كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە رەسمي وكىل التاي ابيبۋللاەۆ جۋرناليستەر قاۋىمىنا ءداستۇرلى بريفينگ وتكىزىپ, اپتا ىشىندە بولاتىن ماڭىزدى وقيعالار جەلىسىن بايانداپ بەردى.
رەسمي وكىل 20 قىركۇيەكتە اقوردادا مەملەكەتتىك حاتشى مارات ءتاجيننىڭ توراعالىعىمەن قازاقستان حالقى اسسامبلەياسىنىڭ عىلىمي-ساراپتامالىق كەڭەسىنىڭ كەڭەيتىلگەن وتىرىسى وتەتىنىن جەتكىزدى.
كەشە قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە رەسمي وكىل التاي ابيبۋللاەۆ جۋرناليستەر قاۋىمىنا ءداستۇرلى بريفينگ وتكىزىپ, اپتا ىشىندە بولاتىن ماڭىزدى وقيعالار جەلىسىن بايانداپ بەردى.
رەسمي وكىل 20 قىركۇيەكتە اقوردادا مەملەكەتتىك حاتشى مارات ءتاجيننىڭ توراعالىعىمەن قازاقستان حالقى اسسامبلەياسىنىڭ عىلىمي-ساراپتامالىق كەڭەسىنىڭ كەڭەيتىلگەن وتىرىسى وتەتىنىن جەتكىزدى. «ونىڭ باستى مىندەتى – قازاقستاننىڭ 2050 جىلعا دەيىنگى دامۋ ستراتەگياسىنا سايكەس, ۇلتتىق-مەملەكەتتىك بىرلىكتىڭ, قحا-نىڭ ۇلتتىق تاريحتى زەردەلەۋ جونىندەگى مىندەتتەرىنىڭ, ءتىل ساياساتىنىڭ, ەلىمىزدىڭ بارلىق وڭىرلەرىندەگى عىلىمي-ساراپتامالىق جۇمىستاردىڭ نەگىزى رەتىندەگى ەتنوساياساتتى عىلىمي تالداۋمەن قامتاماسىز ەتۋدى ۇيىمداستىرۋدىڭ, تاريحي سانا-سەزىمدى قالىپتاستىرۋدىڭ ماڭىزدى اسپەكتىلەرىنە قوزعاۋ سالۋ جوسپارلانۋدا.
سونىمەن قاتار, ۇكىمەت باعىتى بويىنشا دا بىرقاتار ماڭىزدى ءىس-شارالار اتقارىلادى. ەستەرىڭىزدە بولسا, ۇكىمەت قازاقستان ەلورداسى – استانادا ەكسپو-2017 حالىقارالىق مامانداندىرىلعان كورمەنى ساپالى ءارى جوعارى دەڭگەيدە وتكىزۋگە بارىنشا اتسالىسىپ كەلەدى. حالىقارالىق كورمەلەر بيۋروسىنىڭ باس حاتشىسى ۆ. لوسسەرتالەس تامىز ايىنىڭ باسىندا ەلىمىزگە جۇمىس ساپارىمەن كەلگەن بولاتىن. سول ساپار بارىسىندا ول ۇكىمەت باسشىسى سەرىك احمەتوۆتى پاريجگە جۇمىس ساپارىمەن شاقىرعان ەدى. وسى اپتادا, ياعني 19-20 قىركۇيەكتە سەرىك احمەتوۆ پاريجگە جۇمىس ساپارىمەن باراتىن بولادى», دەدى وكق رەسمي وكىلى ا.ابيبۋللاەۆ.
بۇدان كەيىنگى كەزەكتە ءسوز تىزگىنىن بريفينگكە ارنايى شاقىرىلعان قازاقستان پارلامەنتى سەناتى ءباسپاسوز قىزمەتىنىڭ جەتەكشىسى تالعات جۇماعۇلوۆ الدى. ول الەمدىك جانە ءداستۇرلى دىندەر كوشباسشىلارى سەزىنىڭ مەرەيتويى اياسىندا ەلوردادا وتەتىن شارالار جايىندا ايتىپ بەردى. «الەمدىك جانە ءداستۇرلى دىندەر كوشباسشىلارى سەزىنىڭ مەرەيتويى اياسىنداعى نەگىزگى شارالار 25 قىركۇيەكتە استاناداعى تاۋەلسىزدىك سارايىندا وتەدى. كۇننىڭ ءبىرىنشى جارتىسىندا سەزد حاتشىلىعىنىڭ ءحىى وتىرىسى بولىپ, كەيىننەن «وركەنيەتتەر ۇنقاتىسۋىنداعى استانا دىنارالىق فورۋمىنىڭ ءرولى» حالىقارالىق عىلىمي-تاجىريبەلىك كونفەرەنتسياسىمەن جالعاسادى. سەزدىڭ جۇمىس ورگانى بولىپ تابىلاتىن حاتشىلىقتىڭ XII وتىرىسى بارىسىندا قاتىسۋشىلار الەمدىك جانە ءداستۇرلى دىندەر كوشباسشىلارى IV سەزىنىڭ قورىتىندىلارى بويىنشا پىكىر الماسادى. حاتشىلىق مۇشەلەرى, سونداي-اق, 2015 جىلعا جوسپارلانىپ وتىرعان V سەزدىڭ مازمۇندىق جانە ۇيىمداستىرۋ ماسەلەلەرى تۋرالى پىكىر الماساتىن بولادى. وتىرىسقا حاتشىلىق باسشىسى – قازاقستان رەسپۋبليكاسى پارلامەنتى سەناتىنىڭ توراعاسى قايرات ءمامي توراعالىق ەتەدى», دەدى ت.جۇماعۇلوۆ. سونداي-اق, سەناتتىڭ ءباسپاسوز حاتشىسى 23 قىركۇيەك كۇنى بەيبىتشىلىك جانە كەلىسىم سارايىندا «دىنتۇتقا» كىتابىنىڭ تۇساۋكەسەرى بولاتىنىن, بۇل كىتاپتا 2003-2013 جىلدارى دىنارالىق ۇنقاتىسۋ ماسەلەلەرىنە ارنالعان ماقالالار, تالداۋ ماتەريالدارى جانە سۇحباتتار توپتاستىرىلعانىن اتاپ ءوتتى.
