اقمولا وبلىسىندا 6 مىڭنان استام تۇرعىن كوروناۆيرۋس ينفەكتسياسىنا تەست تاپسىرعان. بۇل تۋرالى وڭىرلىك جەدەل ارەكەت ەتۋ شتابىنىڭ وتىرىسىندا ءمالىم بولدى.
وڭىردە كارانتين تالاپتارىن ساقتاۋ بويىنشا جاعداي تۇراقتى. وبلىس اكىمى ەرمەك مارجىقپاەۆ اۋىل شارۋاشىلىعى, شاعىن جانە ورتا بيزنەس سالالارى بويىنشا كاسىپكەرلىكتى قولداۋ تەتىكتەرىنە توقتالىپ, الەۋمەتتىك ماڭىزى بار ساۋالداردى تالقىعا سالدى. اقمولا وبلىسىندا كارانتين رەجيمى 31 ناۋرىز كۇنى ەنگىزىلگەن ەدى. ءساۋىردىڭ 8-ءى مەن 12-ءسى ارالىعىندا قوسىمشا شەكتەۋ شارالارى قولدانىلدى. بۇل ىندەتتىڭ تارالۋىن تەجەۋگە ىقپال ەتىپ وتىر. قازىرگى تاڭدا وبلىس اۋماعىنداعى جاعداي تۇراقتالىپ, اۋرۋ جۇقتىرعانداردىڭ ءوسۋ كورسەتكىشى 1,2 پروتسەنتتى قۇراعان.
– بۇگىنگى تاڭدا 726 ادام مەديتسينا ماماندارىنىڭ باقىلاۋىندا. ونىڭ ىشىندە اۋرۋحاناعا جاتقىزىلعانى 406 ادام. ءۇي كارانتينىندە 524 ادام. كوروناۆيرۋس ينفەكتسياسىنىڭ راستالعان جاعدايى 93 ادام. ەمدەلىپ شىققاندار 20, 36 ادام شىعۋعا دايىندالۋدا. ونىڭ ىشىندە 22 ادام 65 جاستان اسقاندار,–دەدى اقمولا وبلىسىنىڭ اكىمى ەرمەك مارجىقپاەۆ,–ەڭ باستىسى, ادامدار كارانتين تالاپتارىن بۇلجىتپاي ورىنداۋى كەرەك.
ءوڭىر باسشىلىعى كوكتەمگى ەگىس ناۋقانى ءۇشىن ءتيىستى قولداۋ شارالارىن قولعا الىپ وتىر. سونداي-اق, ساياجايلارى بار قالا تۇرعىندارىنىڭ وتىنىمدەرى دە تالقىلانۋ ۇستىندە.
–تاياۋدا وبلىسقا مينسكتەن 40 ادام كەلدى. ولار ەكى كۇن بويى تەكسەرۋدەن ءوتىپ, تەست تاپسىردى. بۇل ازاماتتار بۋراباي اۋماعىنداعى ساناتوريلەرگە ورنالاستىرىلعان بولاتىن. ءتيىستى جاتىن ورىن مەن تاماقتانۋىن قامتاماسىز ەتتىك. تەست قورىتىندىسى تەرىس, ياعني اۋرۋ جۇقتىرعاندار انىقتالعان جوق. سونىمەن قاتار, ءساۋىردىڭ 22-سىنەن 23-ىنە قاراعان تۇندە ومبى قالاسىنان 80 ستۋدەنتىمىز كەلدى. ولار دا ءتيىستى تەست تاپسىرىپ, كارانتينگە الىندى. جۋىق ارادا سىنامالاردىڭ ناتيجەسى بەلگىلى بولادى,– دەيدى وبلىس اكىمىنىڭ ورىنباسارى اينا ءمىسىرالىموۆا.
قازىرگى تاڭدا كوكشەتاۋداعى «وليمپ» دياگنوستيكالىق كلينيكاسىندا 3 مىڭ تەست بار. ودان بولەك وبلىستىق مەديتسينالىق مەكەمەلەر تاعى 7 مىڭ تەستپەن جابدىقتالعان. تسەلينوگراد اۋدانىنا قوسىمشا 5000 جىلدام تەست جونەلتىلەدى. توتەنشە جاعداي رەجيمى باستالعالى 6 مىڭنان استام اقمولالىق كوروناۆيرۋسقا تەست تاپسىرعان. ولار نەگىزىنەن قاۋىپتى ايماقتا قىزمەت ەتىپ جۇرگەن كۇش قۇرىلىمدارى مەن مەديتسينا ماماندارى.
كوكشەتاۋ قالاسى