جەكسەنبى كۇنى استانادا تۇڭعىش رەت كوكپاردان وتكەن ازيا چەمپيوناتى مارەسىنە جەتتى. وسى كۇنى ەلىمىزدىڭ باس كومانداسى بەس كۇن بويى «قازانات» اتشابارىنىڭ شاڭىن قاققان كوماندالار اراسىندا تۇڭعىش ازيا چەمپيونى اتاندى! ءسويتىپ, كوپشىلىگىمىز كۇتكەندەي, ازيا چەمپيونى دەگەن مارتەبەلى اتاقتى باسقا ەمەس, ءوزىمىزدىڭ ۇلتتىق قۇراما كوماندامىز يەلەنىپ, استانا اسپانىندا ەلىمىزدىڭ ءانۇرانىن قالىقتاتتى.
جەكسەنبى كۇنى استانادا تۇڭعىش رەت كوكپاردان وتكەن ازيا چەمپيوناتى مارەسىنە جەتتى. وسى كۇنى ەلىمىزدىڭ باس كومانداسى بەس كۇن بويى «قازانات» اتشابارىنىڭ شاڭىن قاققان كوماندالار اراسىندا تۇڭعىش ازيا چەمپيونى اتاندى! ءسويتىپ, كوپشىلىگىمىز كۇتكەندەي, ازيا چەمپيونى دەگەن مارتەبەلى اتاقتى باسقا ەمەس, ءوزىمىزدىڭ ۇلتتىق قۇراما كوماندامىز يەلەنىپ, استانا اسپانىندا ەلىمىزدىڭ ءانۇرانىن قالىقتاتتى.
وسى كۇنى ءبىزدىڭ قۇراما فينالدا قىرعىزستان كومانداسىمەن كەزدەسىپ, 4:2 ەسەبىمەن ۇتتى. بۇل كەزدەسۋدە ات قۇلاعىندا ويناعان جىگىتتەرىمىز ازيا چەمپيونى اتاعىن جەڭىپ الۋ ءۇشىن بار كۇش-جىگەرىن جۇمساپ, ايلار بويى توككەن تەرىنىڭ جەمىسىن كوردى دەسە بولادى. وندا كوماندانىڭ باس جاتتىقتىرۋشىسى قۋانىشبەك قۇراماەۆ باستاعان ۇلتتىق قۇراما وزدەرىنىڭ ەپتىلىگىمەن, بۇلا كۇشىنىڭ مىقتىلىعىمەن جۇرتشىلىق الدىندا جانكۇيەرلەرىن جەرگە قاراتپاي, قارسىلاستارىنان باسىم ءتۇستى. كەزدەسۋدىڭ ءادىل, تازا وتكەنىن قىرعىز قۇراماسىنىڭ باس جاتتىقتىرۋشىسى دا مويىنداپ, الاڭنىڭ باس تورەشىسى مەن تورەشىلەرگە العىسىن ءبىلدىردى.
جالپى, ازيا چەمپيوناتىندا سايدىڭ تاسىنداي ىرىكتەلگەن جىگىتتەردىڭ ءبارى دە جارادى. ەگەر اتتارىن اتاپ وتەتىن بولساق, باقتىباي شىرىنقۇلوۆ, باعلان شىرىمباەۆ, قۇلاجان توعايباەۆ, داۋلەتبەك ومباەۆ, ەركەباي وماربەك, نۇرجىگىت مىرزاباەۆ, ارسلان قابجانوۆ, ەرمەك كوبەي, ماناربەك ءدۇيسەنبيەۆ, ۇلان بايتورەەۆ, تەمىرحان ايتباەۆ پەن الەكساندر پۋپەنكو دەگەن جىگىتتەرىمىز تاماشا ونەر كورسەتتى.
