بۇل تۋرالى وبلىستىق كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ ايتتى.
پرەزيدەنتتىڭ ەكونوميكانى تۇراقتاندىرۋعا قاتىستى بەرگەن تاپسىرماسىنا سايكەس 20 ساۋىردە ۇكىمەتتىڭ قاۋلىسى شىقتى. اتالمىش قاۋلى اياسىندا كاسىپكەرلىك سۋبەكتىلەرى بىرقاتار سالىق تۇرلەرىنەن بوساتىلىپ, مەملەكەتتىك قولداۋعا يە بولدى.
اتاپ ايتقاندا, ميكرو, شاعىن جانە ورتا كاسىپكەرلىك سۋبەكتىلەرى 29 ەكونوميكالىق قىزمەت تۇرلەرىنىڭ جالپى جىكتەۋىشى بويىنشا 1 ساۋىردەن باستاپ 1 قازانعا دەيىنگى مەرزىمگە, ال ءىرى كاسىپكەرلىك سۋبەكتىلەرى 10 ەقجج (وكەد) بويىنشا 2020 جىلعى 1 ساۋىردەن باستاپ 1 شىلدەگە دەيىنگى مەرزىمگە تولەم كوزىنەن ۇستالاتىن جەكە تابىس سالىعىنان, جەكە پراكتيكامەن اينالىساتىن تۇلعا دەربەس تولەيتىن جەكە تابىس سالىعىنان, دارا كاسىپكەردىڭ ءوزى ءۇشىن تولەيتىندەرىن قوسپاعاندا, الەۋمەتتىك سالىقتىڭ, مىندەتتى زەينەتاقى جارنالارىنىڭ, مىندەتتى كاسىپتىك زەينەتاقى جارنالارىنىڭ, الەۋمەتتىك اۋدارىمداردىڭ, مىندەتتى الەۋمەتتىك مەديتسينالىق ساقتاندىرۋعا جارنالاردان بوساتىلدى.
سونىمەن قاتار, 2019 جىلعى مىندەتتەمەلەر بويىنشا سالىق ەسەپتىلىگى نىساندارىن تاپسىرۋ مەرزىمى 2020 جىلعى 31 ناۋرىزدان 2020 جىلعى 31 مامىرعا اۋىستىرىلدى.
وسى رەتتە, وبلىستاعى شاعىن جانە ورتا كاسىپكەرلىك سۋبەكتىلەرىنىڭ بارلىق سالىقتار مەن بيۋدجەتكە تولەنەتىن باسقا دا مىندەتتى تولەمدەرى, سونداي-اق الەۋمەتتىك تولەمدەر بويىنشا تولەۋ مەرزىمدەرى 2020 جىلدىڭ 1 ماۋسىمىنا دەيىن ۇزارتىلدى.
سونىمەن قاتار, وبلىستىق كىرىستەر دەپارتامەنتىنىڭ اقپاراتى بويىنشا ايماقتا بۇگىنگى كۇندە 20 122 شاعىن جانە ورتا كاسىپكەرلىك سۋبەكتىسى 2020 جىلدىڭ 1 ءساۋىرى مەن 1 قازانى ارالىعىندا بىرقاتار سالىق تولەمدەرىنەن بوساتىلدى.