مەملەكەت باسشىسى قاسىم-جومارت توقاەۆتىڭ مالىمدەمەسىندە كاسىپكەرلىك سەكتوردى قولداۋعا باعىتتالعان بىرقاتار مىندەتتەر بەلگىلەنگەن. پرەزيدەنت سالىقتىق جەڭىلدىكتەر, نەسيەلەر بويىنشا تولەمدەردى كەيىنگە شەگەرۋ, تەكسەرۋلەرگە تىيىم سالۋ ماسەلەلەلرىمەن قاتار, ساپالى جۇمىسپەن قامتۋ, اگروونەركاسىپتىك كەشەندى ۇزدىكسىز قامتاماسىز ەتۋ, شاعىن جانە ورتا بيزنەستى نەسيەلەۋدى ارتتىرۋ قاجەتتىلىگىن ەرەكشە اتاپ ءوتتى. بۇل تۋرالى اۋىل شارۋاشىلىعى قارجىلاي قولداۋ قورىنىڭ ءباسپاسوز قىزمەتى حابارلادى.
شاعىن جانە ورتا بيزنەستىڭ وزەكتى ماسەلەلەرىن شەشۋ ەرەكشە نازار اۋدارۋدى تالاپ ەتەدى. مىسالى, اۋىلداعى ازاماتتاردىڭ جەڭىلدەتىلگەن نەسيە الاتىن كەزدە كەپىلدىككە قوياتىن مۇلكى جەتپەي جاتاتىن جاعدايلار كەزدەسەدى. ونىڭ دا شەشىمى بار. مىسالى, اۋىل شارۋاشىلىعىن قارجىلاي قولداۋ قورىندا «ەڭبەك» باعدارلاماسىنا قاتىسۋشىلاردى قولداۋعا ارنالعان كەپىلدەمە بەرۋ قۇرالى بار. سونى پايدالانۋعا بولادى.
قور 2019-جىلدىڭ قىركۇيەك ايىنان بەرى اۋىلدارداعى, شاعىن قالالارداعى ءوزىنىڭ جەكە بيزنەسىن اشقىسى كەلەتىن نەمەسە جۇمىس ىستەپ تۇرعان بيزنەسىن كەڭەيتكىسى كەلەتىن كاسىپكەرلەردىڭ نەسيەلەرىن كەپىلدەندىرۋ جۇمىسىن اتقارىپ كەلەدى. قور كاسىپكەرلەر ءۇشىن «ەڭبەك» باعدارلاماسى بويىنشا نەسيە بەرەتىن ميكروقارجى ۇيىمدارى مەن نەسيە سەرىكتەستىكتەرى الدىندا كەپىل بولادى.
ناقتى ايتقاندا, وسى نەسيە سەرىكتەستەرىنەن نەمەسە ميكروقارجى ۇيىمدارىنان نەسيە راسىمدەيتىن ازاماتتاردىڭ نەسيەسى كەپىلدەندىرىلەدى. مىسالى, كاسىبىن جاڭا باستاعانداردىڭ الاتىن نەسيەنىڭ 85%-نە دەيىن, جۇمىس ىستەپ تۇرعان بيزنەستى كەڭەيتۋگە العان نەسيەنىڭ 50%-نە دەيىن كەپىلدەندىرەدى. ال, كوپ بالالى وتباسىلار مەن از قامتىلعان وتباسىلار الاتىن نەسيەنىڭ 95 %-نە دەيىن كەپىلدەمە بەرىلەدى. بۇل شاعىن قالالار مەن شالعاي اۋىلدارداعى ازاماتتار ءۇشىن ۇلكەن كومەك.
ماسەلەن, الماتى وبلىسىنداعى جامبىل اۋدانىنىڭ تۇرعىنى دەمەۋ كۇلبالاەۆ مەملەكەت تاراپىنان كورسەتىلىپ وتىرعان وسى باعدارلامانىڭ كومەگىنە جۇگىنگەن بولاتىن.
2019 جىلدىڭ سوڭىندا «ىسكەر» باعدارلاماسى بويىنشا 6 ملن تەڭگە نەسيە راسىمدەۋى ءۇشىن دەمەۋ قازيحان ۇلىنا 4 ملن 785 مىڭ تەڭگە مولشەرىندە كەپىلدەمە قاجەت بولدى. «اۋىل شارۋاشىلىعىن قارجىلاي قولداۋ قورى» اق جوبانى زەردەلەپ, 4 785 مىڭ تەڭگەنىڭ كەپىلدەمەسىن بەردى. وسىلايشا, 6 ملن تەڭگە نەسيەگە قول جەتكىزگەن كاسىپكەر 208 باس قوي مەن مال ازىعىن ساتىپ الدى. الداعى ۋاقىتتا دەمەۋ قازيحان ۇلى مال باسىن كوبەيتىپ, شارۋاشىلىعىن كەڭەيتە ءتۇسۋدى جوسپارلاپ وتىر.
جالپى, «ەڭبەك» باعدارلاماسى اياسىندا ءۇش جىلدا 3 ملرد 675 ملن تەڭگەنىڭ كەپىلدەمەسى بەرىلدى. وسىنىڭ ناتيجەسىندە 1 112 كاسىپكەر جەڭىلدەتىلگەن نەسيەگە قول جەتكىزىپ, كاسىپتەرىن ودان ءارى دامىتۋدا. وسى باعدارلامانىڭ اياسىندا نەسيەنى كەپىلدەندىرۋ جۇمىستارى جالعاسادى. تولىعىراق اقپارات الۋ ءۇشىن وبلىس ورتالىقتارىنداعى, نۇر-سۇلتان, الماتى جانە شىمكەنت قالالارىنداعى قوردىڭ فيليالىنا حابارلاسۋعا بولادى.