سونىمەن بىرگە, ويىندا جىگىتتەردىڭ مىنگەن تۇلپارلارىنىڭ دا ەلىمىزدىڭ ازيا چەمپيونى اتاعىن جەڭىپ الۋىنا ۇلەس قوسقانىن ايتپاي كەتۋگە بولماس. اسىرەسە, لازەر اتتى تۇلپاردىڭ اقىلدىلىعى مەن جىلدامدىعىنا قايران قالماسقا شاراڭ جوق. كەزدەسۋدە ءبىزدىڭ قۇرامانىڭ قازاندىققا سالعان سەركەلەرىنىڭ كوبىسى وسى باقتىباي شىرىنقۇلوۆ مىنگەن تۇلپاردىڭ كومەگىمەن بولدى. تۇلپار چەمپيونات سوڭىندا «ەر قاناتى» دەگەن نوميناتسياسىن يەلەنىپ, وزىنە لايىقتى قۇرمەتكە بولەندى.
بيىلعى چەمپيوناتقا باسقا كوماندالاردىڭ دا جاقسى دايىندىقپەن كەلگەندەرىن ايتقان بولاتىنبىز. ماسەلەن, فينالدا قازاقستان قۇراماسىمەن كەزدەسكەن قىرعىزستان كومانداسى بارلىق جاعىنان لايىقتى قارسىلاس ەكەنىن كورسەتتى. قازىر بۇل ەلدە كوكپارعا مەملەكەت تاراپىنان كوڭىل ءبولىنىپ, ۇلكەن قولداۋ كورسەتىلەدى ەكەن. بيىلعى كوكپار باسەكەسىنە دە قىرعىز قۇراماسى جاقسى دايىندىقپەن كەلىپتى. كەلگەندە, ازيا چەمپيوناتىنا ءبىزدىڭ قۇراماعا بىلدىرتپەي, ءبىز بىلمەيتىن جاڭا كوماندانى جاساقتاپ اكەلىپتى. سول جىگىتتەرىنىڭ ءبىرى – نۇرمۇحامەد قويشەكەەۆ چەمپيوناتتا «ۇزدىك سالىمشى» دەگەن اتاقتى يەلەندى.
فينالدا ولاردىڭ جىلدام, شاپشاڭ اتتارى ءبىزدىڭ ءبىراز اتتارىمىزدى ىلەستىرمەي كەتە جازدادى. قىرعىزدار كومانداسىنا فينالعا جولداما الىپ بەرگەن وسى تۇلپارلارى دەۋگە بولادى. دەگەنمەن, ءبىزدىڭ قۇرامانىڭ جىگىتتەرى فينالدا قىرعىزداردان بارلىق جاعىنان مىقتى ەكەندەرىن دالەلدەپ بەردى.
ازيا چەمپيوناتىندا تاجىكستان قۇراماسىنىڭ ونەرى دە كوپشىلىكتىڭ كوڭىلىنەن شىقتى. ولار قازاقستاننان جەڭىلگەنىمەن, رەسەي مەن موڭعوليا كوماندالارىن, ال ءۇشىنشى ورىن ءۇشىن وتكەن ويىندا قىتايدىڭ ىلە قازاق اۋدانىنىڭ كومانداسىن ۇتىپ, قولا جۇلدەگە يە بولدى. ال سەنبى كۇنى رەسەي وزبەكستان قۇراماسىن 9:2 ەسەبىمەن جەڭىپ, بەسىنشى ورىندى يەلەندى. جەتىنشى ورىن ءۇشىن كەزدەسۋدە موڭعوليانىڭ بايان-ولگەي قازاقتارى تۇركيا قۇراماسىن 9:4 ەسەبىمەن ۇتتى.
چەمپيوناتتىڭ جابىلۋ سالتاناتىندا ۇلتتىق سپورت تۇرلەرى قاۋىمداستىعىنىڭ پرەزيدەنتى, «كوكبورى» حالىقارالىق فەدەراتسياسىنىڭ باسشىسى قايرات ساتىبالدى كوكپاردان قازاقستان قۇراما كومانداسىنا باس جۇلدەنى تاپسىردى. قاۋىمداستىق پرەزيدەنتىنىڭ ورىنباسارى بەكبولات تىلەۋحان كەلەسى ازيا چەمپيوناتىنىڭ 2015 جىلى تۇركيانىڭ ىستامبۇل قالاسىندا وتەتىنىن حابارلادى.
داستان كەنجالين,
«ەگەمەن قازاقستان».