پارلامەنت ءماجىلىسى دەپۋتاتتارىنىڭ نازارىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە توتەنشە جاعداي ماسەلەلەرى بويىنشا وزگەرىستەر ەنگىزۋ تۋرالى» زاڭ جوباسى ۇسىنىلدى.
«زاڭ جوباسى «الەۋمەتتىك-ەكونوميكالىق تۇراقتىلىقتى قامتاماسىز ەتۋ جونىندەگى شارالار تۋرالى» 2020 جىلعى 16 ناۋرىزداعى مەملەكەت باسشىسىنىڭ جارلىعىن ورىنداۋ ماقساتىندا ازىرلەندى. زاڭ جوباسىنىڭ ماقساتى الەۋمەتتىك-ەكونوميكالىق تۇراقتىلىقتى قامتاماسىز ەتۋ ءۇشىن توتەنشە جاعداي كەزەڭىندە جەدەل شارالار قابىلداۋ مۇمكىندىگى بولىپ تابىلادى»,- دەدى ۇلتتىق ەكونوميكا ءمينيسترى رۋسلان دالەنوۆ.
ءمينيستردىڭ ايتۋىنشا, زاڭ جوباسىندا توتەنشە جاعداي كەزەڭىندە مەملەكەتتىك باسقارۋدىڭ جۇمىس ىستەۋ مەحانيزمى بەلگىلەنەدى. ول ءۇشىن «توتەنشە جاعداي تۋرالى» جانە «قۇقىقتىق اكتىلەر تۋرالى» زاڭدارعا تۇزەتۋلەر ەنگىزىلەدى.
«اتاپ ايتقاندا, زاڭ توتەنشە جاعداي كەزەڭىندە زاڭنامانىڭ جەكەلەگەن سالالارىنىڭ قولدانىلۋ ەرەكشەلىكتەرىمەن تولىقتىرىلادى. زاڭ جوباسىندا ولارعا 14 سالا جاتقىزىلادى: سالىقتىق, بيۋدجەتتىك, كەدەن, بانكتىك, ەڭبەك, مونوپولياعا قارسى زاڭناما; دەنساۋلىق, مەملەكەتتىك ساتىپ الۋ, ۆاليۋتالىق رەتتەۋ تۋرالى زاڭناما; الەۋمەتتىك قورعاۋ, مەملەكەتتىك م ۇلىك, مەملەكەتتىك باقىلاۋ جانە قاداعالاۋ سالاسىندا; سونداي-اق ەلدىڭ حالىقارالىق مىندەتتەمەلەرىن ىسكە اسىرۋ. توتەنشە جاعداي كەزەڭىندە قابىلدانعان قۇقىقتىق اكتىلەر جالپى العاندا ول اياقتالعانعا دەيىن قولدانىلاتىن بولادى. ولاردىڭ قاتارىنا وزگە قولدانىلۋ مەرزىمى بەلگىلەنگەن اكتىلەر كىرمەيدى», - دەدى مينيستر.
رۋسلان دالەنوۆتىڭ ايتۋىنشا, «توتەنشە جاعداي تۋرالى» زاڭدا بەلگىلەنگەن جاعدايدا جانە تارتىپپەن نورماتيۆتىك قۇقىقتىق اكتىنىڭ نەمەسە ونىڭ جەكەلەگەن نورمالارىنىڭ قولدانىلۋىن توقتاتا تۇرۋ بويىنشا «قۇقىقتىق اكتىلەر تۋرالى» زاڭعا تۇزەتۋ ەنگىزىلەدى. جالپى العاندا, اتالعان تۇزەتۋلەر توتەنشە جاعداي كەزەڭىندە الەۋمەتتىك-ەكونوميكالىق تۇراقتىلىقتى قامتاماسىز ەتۋگە باعىتتالعان. زاڭ جوباسىن قابىلداۋ بيۋدجەتتەن قوسىمشا قارجىلىق شىعىنداردى تالاپ ەتپەيدى جانە تەرىس الەۋمەتتىك-ەكونوميكالىق جانە قۇقىقتىق سالدارعا اكەپ سوقپايدى.