كارانتين كوپ كاسىپكەرلەردىڭ ساۋداسىن تەجەگەنى راس. ساتۋدىڭ زاماناۋي تاسىلدەرىن قولدانا الماعاندار كاسىبىن ۋاقىتشا توقتاتتى, توتەنشە جاعداي كەزەڭىنە بەيىمدەلە العاندار ءىسىن جۇرگىزىپ جاتىر.
سونداي جانداردىڭ ءبىرى اشەكەي بۇيىمدار جاسايتىن جاس شەبەر – مەرۋەرت اسقاروۆا. بۇگىندە سۇيىكتى ءىسىن كاسىپكە اينالدىرىپ, ونلاين كۋرستار ارقىلى تاجىريبەسىمەن دە بولىسۋدە.
مەرۋەرت نەبارى 24 جاستا. ەكى بالانىڭ اناسى. شىنى كەرەك, قازىرگى ۋاقىتتا اشەكەيلەرگە تاپسىرىس بەرۋشىلەر ازايعان. دەگەنمەن, شەبەرگە بۇل كەدەرگى ەمەس. «اتامەكەن» كاسىپكەرلەر پالاتاسى جانىندا ۇيىمداستىرىلعان «جاس كاسىپكەر» كۋرسىن ءتامامداپ, گرانت ۇتىپ العان بولاتىن. سوعان ارنايى قۇرىلعىلار ساتىپ الىپ, ۇيدە وقشاۋلانىپ وتىرعان قىز-كەلىنشەكتەرگە ساباق بەرۋدى باستاپ كەتكەن.
–ونلاين ساباققا قازاقستاننىڭ تۇكپىر-تۇكپىرىنەن, ءار قالالارىنان قاتىسىپ جاتىر. اپتاسىنا 6 رەت وتكىزەمىن. جۇمىس ىستەگەن كەزدە كورەيانىڭ, يتاليانىڭ فۋرنيتۋرالارىن پايدالانامىن. ءار كاسىپكەر ءوز ءىسىن ءسۇيىپ جاساسا, ونىڭ ناتيجە بەرەرى انىق. قازىر ونلاين كۋرسىما كەمىندە 20 قىز جازىلۋدا,–دەيدى جاس كاسىپكەر مەرۋەرت اسقاروۆا.
مەرۋەرت 4 جىل ىشىندە وسىنداي اشەكەي بۇيىمداردىڭ ەكى مىڭعا جۋىعىن جاساپ ۇلگەرگەن. ونى ينستاگرام قولدانۋشىلارى الەۋمەتتىك جەلىدە Mika_Kameli دەپ تانيدى. ونلاين ساباقتاردى دا وسى پاراقشا ارقىلى وتكىزەدى. اشەكەي بۇيىمدارى كوزدىڭ جاۋىن الادى. ءتۇرلى القالار, سىرعا جۇزىكتەر, شاشقا ارنالعان بۇيىمدار ءبارى دە ەرەكشە ۇلگىدە جاسالعان.