پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى-قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالىپ, قابىلداندى.
اتالعان زاڭ جوباسىن تانىستىرعان ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ زاڭ جوباسىن قابىلداۋدىڭ مىندەتى كوشى-قون زاڭناماسىن جەتىلدىرۋ ەكەنىن اتاپ ءوتتى. ونىڭ ىشىندە ەلىمىزگە كەلەتىن ەتنيكالىق رەپاتريانتتار مەن قونىس اۋدارۋشىلارعا قولايلى جاعدايلار جاساۋ, ەل ەكونوميكاسىنىڭ سۇرانىستارىنا ارنالعان سىرتقى ەڭبەك كوشى-قونىنىڭ ءتيىمدى جۇيەسىن قۇرۋ, قولايلى ينۆەستيتسيالىق احۋال جاساۋ, حالىقارالىق ۇزدىك تاجىريبەنى ەسكەرە وتىرىپ كوشى-قون پروتسەستەرىن رەتتەۋ سالاسىنداعى قۇقىقتىق بازانى كەڭەيتۋ جانە زاڭسىز كوشى-قوننىڭ جولىن كەسۋ باعىتتارى بار.
كوشى-قوندى رەتتەۋدى كوزدەيتىن قۇجاتتا مەملەكەت باسشىسى قاسىم-جومارت توقاەۆتىڭ تاپسىرماسى بويىنشا «ورالمان» ءسوزىن «قانداس» سوزىنە اۋىستىرۋ تۋرالى تۇزەتۋ ەنگىزىلدى.
– ەتنيكالىق كوشى-قون سالاسىنا قانداي وزگەرىستەر ەنگىزىلەدى؟ بىرىنشىدەن, قولدانىستاعى زاڭناماعا سايكەس, ەتنيكالىق قازاقتار «ورالمان» مارتەبەسىن الۋ ءۇشىن قازاقستان رەسپۋبليكاسىنىڭ تاۋەلسىزدىك العانعا دەيىن شەت مەملەكەتتىڭ اۋماعىندا تۇرۋ فاكتىسىن راستاۋ قاجەت. ءىس جۇزىندە 1991 جىلدان كەيىن تۋعان ەتنيكالىق قازاقتار مۇنداي قۇجاتتاردى بەرە المايدى. وسىعان بايلانىستى, «ورالمان» مارتەبەسىن الۋ ءۇشىن بۇرىن قازاقستان رەسپۋبليكاسىنىڭ ازاماتتىعىندا بولماۋى نەگىزگى كريتەريى رەتىندە ەنگىزىلەدى, – دەدى ب.نۇرىمبەتوۆ.