بريفينگكە مەملەكەتتىك قىزمەت ىستەرى جونىندەگى اگەنتتىكتىڭ توراعاسى ءاليحان بايمەنوۆ تە قاتىسىپ, مەملەكەتتىك قىزمەت تۋرالى جاڭا زاڭنىڭ ورىندالۋ بارىسىنا, قازاقستاندىق مەملەكەتتىك قىزمەتتىڭ جاڭا مودەلى مەن دامۋ كەلەشەگىنە توقتالىپ ءوتتى. «2011 جىلى شىلدەدە ەلباسى بەكىتكەن تۇجىرىمداماعا سايكەس, قازىرگى ۋاقىتتا قازاقستاندىق مەملەكەتتىك قىزمەتتىڭ جاڭا مودەلى قالىپتاستىرىلدى. جاڭا مودەل قۇرۋ ۇزدىك حالىقارالىق تاجىريبەنى ەسەپكە الا وتىرىپ جۇزەگە اسىرىلدى, بۇل رەتتە ول شەتەلدىك مودەلدەردىڭ كوشىرمەسى بولىپ تابىلمايدى. حالىقارالىق ساراپشىلار قازاقستانداعى جۇرگىزىلگەن مەملەكەتتىك قىزمەت رەفورماسىن جوعارى باعالادى. «ا» باسقارۋشىلىق كورپۋسىن قۇرۋ جانە ساياسي لاۋازىمدار سانىن 8 ەسەگە قىسقارتۋدى ساراپشىلار كاسىبيلەندىرۋ مەن مەريتوكراتيانى كۇشەيتۋ بويىنشا ماڭىزدى قادام, سونداي-اق, تابىستىڭ باستى فاكتورى – مەملەكەت باسشىسىنىڭ ساياسي كۇش-جىگەرى دەپ سانايدى», دەدى ءا.بايمەنوۆ.
وسىلاي دەي كەلە, ءا.بايمەنوۆ مەملەكەتتىك قىزمەت سالاسىنداعى نەگىزگى جاڭاشىلدىققا توقتالىپ ءوتتى. «العاش رەت زاڭنامامەن مەملەكەتتىك ورگانداردا كونكۋرستار جۇرگىزۋ كەزىندە باقىلاۋشىلار ينستيتۋتى ەنگىزىلدى. باقىلاۋشىلار كونكۋرستىق كوميسسيانىڭ جۇمىسىمەن تانىسادى جانە ونىڭ جۇمىسى تۋرالى ءوز پىكىرىن ايتا الادى. ەكىنشىدەن, تەستىلەۋ ازاماتتاردىڭ ءوتىنىشى بويىنشا مە ملەكەتتىك ورگاندارداعى كونكۋرستارعا بايلانىسسىز جۇرگىزىلەدى. تەستىلەۋدەن وڭ ناتيجەمەن وتكەن جاعدايدا, ازاماتتارعا ىرىكتەۋگە قاتىسۋ قۇقىعىن بەرەتىن سەرتيفيكات بەرىلەدى. مەملەكەتتىك ورگانداردىڭ كونكۋرستىق راسىمدەردى وتكىزۋ ۋاقىتى 3 ەسە قىسقارتىلدى», دەدى ءا.بايمەنوۆ بۇل ورايدا. ونىڭ ايتۋىنشا, تەستىلەۋ راسىمدەرىن تەحنيكالىق قورعاۋ جۇيەسى كۇشەيتىلىپ, تەستىلەۋ باعدارلامالارى كۇردەلەندىرىلگەن. ماسەلەن, 2013 جىلدىڭ ەكىنشى توقسانىندا تەستىلەۋ بويىنشا باستاپقى بالل جيناعان ۇمىتكەرلەر ۇلەسى 2012 جىلعى 66,0%-عا قاراعاندا 58%-دى قۇراعان ەكەن.
«سونىمەن قاتار, زاڭنامالىق دەڭگەيدە مەملەكەتتىك ورگاننىڭ ءبىرىنشى باسشىسى اۋىسقان كەزدە كادرلاردىڭ «كوماندالىق اۋىسۋىن» ازايتۋ ءۇشىن اۋىسۋ تارتىبىندە تاعايىنداۋعا ارنالعان مۇمكىندىكتەر قىسقارتىلدى. ولار تەك قانا مەملەكەتتىك ورگاندار ىشىندە, سونداي-اق, پرەزيدەنت بەلگىلەگەن جاعدايلاردا عانا جۇزەگە اسىرىلادى. قالعان بارلىق تاعايىنداۋ تەك كونكۋرستىق نەگىزدە عانا جۇزەگە اسىرىلادى», دەدى ءوز سوزىندە ول.
ءلايلا ەدلىلقىزى,
«ەگەمەن قازاقستان».