كورشى ەلدە پاندەميانىڭ تارالۋ اۋماعى ۇلكەيىپ بارادى. تەك سوڭعى تاۋلىكتە عانا 10 مىڭنان استام ناۋقاستىڭ جاڭا دەرەگى تىركەلدى. بۇل كۇندەلىكتى رەكوردتىق ءوسىم, ناۋقاستانعانداردىڭ جالپى سانى سوڭعى تاۋلىكتە 134 687 ادامعا جەتتى.
كوروناۆيرۋس اۋرۋىنىڭ 10633 جاڭا دياگنوزى انىقتالدى, ونىڭ ىشىندە 5948-ءى ماسكەۋدە, ال ءبىر كۇن بۇرىن 9623 جاڭا جاعداي تىركەلگەن. دارىگەرلەر پاندەميا دەڭگەيى ماۋسىم ايىندا تومەندەيدى دەپ ۇمىتتەنىپ وتىر.
رەسەي دەنساۋلىق ساقتاۋ مينيسترلىگىنىڭ باس كارديولوگى سەرگەي بويتسوۆتىڭ ايتۋىنشا, جاڭا جاعدايلاردىڭ كوبەيۋىنىڭ باستى سەبەبى - تەكسەرۋلەر سانىنىڭ كوبەيۋى. سونداي-اق رەسەيلىكتەردىڭ باسىم كوپشىلىگىنىڭ كارانتين ەرەجەلەرىن ساقتاي الماۋى دا سەبەپ بولىپ وتىر.
«مەن كوروناۆيرۋستى جۇقتىرعان ادامداردىڭ انىقتالۋىنىڭ ارتۋىنىڭ باستى سەبەبى پتر تەستىلەرىنىڭ كوبەيۋى دەپ سانايمىن. مەنىڭ ويىمشا, كارانتيندىك شارالار الدەقايدا قاتاڭ بولۋى كەرەك. ەپيدەميالىق جاعدايدى ناقتى باعالاۋ تۋرالى ايتاتىن بولساق, وندا كۇنىنە اۋرۋحاناعا جاتقىزىلعانداردىڭ سانىنا نازار اۋدارعان ءجون», دەيدى بويتسوۆ.
رەسەيلىك دارىگەردىڭ بۇل ءسوزىن رف دەنساۋلىق ساقتاۋ مينيسترلىگىنىڭ سايتى جاريالادى. رەسەي دەنساۋلىق ساقتاۋ مينيسترلىگىنىڭ باس ەپيدەميولوگى نيكولاي بريكو ايتقانداي, ماۋسىمدا شەكتەۋ شارالارى السىرەۋى مۇمكىن. «سوڭعى ايدا جاڭا ينفەكتسيالار سانىنىڭ ءوسۋ قارقىنى 27 پايىزدان (2 ءساۋىر) 6,9 پايىزعا دەيىن (1 مامىر), ياعني ءتورت ەسە دەرلىك تومەندەدى, جاعداي تۇراقتالسا, ماۋسىم ايىندا توتەنشە جاعداي رەجىمىن توقتاتۋ تۋرالى ماسەلەنى كوتەرۋگە بولاتىن شىعار» دەدى بريكو «پارلامەنتتىك گازەتكە» بەرگەن سۇحباتىندا.
اكادەميكتىڭ پىكىرىنشە, ىندەتتىڭ تەز ارادا جويىلىپ كەتۋىن كۇتۋگە بولمايدى: «ەپيدەميانىڭ دامۋىنداعى تاريحي تاجىريبە ەپيدەميانىڭ كەرى دامۋ كەزەڭى, ادەتتە, اۋرۋدىڭ ءوسۋ فازاسىنان گورى ۇزاققا سوزىلاتىندىعىن كورسەتەدى, بىزگە ەپيدەميالىق پروتسەس تسيكلىنىڭ اياقتالاتىن مەرزىمى تۋرالى ايتۋ ءالى ەرتە» دەيدى ول.
سەنبىدە ماسكەۋ مەرى سەرگەي سوبيانين ماسكەۋدە ەپيدەميانىڭ ۋشىعۋ قاۋپى بار بولسا, كارانتيندىك شارالار كۇشەيتىلۋى مۇمكىن ەكەنىن ەسكەرتتى. «ەگەر ءبىز قانداي-دا ءبىر قاۋىپ-قاتەردى بايقاساق, بۇل شارالاردى قاتايتۋ تۋرالى ۇسىنىس جاسايمىز», دەدى سوبيانين.
ونىڭ ايتۋىنشا, ەگەر قاجەت بولسا, ەلەكتروندى رەيستەردىڭ سانىن ازايتۋعا بولادى, ونسىز موسكۆالىقتار قالانى اينالىپ وتە المايدى. 15 ساۋىردەن باستاپ قولىندا ەلەكتروندى تالونى بار جولاۋشىلارعا ماسكەۋ بويىنشا جۇرۋگە رۇحسات ەتىلدى. ونىڭ ءۇش ءتۇرى بار: جۇمىس ساپارىنا, مەديتسينالىق مەكەمەلەرگە جانە «باسقا ماقساتتارعا» ساپارعا ءبىر رەتتىك تالون. ء ساۋىر ايىنىڭ سوڭىندا ەلەكتروندى تالونداردىڭ قولدانىلۋ مەرزىمىن شەكتەۋ تۋرالى قاۋلى شىعىپ, ولاردىڭ كەيبىرەۋلەرى بۇعاتتالدى.