ماڭعىستاۋ وبلىسىندا كوروناۆيرۋس ينفەكتسياسىن جۇقتىرعان جاڭا ءبىر جاعداي تىركەلدى. ول - 2019 جىلى تۋعان اقتاۋ قالاسىنىڭ تۇرعىنى. بۇل تۋرالى مو قوعامدىق كوممۋنيكاتسيا ورتالىعى حابارلادى.
ءسابي - وسىعان دەيىن ۆيرۋستى جۇقتىرعان ناۋقاستىڭ ۇلى. قاۋىپتى دەرت انىقتالعان اداممەن قارىم-قاتىناستا بولعاندىقتان كارانتيندىك ستاتسيونارعا جاتقىزىلىپ, زەرتحانالىق سىناما الىنعان بولاتىن. پتر دياگنوستيكالىق زەرتتەۋ قورىتىندىسىمەن COVID-19 دياگنوزى ناقتىلاندى. قازىرگى تاڭدا ناۋقاستىڭ جاعدايى قاناعاتتانارلىق. بەكىتىلگەن حاتتاماعا سايكەس ءتيىستى ەم جۇرگىزىلۋدە. ناۋقاسپەن قارىم-قاتىناستا بولعان ادامدار انىقتالىپ, بارلىعى مەديتسينالىق باقىلاۋعا الىنۋدا, دەلىنگەن مو قوعامدىق كوممۋنيكاتسيا ورتالىعى تاراتقان اقپاراتتا.
28.04.2020 ج. جاعداي بويىنشا وڭىردە بارلىعى 32 ادامنان COVID-19 ۆيرۋسى انىقتالدى: اقتاۋدا – 18; جاڭاوزەندە – 4; ماڭعىستاۋ اۋدانىندا – 4; مۇنايلى اۋدانىندا – 3; قاراقيا اۋدانى – 3; جازىلىپ شىققانى – 7; قايتىس بولعانى – 1.