارعا جاعداي جاساعان ارشالى اۋداندىق اۋرۋحاناسىنىڭ ۇجىمىنا العىس ءبىلدىردى. قازىر بۇل اۋرۋحانادان بارلىق كۇدىككە الىنعان ادامدار ەمدەلىپ شىقتى.