رەسەيمەن شەكارالاس ايماقتا قازاقستاندىق شەكاراشىلار جىلقىلاردى زاڭسىز ايداپ ءوتۋدىڭ جولىن كەستى, دەپ حابارلادى قر ۇقك شق-نىڭ ءباسپاسوز قىزمەتى.
رەسەيمەن شەكارالاس ايماقتا قازاقستاندىق شەكاراشىلار جىلقىلاردى زاڭسىز ايداپ ءوتۋدىڭ جولىن كەستى, دەپ حابارلادى قر ۇقك شق-نىڭ ءباسپاسوز قىزمەتى.
بۇدان ءبىر كۇن بۇرىن شەكارا وتريادىنا رەسەي فەدەراتسياسىنداعى ارىپتەستەردەن 100 باس جىلقىنىڭ ۇرلانعاندىعى تۋرالى اقپارات كەلىپ تۇسكەن-ءدى. ناقتىراق ايتقاندا, مەملەكەتتىك شەكارادان 40 شاقىرىم جەردە ورنالاسقان نوۆوپەسچانوە (رف) ەلدى مەكەنى ماڭىندا بەلگىسىز ادامدار باقتاشىلاردىڭ قول-اياعىن بايلاپ, بوي تاسالاعاندىعى بەلگىلى بولاتىن.
الدىن-الا دەرەكتەر بويىنشا, جىلقى ۇرلاۋشىلاردىڭ ماقساتى ءىرى قارانى قازاقستان رەسپۋبليكاسىنىڭ اۋماعىنا ايداپ ءوتۋ بولعان.
قازاقستان مەن رەسەي شەكارا ۆەدومستۆولارى اراسىنداعى ءوزارا ىنتىماقتاستىق كەلىسىمى نەگىزىندە وقيعا بولعان اۋماققا پاۆلودار شەكارا وتريادىنىڭ «جەتىسۋ», «ارلان» زاستاۆالارىنىڭ ءۇش بىردەي شەكارا ناريادى جىبەرىلدى.
ىزدەستىرۋ شارالارى بارىسىندا توسقاۋىلدار قويىلىپ, ەكاتەرينوسلاۆكا, گاليتسكوە, سوسنوۆكا سەكىلدى ەلدى مەكەندەردە قازاقستاندىق شەكاراشىلار قىزمەتتىك يتتەردىڭ كومەگىمەن جۇمىس ىستەدى.
كوپ ۇزاماي ناتيجەسى دە كورىندى – 80-گە جۋىق جىلقى مەملەكەتتىك شەكارادان 50-60 شاقىرىم جەردەگى سوسنوۆكا (قازاقستان) ەلدىمەكەنىنىڭ ماڭايىنان تابىلدى, ولاردى قۇرامىندا «جەتىسۋ» شەكارا زاستاۆاسىنىڭ باستىعى اعا لەيتەنانت ازامات سايرانباەۆ, اعا تەحنيك امانكەلدى نايمانوۆ, ەفرەيتور جانىبەك سىزدىقوۆتان قۇرالعان توپ انىقتادى.
قازىرگى ۋاقىتتا, جىلقىلاردى زاڭدى يەلەرىنە قايتارۋ ماقساتىندا رەسەيلىك ءارىپتەستەرمەن كەزدەسۋ شاراسىن وتكىزۋ جوسپارلانۋدا.