قالانىڭ ەڭبەكشى اۋدانىندا كۇنى بۇگىنگە دەيىن 519 اۋلا اباتتاندىرىلعان. بيىل تاعى 64, كەلەر جىلى 47 اۋلانى اباتتاندىرۋ جوسپاردا بار. بۇل تۋرالى شىمكەنت قالاسى اكىمى مۇرات ايتەنوۆتىڭ توعىس تۇرعىن الابىنا بارعان ساپارىندا ءمالىم بولدى.
قالا باسشىسى ونداعى مۇنايبارلاۋشىلار كوشەسىنە سالىنعان ويىن الاڭشاسىمەن تانىستى. مەردىگەر كومپانيا عارىشتىق ۇلگىدە بوي كوتەرگەن بالالار الاڭشاسىنا قۇرىلعىلاردى ارنايى رەسەيدەن الدىرىپتى. ماڭىندا ءۇش سپورت الاڭى دا بار. بۇگىندە تۇرعىندار ول جەرگە ۆيدەو كامەرا ورناتۋدى ويلاستىرىپ جاتىر. تەك پاندەمياعا بايلانىستى ەلدە جاريالانعان توتەنشە جاعداي قول بايلاۋ بولىپ وتىرعان كورىنەدى.
«بۇرىن ويىن الاڭشاسىنىڭ ورنىندا توزعان كارىز جۇيەسىنەن اققان ساسىق سۋ كولدەپ, بادام وزەنىنە اعاتىن. كارىز جۇيەسى مەن اۋىز سۋمەن ۇلكەن ماسەلە ەدى. قازىر جاعداي جاقساردى. كارىز جۇەسى جاڭارىپ, تاۋلىگىنە 24 ساعات تىرشىلىك ءنارى بەرىلەدى. وتكەن جىلى ەلەكتر جۇيەسى تارتىلدى. سوندىقتان جۇيەلى جۇمىستىڭ ارقاسىندا بىزدە بىرتىندەپ ماسەلەلەر شەشىلىپ جاتىر. اكىمدىككە العىس ايتامىز. مىناداي ويىن الاڭشاسى استانادان باسقا ەش جەردە جوق سياقتى. وزدەرىندە ويىن الاڭشاسى بولسا دا, كورشىلەس ماياتاس, ەلتاي, ايناتاس ەلدى مەكەندەرىنىڭ بالالارى وسىندا كەلىپ وينايدى», - دەيدى مۇنايبارلاۋشىلار كوشەسىنىڭ توبە ءبيى تاليبا بۋركوۆەتسكايا.
تۇرعىنداردىڭ ايتۋىنشا, بۇگىندە كوشەنى جارىقتاندىرۋ ماسەلەسى وزەكتى. ءوز كەزەگىندە مۇرات ايتەنوۆ جارىق شامدارىن ورناتۋدىڭ وڭتايلى جولدارىن قاراستىرىپ جاتقانىن جەتكىزدى.
شىمكەنت