پارلامەنت سەناتىنىڭ جالپى وتىرىسىندا «ارداگەرلەر تۋرالى» زاڭ جوباسى قارالدى.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ پارلامەنت ماجىلىسىندە ماقۇلدانعان «ارداگەرلەر تۋرالى» زاڭ جوباسىن سەناتورلاردىڭ نازارىنا ۇسىنىپ, قۇجات ارداگەرلەردى الەۋمەتتىك قورعاۋعا بايلانىستى قوعامدىق قاتىناستاردى رەتتەيتىن زاڭنامالىق اكتىلەردى جۇيەلەۋ, قايتا قاراۋ جانە ارداگەرلەردىڭ جاڭا ساناتتارىن قالىپتاستىرۋ ماقساتىندا ازىرلەنگەنىن اتاپ ءوتتى.
زاڭ جوباسى بويىنشا ارداگەرلەردىڭ الەۋمەتتىك قورعالاتىن 5 ساناتى ايقىندالدى. ونىڭ ىشىندە ءبىر ساناتى ەڭبەك ارداگەرلەرىنە قاتىستى بولدى. ولارعا سوتسياليستىك ەڭبەك ەرلەرى, ءۇش دارەجەلى داڭق, ءۇش دارەجەلى ەڭبەك داڭقى وردەندەرىنىڭ يەگەرلەرى, قازاقستاننىڭ ەڭبەك ەرى اتاعىنا يە بولعان تۇلعالار, 1941 جىلعى 22 ماۋسىمنان 1945 جىلعى 9 مامىر ارالىعىندا كەمىنە 6 اي جۇمىس ىستەگەن, اسكەري قىزمەت وتكەرگەن جانە ەكىنشى دۇنيەجۇزىلىك سوعىس جىلدارى تىلداعى جانقيارلىق ەڭبەگىمەن ءمىنسىز اسكەري قىزمەتى ءۇشىن بۇرىنعى كسرو وردەندەرىمەن جانە مەدالدەرمەن ماراپاتتالعان ادامدار جاتادى.
جاڭا زاڭدى تالقىلاۋ بارىسىندا سەنات دەپۋتاتى سارسەنباي ەڭسەگەنوۆ قۇجاتتىڭ كەيبىر تۇستارىنا قاتىستى بايانداماشىعا سۇراق قويىپ, سىنعا الدى. ماسەلەن, سەناتور ەڭبەك ارداگەرلەرى ساناتىنا ءۇش دارەجەلى داڭق وردەنى يەگەرلەرى نەلىكتەن ەنگەنىن سۇرادى. ويتكەنى بۇل وردەن سوعىسقا قاتىسقاندارعا بەرىلگەن. بۇعان قوسا ول قولدانىستاعى زاڭدا اۋعان سوعىسى ارداگەرلەرىنە ءبىرىنشى كەزەكتە تۇرعىن ءۇي الۋعا قۇقىق بەرىلگەنىن, ال قازىرگىسىندە بۇل جاعى قاراستىرىلماعانىن العا تارتتى.
بۇل ساۋالدارعا جاۋاپ بەرگەن ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ سوعىسقا دا قاتىسقان, ەڭبەككە دە ارالاسقان تۇلعالاردىڭ ەڭبەك ارداگەرلەرى رەتىندە دە جەڭىلدىكتەرگە يە بولاتىنىن, ونىڭ ۇستىنە قازىر قازاقستاندا ءۇش دارەجەلى داڭق وردەنى يەگەرلەرى جوق ەكەنىن ايتتى. ال ساناتى وزگەرگەن اۋعان ارداگەرلەرى ءۇشىن بۇرىنعىداي بارلىق جەڭىلدىك ساقتالاتىنىن اتاپ ءوتتى.