قىزىلوردا: كارانتين رەجىمى جەڭىلدەتىلدى

مىسالى, بۇگىننەن باستاپ كوپ قاباتتى ۇيلەردىڭ تۇرعىندارىنا اۋلاعا سەرۋەندەۋگە, ال بالالارعا ەرەسەكتەرمەن بىرگە ويىن الاڭدارىنا شىعۋعا رۇقسات ەتىلدى. بۇل رەتتە بەتپەردە تاعىپ, كەمىندە 1,5 مەتر قاشىقتىقتى ساقتاۋ كەرەك. بالالار الاڭىندا ساعات 06:00-دەن 18:00-گە دەيىن ويناۋعا بولادى.  وبلىس ورتالىعىندا توقتاپ قالعان قوعامدىق كولىكتەر تاڭەرتەڭ ساعات 06: 00-دەن 09:00-گە دەيىن, كەشكە ساعات 18: 00-دەن 20:00-گە دەيىن جۇرە باستايدى. ازىق-ت ۇلىك دۇكەندەرىنىڭ جۇمىس رەجىمى 20:00-گە دەيىن ۇزارتىلدى. ال دامحانالارعا تاعامداردى جەتكىزۋ قىزمەتى بويىنشا 22:00 دەيىن تاپسىرىس بەرۋگە بولادى.

دەمالىس جانە مەرەكە كۇندەرى ساعات 06: 00-دەن 18: 00-گە دەيىن ساياجايعا بارۋعا رۇقسات بەرىلدى. وزىمەن بىرگە جەكە باسىن كۋالاندىراتىن جانە ساياجاي ۋچاسكەسىنە مەنشىك قۇقىعىن راستايتىن قۇجاتتار بولۋ كەرەك. كوشەتتەر مەن ەگۋگە ارنالعان تۇقىمداردى قالا جانە اۋدان اكىمدىكتەرى بەلگىلەگەن جەرلەردەن ساتىپ الۋعا بولادى.

كارانتيندىك رەجىمدى كەزەڭ-كەزەڭمەن جەڭىلدەتۋ ءبىرىنشى كەزەكتە ونەركاسىپكە, شاعىن جانە ورتا بيزنەسكە, قۇرىلىسقا, تكش مەن كولىككە قاتىستى بولدى.

بۇگىننەن باستاپ ساقتاندىرۋ جانە نوتاريلدىق كەڭسەلەر, جەكە مەديتسينالىق قىزمەتتەر, وپتيكا دۇكەندەرى, تجو,  اۆتوجۋ, ۆۋلكانيزاتسيا, شاشتاراز, اياق كيىم شەبەرحانالارى جۇمىس ىستەي باستايدى. ەلەكترونيكا جانە تۇرمىستىق تەحنيكا ساۋداسى تۇتىنۋشىعا دەيىن جەتكىزۋ قاعيداتى بويىنشا جۇرگىزىلەدى. 

ال 4 مامىردان باستالاتىن ەكىنشى كەزەڭدە  اۆتوبولشەكتەر, قۇرىلىس ماتەريالدارى جانە سانتەحنيكا ساتاتىن, اۋدانى 500 شارشىمەتردەن اساتىن ساۋدا  نۇكتەلەرى, اۆتوسالوندار, باسپاحانا قىزمەتتەرى, ورتكە قارسى جانە كۇزەت قۇرىلعىلارىنا سەرۆيستىك قىزمەت كورسەتۋ, تىگىن شەبەرحانالارى ىسكە قوسىلادى.

قىزمەتتى قايتا باستاۋعا رۇقسات ەتىلەتىن نىساندار باسشىلارى سانيتارلىق-دەزينفەكتسيالىق رەجىمدى كۇشەيتە وتىرىپ, ەپيدەمياعا قارسى شارالاردىڭ ساقتالۋىن قامتاماسىز ەتۋى ءتيىس.