قالا كۇنى قارساڭىندا الماتىداعى بالالارعا ارنالعان جەدەل جاردەم ورتالىعى رەسپۋبليكادا تەڭدەسى جوق زاماناۋي ۇلگىدە سالىنعان دۇنيەجۇزىلىك ستاندارتقا ساي جاڭا عيماراتقا كوشتى.
قالا كۇنى قارساڭىندا الماتىداعى بالالارعا ارنالعان جەدەل جاردەم ورتالىعى رەسپۋبليكادا تەڭدەسى جوق زاماناۋي ۇلگىدە سالىنعان دۇنيەجۇزىلىك ستاندارتقا ساي جاڭا عيماراتقا كوشتى.
وندا نەگىزىنەن قالانىڭ بالالارىنا تراۆماتولوگيا, كوپسالالى حيرۋرگيالىق كومەك كورسەتىلۋمەن قاتار, بۇگىنگى زامان تالابىنا ساي جانساقتاۋ جانە ينتەنسيۆتى تەراپيا, سونداي-اق, 3 وپەراتسيالىق بلوك ورنالاسقان. ونىڭ قۇرىلىسىنا 600 ملن., سوڭعى ۇلگىدەگى مەديتسينالىق قۇرىلعىلارمەن جاراقتاندىرۋعا 600 ملن. تەڭگەدەن استام قارجى جۇمسالىپتى.
– الماتى قالاسىندا بالالاردىڭ دەنساۋلىعىن ساقتاۋدا كوپتەگەن شارالار اتقارىلۋدا. بۇگىنگى اشىلىپ وتىرعان ورتالىق سونىڭ ءبىر پاراسى, – دەدى سالتاناتتى جيىندا الماتى قالاسى اكىمىنىڭ ورىنباسارى زاۋرەش امانجولوۆا. – ايتا كەتۋ كەرەك, قۇرىلىس جۇمىستارىن ءبىراز سوزىڭقىراپ الدىق. ونىڭ سەبەبى, حيرۋرگيالىق كورپۋس بولعاندىقتان, ەرەكشە كوزقاراس, ەرەكشە تالاپتى قاجەت ەتەدى.
زاۋرەش جۇمانالىقىزى وسى ۋاقىتقا دەيىن تار جەردە قىسىلىپ-قىمتىرىلا ءجۇرىپ بالالاردىڭ ومىرىنە اراشا تۇرعان دارىگەرلەردىڭ ەڭبەگىن اتاپ وتە كەلە, ەمدەۋ ورنىنىڭ بۇگىنگى زامان تالابىنا ساي بولۋى, جاعدايدىڭ جاقسارۋى – ول, ەڭ الدىمەن, بالالارعا جاسالعان قامقورلىق ەكەنىنە, ەكىنشىدەن, كۇندىز-ءتۇنى قولدارىنان قانداۋىر تۇسپەيتىن حيرۋرگتەرگە جاسالعان قولداۋ ەكەنىنە ءارى تەك الماتى قالاسى ءۇشىن ەمەس, بۇكىل رەسپۋبليكادا ماڭىزى زور ەكەنىنە توقتالا كەتتى.
شىنىندا, بۇل ورتالىق پەدياتريا قىزمەتىنىڭ, ونىڭ ىشىندە بالالار حيرۋرگياسىنىڭ ۇستاحاناسى بولىپ سانالادى. وسى ورتالىقتا جارتى عاسىرعا جۋىق بالالار حيرۋرگياسىنىڭ اتاسى, اكادەميك كامال ورمانتاەۆ اعامىز ەڭبەك ەتىپ, قانشاما بۋىن بالالار حيرۋرگتەرىن دايىندادى. جيىنعا قاتىسۋشىلار ورتالىقتىڭ سالتاناتتى اشىلۋى بارشالارىنىڭ سۇيىكتى دارىگەرى, وتاندىق مەديتسيناعا, ونىڭ ىشىندە بالالار حيرۋرگياسىنا ولشەۋسىز ۇلەس قوسقان اكادەميك كامال ورمانتاەۆتىڭ تۋعان كۇنىمەن سايكەس كەلۋى تەگىن ەمەستىگىن اتاپ وتسە, الماتى قالاسى اكىمدىگى اقساقالىمىزعا قۇرمەت كورسەتىپ, يىعىنا شاپان جاپتى.
