اقمولا وبلىسىنىڭ اكىمى ەرمەك مارجىقپاەۆتىڭ توراعالىعىمەن وتكەن وتىرىستا قازاقستان مەن رەسەيدىڭ ءحVىى وڭىرارالىق ىنتىماقتاستىق فورۋمىنا دايىندىق جۇمىستارى پىسىقتالدى.
وتىرىستا كوكشەتاۋ قالاسىنىڭ اكىمى امانگەلدى سمايىلوۆ قالادا جۇرگىزىلىپ جاتقان جۇمىستار بويىنشا ەسەپ بەرىپ, سالىنىپ جاتقان «بولاشاق» سارايىمەن باسقا دا قۇرىلىستار, ينفراقۇرىلىمدىق نىساندارعا توقتالدى. دەگەنمەن, ءوڭىر باسشىسى اتقارىلىپ جاتقان بۇل جۇمىستارعا كوڭىلى تولمايتىندىعىن ايتىپ, فورۋمعا دەيىن بارلىق قولعا الىنعان جوبالار دەر كەزىندە ورىندالىپ, ىسكە قوسىلۋ كەرەكتىگىن قاتاڭ تاپسىردى.
–«بولاشاق» سارايى – فورۋمعا دايىندىق بارىسىنداعى ەڭ باستى نىسان. ونىڭ قۇرىلىسى مەن ىشكى بەزەندىرىلۋى, سالىنۋ ساپاسى, ماڭايىنىڭ كوز تارتارلىقتاي كورىكتى بولۋى بارىنەن ماڭىزدى. سوندىقتان, ىشىندەگى قويىلاتىن جيھازدار مەن ورناتىلاتىن قۇرىلعىلارىنىڭ اربىرەۋىنە جەتە ءمان بەرىلۋى قاجەت. سونىمەن بىرگە, فورۋم اياسىنداعى نىساندار بويىنشا نۇر-سۇلتان جانە باسقا دا ايماقتاردان جۇمىس ىستەۋگە كەلەتىن جۇمىسشىلاردىڭ قازىرگىدەي توتەنشە جاعداي كەزىندە ويداعىداي قاتىناۋ ماسەلەسىن دە دۇرىس قاراستىرىڭىزدار,–دەي كەلە, وبلىس باسشىسى ءوزىنىڭ ورىنباسارلارىنا وسى جونىندە تاپسىرمالار بەردى.
سونداي-اق بۇل جيىندا ءوڭىر باسشىسى قالا اكىمىنە جانە ءوز ورىنباسارلارىنا كوكشەتاۋ قالاسىنىڭ جولدارىن, سونىڭ ىشىندە نازارباەۆ داڭعىلى بويىنداعى جولداردى جاڭارتۋ, تۇرعىن ءۇي قۇرىلىسى, قوپا كولىنىڭ اۋماعىن كوركەيتۋ, قالا ىشىمەن وتەتىن قىلشاقتى وزەنىنىڭ ماڭىن تازارتۋ مەن اباتتاندىرۋ سەكىلدى جۇمىستاردى دا ناقتى ۋاقىتىندا اياقتاۋدى تاپسىردى. فورۋمعا قاتىسۋشىلاردىڭ جيىن كەزىندە ۋاقىتشا تۇرۋىنا ارنايى سالىنىپ جاتقان نازارباەۆ داڭعىلىنداعى كوپقاباتتى ۇيلەر بويىنشا تۋىنداعان زاڭدىق تۇرعىداعى ماسەلەلەردى دە تەزدەتىپ شەشۋگە تاپسىرما بەردى.
ەكى ەل اراسىنداعى ىنتىماقتاستىق فورۋمى كەزىندە وعان قاتىسۋشىلار مەن قالا قوناقتارىن ابىرويمەن قارسى الىپ, شىعارىپ سالۋ ءۇشىن بەلگىلەنگەن جۇمىستاردىڭ قانشالىقتى ماڭىزدى ەكەنىن وسىعان جاۋاپتى تۇلعالار سانالى تۇردە بارىنشا ۇعىنىپ, كوزدەلگەن بارلىق نىسانداردى ساپالى ءارى ۋاقىتىندا ىسكە قوسۋلارى قاجەتتىگىن قاتاڭ ەسكەرتتى.