قازاقستان پرەزيدەنتى ءىس باسقارماسىنىڭ الماتىداعى مەديتسينالىق ورتالىعىندا رەسەي مەديتسينا اكادەمياسىنىڭ كوررەسپوندەنت-مۇشەسى, ەۋروپا گەرونتولوگيا جانە گەرياتريا قاۋىمداستىعىنىڭ پرەزيدەنتى, مەديتسينا عىلىمدارىنىڭ دوكتورى, پروفەسسور ۆلاديمير حاۆينسون تاجىريبە-ساعاتىن وتكىزىپ, ادام اعزاسىنىڭ تەز قارتايۋىنا اكەلەتىن جايتتار جايىندا كەڭىنەن اقپارات بەردى.
قازاقستان پرەزيدەنتى ءىس باسقارماسىنىڭ الماتىداعى مەديتسينالىق ورتالىعىندا رەسەي مەديتسينا اكادەمياسىنىڭ كوررەسپوندەنت-مۇشەسى, ەۋروپا گەرونتولوگيا جانە گەرياتريا قاۋىمداستىعىنىڭ پرەزيدەنتى, مەديتسينا عىلىمدارىنىڭ دوكتورى, پروفەسسور ۆلاديمير حاۆينسون تاجىريبە-ساعاتىن وتكىزىپ, ادام اعزاسىنىڭ تەز قارتايۋىنا اكەلەتىن جايتتار جايىندا كەڭىنەن اقپارات بەردى.
سوڭعى 10 جىلدا ەلىمىزدەگى انا ءولىمى 3 ەسە ازايىپ, سابيلەردىڭ شەتىنەۋى – 1,5 ەسە كەمىگەن. ال حالىقتىڭ ورتاشا ءومىر ءسۇرۋ جاسى 69-عا جەتكەن. مىنە, بۇل كورسەتكىشتەر قازاقستاندا ادام دامۋى ينديكاتورىنىڭ جەتىستىگىنە, حالىقتىڭ دەنساۋلىعىن قورعاۋ جۇيەسىنە قوسىلعان ۇلكەن ۇلەس. رەسەيدىڭ گەرونتولوگيا عىلىمى سالاسىنداعى كورنەكتى عالىمىنىڭ اتالمىش اۋرۋحاناعا كەلىپ تاجىريبە-ساعاتىن وتكىزۋىنىڭ وزىندىك سىرى بار. قازاقستان پرەزيدەنتى ءىس باسقارماسىنىڭ مەديتسينالىق ورتالىعىنىڭ باس دارىگەرى ءامىر احەتوۆتىڭ ايتۋىنشا, مۇندا مەديتسينا عىلىمدارىنىڭ دوكتورى, پروفەسسور ۆ.ۆ.بەنبەريننىڭ جەتەكشىلىك ەتۋىمەن قارتايۋدىڭ تىندىك, گۋمورالدىق, نۋتريتسيونالدىق جانە پاتوگەنەتيكالىق تەتىكتەرىنىڭ دامۋى, سونداي-اق, گەرياتريا سالاسىندا كلينيكالىق عىلىمي جۇمىستار جۇرگىزۋدە بۇرىنعى مەملەكەتتىك قىزمەتكەرلەرگە تۇراقتى مەديتسينالىق قىزمەت كورسەتەتىن ەمدەۋ ورنى نەگىزگى بازا بولىپ تابىلادى. سونىڭ ناتيجەسىندە ورتالىقتاعى مەديتسينالىق كىزمەت كورسەتەتىن كونتيگەنتتەردىڭ ورتاشا جاسى 80-گە جەتتى. مۇندا 90 جانە ودان دا جوعارى جاستاعى 158 ادام تىركەلگەن.
– عالىمدار ادەمى قارتايۋ مەن جاستىقتى ساقتاۋدىڭ جولدارىن, ادىستەرىن مىڭداعان جىلدار بويى ىزدەپ كەلەدى, – دەيدى پروفەسسور ۆلاديمير حاۆينسون. – دالىرەك ايتساق, بۇل عىلىمنىڭ, ونىڭ ىشىندە فۋندامەنتالدى عىلىمنىڭ ەنشىسىندە. قازىرگى كەزدە عالىمدار قارتايۋدىڭ ءارتۇرلى انىقتامالارىن تابۋدا. بىرەۋلەرى قارتايۋدى جاسۋشالىق زاتتىڭ فيزيكو-حيميالىق قۇرىلىم ءوزگەرىسى دەسە, وزگەلەردىڭ ويىنشا, قارتايۋ ىشكى جانە سىرتقى ورتادان قورعانۋدىڭ, فيزيولوگيانىڭ تومەندەۋى دەيدى. بىراق, قالاي دەسەك تە, قارتايۋ – تابيعي قۇبىلىس.
پروفەسسور گەرونتولوگيا مەن گەرياتريا بويىنشا كورەيادا وتكەن سوڭعى دۇنيەجۇزىلىك كونگرەسكە ءجۇز مەملەكەتتەن بەس مىڭ دەلەگات قاتىسقانىن, ولار ارقايسىسى ءوز جەتىستىكتەرىن ورتاعا سالعانىن ايتتى. سونداعى تۇيگەنىمىز دەيدى ول, قارتايۋدىڭ نەگىزگى ەمى – ءدارى-دارمەك ەمەس, سالاماتتى ءومىر ءسۇرۋ سالتى مەن مادەنيەتتىلىكتىڭ, اعارتۋ ءىسى مەن تاربيەنىڭ دەڭگەيىنە بايلانىستى ەكەن.
تاجىريبە ساعاتى بارىسىندا پروفەسسور قازاقستاندا جوعارى تەحنولوگيالىق مەديتسينا سالاسى قارقىندى دامىپ كەلە جاتقانىن ءارى دارىگەرلەردىڭ بىلىكتىلىگى ارتقانىن, بۇل ماسەلەگە پرەزيدەنت ن.نازارباەۆتىڭ ەرەكشە كوڭىل ءبولىپ, قولداۋ كورسەتىپ وتىرعانىن اتاپ كورسەتتى.
– ارينە, رەسەي مەن ۋكراينادا گەرونتولوگيا جانە گەرياتريا ينستيتۋتتارى, كافەدرالارى بار, بىراق قازاقستان تمد ەلدەرى بويىنشا وسى سالاعا ۇلكەن كوڭىل ءبولىپ وتىرعان ءۇشىنشى مەملەكەت. ەندەشە, بۇل ماسەلەنىڭ كۇردەلىلىگىن, بولاشاعىن ءتۇسىنىپ, ونى قولعا الىپ وتىرعان قر پرەزيدەنتى ءىس باسقارماسىنىڭ مەديتسينالىق ورتالىعى مەن وعان جەتەكشىلىك ەتۋشى پروفەسسور ۆ.ۆ.بەنبەريننىڭ جاڭا تەحنولوگيانى, جاڭا ءبىلىمدى قازاقستانعا اكەلۋدى ويلاستىرىپ, وسىنشاما جۇمىس اتقارىپ جاتقانى, ارينە, وتە قۇپتارلىق ءارى قۋانارلىق جايت, – دەدى ول.
گۇلزەينەپ سادىرقىزى,
«ەگەمەن قازاقستان».