– وسىدان 15 جىل بۇرىن پرەزيدەنت اكىمشىلىگىنە بارىپ, اۋرۋحانا اۋماعىنداعى بوس جەرگە 150 ورىندىق قوسىمشا عيمارات سالۋ كەرەكتىگىن ايتىپ ءوتىنىش بىلدىرگەن ەدىم, – دەپ قۋانىشىمەن ءبولىستى كامال ءسارۋار ۇلى. – «ەشتەن كەش جاقسى» دەگەن, اركىمدە بالا, نەمەرە بار. اسىرەسە, انالار شىرىلداعان بالالارىن قۇشاقتاپ كەلىپ, كۇندىز-ءتۇنى اۋرۋحانا جاعالاپ جۇرگەندە جۇرەگىڭ اۋىرىپ, قولىمىزدان كەلگەن كومەگىمىزدى ايامايمىز. ونىڭ ۇستىنە وسى اۋرۋحانا 1965 جىلى اشىلعاندا اسسيسەنت بولىپ كەلسەم, ەندى اكادەميك دارەجەسىنە دەيىن جەتتىم. كوپتەگەن باس دارىگەرلەر قولىنان كەلگەنىنشە ەڭبەك ەتتى. بالالار اۋرۋىنىڭ جاڭا تۋعان نارەستەدەن باستاپ ەرەكشەلىگى وتە كوپ. سوندىقتان, مۇندا سان ەمەس, ساپاعا جۇمىس ىستەۋىمىز كەرەك. مرت, انگيوگراف, ت.ب. اپپاراتتار الىنىپتى, بۇل دەگەن كەرەمەت قوي.
100 توسەك-ورىنعا ەسەپتەلىپ سالىنعان ەمدەۋ ورنى جاڭا تۋعان نارەستەدەن باستاپ 15 جاسقا دەيىنگى جاسوسىرىمدەرگە مەديتسينالىق قىزمەت كورسەتەدى. كەز كەلگەن حيرۋرگتىڭ ارمانى بولاتىنداي 3 وپەراتسيالىق بلوك سوڭعى مەديتسينالىق تەحنيكالار مەن قازىرگى زامانعى تەحنولوگيالارمەن جاراقتانعان. جەكە ناركوز بولمەسى, نەيروحيرۋرگيالىق وتا جاسايتىن ميكروسكوپ, ەندوۆيەوحيرۋرگيالىق جانە نەيروحيرۋرگيالىق باعانالار, وتا كەزىندە زەرتتەۋگە ارنالعان رەنتگەن قوندىرعىسى, ت.ب. ورناتىلعان. اسىرەسە, وتادان كەيىنگى جانساقتاۋ بولىمىندەگى پالاتالار كەڭ, جارىق. وندا ناۋقاس بالاعا بارلىق جاعداي جاسالعان. شالا تۋعان, سالماعى كەم بالالار جاتاتىن بەسىكتەر (كيۋبەز) بار.
ورتالىق جوعارى دارەجەلى ماماندارمەن تولىق قامتىلعان. وندا دارىگەرلىك 28 باعىتتاعى ماماندار مەديتسينالىق كومەك كورسەتسە, ولاردىڭ 6-ۋى مەديتسينا عىلىمدارىنىڭ كانديداتى, 51-ءى جوعارى جانە ءبىرىنشى ساناتتاعى دارىگەر. ەڭ باستىسى, مۇندا الماتى مەملەكەتتىك دارىگەرلەردىڭ ءبىلىمىن جەتىلدىرۋ ينستيتۋتى مەن س.اسفەندياروۆ اتىنداعى قازاق ۇمۋ-ىنىڭ بالالار حيرۋرگياسى كافەدرالارىنىڭ بازاسى ورنالاسقان. اۋرۋحانانىڭ باستى ەرەكشەلىگى – تاۋلىك بويى ناۋقاس بالاعا جەدەل ءارى ساپالى كومەك كورسەتەدى.
گۇلزەينەپ سادىرقىزى,
«ەگەمەن قازاقستان».
الماتى.