ەرتەڭ, 29 ءساۋىر كۇنى قازاق ۇلتتىق قىزدار پەداگوگيكالىق ۋنيۆەرسيتەتىندە ونلاين فورماتتاعى رەسپۋبليكالىق «اشىق ەسىك كۇنى» وتەدى. ساعات 14:00 مەن 18:00 ارالىعىندا جۇرگىزىلەتىن شارا وقۋ ورنىنىڭ YouTube-تاعى رەسمي ارناسىندا ۇيىمداستىرىلادى. بۇل تۋرالى ۋنيۆەرسيتەتتىڭ ءباسپاسوز قىزمەتى حابارلادى.
«اشىق ەسىك كۇنىنە» بيىلعى مەكتەپ بىتىرۋشىلەر مەن ولاردىڭ اتا-انالارى, ءبىلىم بەرۋ سالاسىنىڭ قىزمەتكەرلەرى جانە ۋنيۆەرسيتەتتىڭ پروفەسسور-وقىتۋشىلارى قاتىسادى.
شارا بارىسىندا قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا, فاكۋلتەت دەكاندارى مەن قۇرىلىمدىق ءبولىم باسشىلارى وقۋ ورنى مەن ونداعى ماماندىقتار تۋرالى كەڭىنەن مالىمەت بەرىپ, وقۋشىلاردىڭ ساۋالدارىنا ەگجەي-تەگجەيلى جاۋاپ بەرەدى.
سونىمەن قاتار «اشىق ەسىك كۇنى» بارىسىندا ءبىلىم ورداسىنىڭ تانىمال تۇلەكتەرى مەن شەتەلدىك سەرىكتەس جوعارى وقۋ ورىندارىنىڭ وكىلدەرى بەينە ۇندەۋلەر سەرياسىن ۇسىنادى. ال حالىقارالىق ىنتىماقتاستىق ءبولىمىنىڭ باسشىسى رايا ءامىرجانوۆا قوسديپلومدى ءبىلىم بەرۋ باعدارلاماسى جايلى مالىمەت بەرسە, قازاقستان تاريحى كافەدراسىنىڭ اعا وقىتۋشىسى بەرىك جۇبانىشەۆ «قازاقستان تاريحى» پانىنەن شەبەرلىك ساباق وتكىزەدى. سونداي-اق «جان شۋاعى» پسيحولوگيالىق ورتالىعىنىڭ ديرەكتورى كۇلماش ەلشىباەۆا تالاپكەرلەرگە پسيحولوگيالىق كەڭەس بەرمەك.
ايتا كەتەيىك, ونلاين فورماتتاعى «اشىق ەسىك كۇنى» ەلىمىزدىڭ جوعارى وقۋ ورىندارىنىڭ اراسىندا العاشقىلاردىڭ ءبىرى بولىپ قازاق ۇلتتىق قىزدار پەداگوگيكالىق ۋنيۆەرسيتەتىندە ۇيىمداستىرىلۋدا.
بۇگىندە وقۋ ورنى مەملەكەتتىك ليتسەنزيا نەگىزىندە 49 باكالاۆريات, 28 ماگيستراتۋرا, 12 PhD دوكتورانتۋرا ماماندارىن دايارلايدى. ستۋدەنتتەرگە ءبىلىم بەرۋ تراەكتورياسىن تاڭداۋ مەن ءبىلىم بەرۋ قىزمەتتەرىنىڭ كەڭ سپەكترى ۇسىنىلعان.
ۋنيۆەرسيتەتتىڭ ماتەريالدىق-تەحنيكالىق بازاسىندا 3 وقۋ كورپۋسى, 7 ستۋدەنتتىك جاتاقحانا, مەملەكەتتىك ءبىلىم بەرۋ گرانتىنا تۇسكەن ستۋدەنتتەر ءۇشىن3 مەزگىل تاماقپەن قامتاماسىز ەتەتىن «ۇلپان» اسحاناسى, ستۋدەنتتەر ءۇشىن اشىلعان «اققۋ» ءجۇزۋ باسسەينىمەن زاماناۋي عىلىمي كىتاپحانا جۇمىس جاسايدى.
– ءبىز, قازاقستاننىڭ بولاشاعىن دايىنداپ جاتقانىمىزدى نىق سەنىممەن ايتا الامىز. سەبەبى ءبىزدىڭ تۇلەكتەرىمىزدىڭ كوپشىلىگى قازاقستان قوعامىنىڭ الدىڭعى قاتارىندا ەڭبەك ەتىپ, ەلىمىزدىڭ دامۋى جولىندا قىزمەت اتقارۋدا. بۇل – ۇجىم ەڭبەگىنىڭ ناتيجەسى, ءبىز ونىمەن ماقتان ەتەمىز جانە بولاشاققا سەنىممەن قارايمىز. قىمباتتى ءبىلىم قۋعان ارمانشىل جاستار, سىزدەردى ۇلاعات ۇياسىنا اينالعان قاراشاڭىراق – قىزدار ۋنيۆەرسيتەتىندە ءبىلىم الۋعا شاقىرامىز, – دەدى وقۋ ورنىنىڭ رەسمي وكىلى – ءباسپاسوز جانە قوعاممەن بايلانىس ءبولىمىنىڭ جەتەكشىسى جاندار اسان.