اقمولادا اتقارىلىپ جاتقان جۇمىس كوپ

2017 جىلى ماكينكا اۋىلىنداعى دارىگەرلىك امبۋلاتوريا عيماراتىنا  كۇردەلى جوندەۋ جۇرگىزىلگەن. جوندەۋ جۇمىسىنا وبلىستىق بيۋدجەتتەن 61 ميلليون تەڭگە قاراجات جۇمسالعان. قازىر مۇندا 18 مەديتسينا قىزمەتكەرى جۇمىس ىستەيدى. دەنساۋلىق ساقتاۋ  مەكەمەسى 3 مىڭنان استام ادامعا قىزمەت كورسەتەدى.

–بىزگە كەلگەن  ناۋقاستاردى ءار توپقا بولەتىن بەكەت بار. سونداي-اق, كوروناۆيرۋستىق ينفەكتسياعا تالداۋ جۇمىستارىن جۇرگىزەمىز, ءارى قاراي وسى تالداۋ ۇلگىلەرىن كوكشەتاۋداعى ۆيرۋسولوگيالىق زەرتحاناعا  جىبەرەمىز,–دەيدى ءبىرجان سال اۋداندىق اۋرۋحاناسى باس دارىگەرىنىڭ مىندەتىن اتقارۋشى مارات دوسەتوۆ.

بۇدان كەيىن وبلىس اكىمى ەرمەك مارجىقپاەۆ ماكينكا اۋىلىنداعى «مەيىرىم» ارناۋلى الەۋمەتتىك قىزمەت كورسەتۋ ورتالىعىندا بولدى. قازىرگى تاڭدا مۇندا  قامقورلىققا الىنعان 80 ادام  تۇرادى. بۇل  عيمارات سوناۋ 1912 جىلى سالىنعان. ال, بۇگىندە جاڭا عيمارات سالۋ ءۇشىن 3 ميلليارد تەڭگە قاجەت ەكەن.

ودان سوڭ وبلىس اكىمى «پروگرەسس» شارۋا قوجالىعىنىڭ قۇلپىناي وسىرەتىن جىلىجايىنىڭ دا جۇمىسىمەن تانىستى. وبلىستاعى بىرەگەي جوبا وتكەن جىلى ىسكە قوسىلعان. ول 5 توننا جيدەك وسىرە الادى. ءوڭىر باسشىسى شارۋاشىلىق جۇمىسىن جوعارى باعالادى. سونداي-اق, ەرمەك مارجىقپاەۆ ماكينسك قۇس فابريكاسىنىڭ 2-ءشى كەزەڭى قۇرىلىسىنىڭ بارىسىمەن تانىستى. جوبانىڭ قۇنى 15 ميلليارد تەڭگە. وتكەن جىلى جەر قازۋ جۇمىستارى جانە قۇس قورالارىنىڭ ىرگەتاسى ورناتىلدى. بيىل برويلەر ءوسىرۋ ءۇشىن ارقايسىسىندا 12 قۇس قورادان تۇراتىن تاعى 4 الاڭ سالىنادى دەپ جاسپارلانعان.

–جاقسى كاسىپورىن. ماكينسك قۇس فابريكاسىنىڭ سەرىكتەستەرى دە مىقتى. اسىرەسە, قازىرگى كوروناۆيرۋس دەرتى ۋشىققان كەزدە, كومپانيا كومەك كورسەتۋدە. ولار اقمولا وبلىسىنا تەگىن ەكى اپپارات بەردى,–دەيدى وبلىس اكىمى ەرمەك مارجىقپاەۆ.

وبلىس اكىمى ەرمەك مارجىقپاەۆ ماكينسك قۇس فابريكاسىنىڭ جەم زاۋىتىنىڭ جۇمىسىمەن دە تانىستى. جوبانىڭ قۇنى 3 جارىم ميلليارد تەڭگەدەن استام. بۇل زاۋىت برويلەرلەر ءۇشىن تولىق راتسيوندى قۇراما جەممەن فابريكانىڭ قاجەتتىلىگىن قامتاماسىز ەتەدى.