الماتىداعى قر پرەزيدەنتى ءىس باسقارماسىنىڭ مەديتسينالىق ورتالىعىندا اشىق ەسىك كۇنى ءوتتى. يگى شاراعا 500-دەن استام الماتىلىقتار قاتىسىپ, كلينيكانىڭ ۇزدىك پروفەسسورلارى مەن دارىگەرلەرىنەن تەگىن كەڭەس الدى.
الماتىداعى قر پرەزيدەنتى ءىس باسقارماسىنىڭ مەديتسينالىق ورتالىعىندا اشىق ەسىك كۇنى ءوتتى. يگى شاراعا 500-دەن استام الماتىلىقتار قاتىسىپ, كلينيكانىڭ ۇزدىك پروفەسسورلارى مەن دارىگەرلەرىنەن تەگىن كەڭەس الدى.
سوڭعى جىلدارى مۇنداي اكتسيا وتكىزۋدى اتالمىش ورتالىق داستۇرگە اينالدىرعان. قر پرەزيدەنتى ءىس باسقارماسى مەديتسينالىق ورتالىعى باس دارىگەرىنىڭ ەمحانا جونىندەگى ورىنباسارى شولپان ايۋپوۆانىڭ ايتۋىنشا, بۇعان دەيىن اشىق ەسىك كۇنى جىلىنا ەكى رەت وتكىزىلسە, الداعى ۋاقىتتا ءۇش رەت ۇيىمداستىرۋ جوسپاردا تۇر ەكەن.
بۇل جولى دەنساۋلىقتارىن تەكسەرتىپ, دارىگەرلەردىڭ قابىلداۋىندا بولعان كەلۋشىلەرگە 41 ارناۋلى مامان قىزمەت كورسەتكەن. ولاردىڭ بارلىعى دەرلىك ورتالىقتىڭ جەتەكشى ماماندارى. مۇنداعى دارىگەرلەردىڭ دەنى جىلدا ارنايى سەمينارلارعا قاتىسىپ, شەتەلدەردە تاجىريبەلەرىن ارتتىرىپ, بىلىكتىلىكتەرىن شىڭداعان كاسىبي ماماندار. ونىڭ ۇستىنە بۇگىندە ورتالىق زاماناۋي تەحنولوگيالارمەن, قۇرىلعىلارمەن جابدىقتالعان. سوندىقتان دا, كەلۋشىلەر ءبىر ەمەس, ەكى-ءۇش مامانعا قارالىپ, وزدەرىنە كورسەتىلگەن قىزمەتكە كوڭىلدەرى تولىپ, ريزا بولىپ قايتۋدا.
سونىمەن قاتار, اكتسيادا ۋلترادىبىستىق دياگنوستيكا, رەنتگەن, كارديوگرامما, زەرتحانا, ت.ب. قىزمەتتەرگە 50 پايىزدىق جەڭىلدىك جاسالدى. ال بىرنەشە مەديتسينالىق فيرمالار قانت مولشەرىن, حولەستەريندى تەگىن انىقتاپ بەردى.
– اشىق ەسىك كۇنى وتە جاقسى ۇيىمداستىرىلعان. ماعان, اسىرەسە, ورتالىق دارىگەرلەرىنىڭ كەلۋشىلەرگە دەگەن ىقىلاسى ۇنادى. ولارعا كوپ راحمەت. ءبارى دە ءىلتيپاتپەن قابىلداپ, ءبىلىمدى, بىلگىر مامان رەتىندە ساۋاتتى كەڭەس بەرىپ, ريزا بولىپ قايتىپ بارامىز, – دەدى ورتا جاستاعى قالا تۇرعىنى ن.گ.تيموفەەۆا. ال ءوزىن راشيدا ماجيتقىزى يسمايىلوۆا دەپ تانىستىرعان اپاي مۇنداي جاقسىلىق حاباردى قۇربىسىنان ەستىگەنىن, ونى تاڭعالدىرعانى ادام كوپ جينالسا دا اكتسيانىڭ ىڭ-شىڭسىز, تارتىپپەن, جاۋاپتى ءوتكەنىن باسىلىم بەتىندە جەتكىزۋدى ءوتىندى.
گۇلزەينەپ سادىرقىزى,
«ەگەمەن قازاقستان».
الماتى.