1 مامىر قازاقستان حالقىنىڭ بىرلىگى كۇنى. سونىمەن قاتار, بيىل ۇلى جەڭىستىڭ 75 جىلدىعى. سارىسۋ اۋدانىنىڭ اكىمى قاناتبەك مادىبەك جاڭتالاپ اۋلىنىڭ تۇرعىنى, 88 جاستاعى ەڭبەك ارداگەرى سادىكەن مولدابەكوۆانىڭ وتباسىنا بارىپ, بىرلىك كۇنىمەن جانە ۇلى جەڭىستىڭ 75 جىلدىعىمەن قۇتتىقتادى.
كوپتى كورگەن كەيۋانا اۋدان باسشىسىنىڭ ارنايى ۋاقىت ءبولىپ كەلگەنى ءۇشىن انالىق العىسىن ءبىلدىرىپ, اق باتاسىن بەردى. باسىنان نەبىر قيىن-قىستاۋ شاقتى وتكىزگەن قارت انانىڭ ايتۋىنشا, ول سول كەزدەگى كوگونوۆيچ ورتا مەكتەبىن بىتىرەدى. الايدا ونىڭ جاستىق شاعى ۇلى وتان سوعىسى جىلدارىنا سايكەس كەلەدى. اناسى اقبورىقپەن بىرگە سول كەزدەگى ۇيىم كولحوزىنىڭ شارۋاشىلىق جۇمىستارىنا دا بەلسەنە ارالاسادى. سول جىلدارداعى ەڭبەگى ەلەنىپ 15 جاسىندا ارنايى وراق - بالعا مەدالىمەن ماراپاتتالادى. ال, مەكتەپ بىتىرگەن سوڭ ۇيىم كولحوزىندا كىتاپحاناشى, «قىزىل وتاۋ» جۇمىستارىنىڭ ساياسي اعارتۋ جۇمىستارىنا ارالاسادى. 1954 جىلى جولداسى قوڭىر اقبەتوۆپەن وتاۋ قۇرىپ, 7 ۇل-قىز تاربيەلەپ ءوسىردى. بۇگىندە بارلىعىنا دا جوعارى ءبىلىم بەرىپ, ۇلىن ۇياعا, قىزىن قياعا قوندىرىپ وتىرعان باقىتتى انانىڭ جولداسى قوڭىر اقبەتوۆ تە ۇلى وتان سوعىسى جىلدارىندا موڭعوليا جەرىندەگى حولحين-گول اسكەري ۇرىستارىنا قاتىسقان ەكەن. سوعىس كەزىندە جاپونيانى جەڭگەنى ءۇشىن «زا پوبەدۋ ناد ياپوني» مەدالىمەن ماراپاتتالعان.
سوعىستان كەيىنگى جىلدارى بايقادام سوۆحوزىندا مال دارىگەرى بولىپ ەڭبەك ەتىپتى.
سادىكەن اپانىڭ دا ۇزاق جىلعى ەڭبەگى ەلەنىپ, ول ءار جىلدارى « ۇلى جەڭىستىڭ 30 جىلدىعى», « ۇلى جەڭىستىڭ 40 جىلدىعى», « ۇلى جەڭىستىڭ 50 جىلدىعى», « ۇلى جەڭىستىڭ 60 جىلدىعى», « ۇلى جەڭىستىڭ 70 جىلدىعى» مەدالدارىمەن قاتار «التىن القا» مەدالىمەن دە ماراپاتتالادى. سادىكەن اپامىز بۇگىنگى جاستارعا ءاردايىم ەڭبەكقور ءارى تاربيەلى بولۋدى وسيەت ەتەدى.
قازىرگى كەزدە سادىكەن اپا 15 نەمەرە, 20 شوبەرە ءسۇيىپ وتىرعان باقىتتى اجە. ول بولاشاقتا تەك جاقسىلىق بولۋىن, ەشقانداي سوعىستىڭ بولماۋىن تىلەيدى.
جامبىل وبلىسى