نۇر-سۇلتان قالالىق قازاقستان حالقى اسسامبلەياسىنىڭ حاتشىلىعى قازاقستان حالقىنىڭ بىرلىگى كۇنىنە وراي اباي قۇنانباەۆتىڭ شىعارماشىلىق مۇراسىن ناسيحاتتاۋ جانە تانىتۋ ماقساتىندا اكتسيا باستادى. اتالعان شارالار قازاقتىڭ ۇلى ويشىلىنىڭ 175 جىلدىعىن تويلاۋ اياسىندا #اباي175, #1مامىر #Birlikkuni, #BizBirgemiz حەشتەگتەرى بويىنشا وتەدى.
بۇل چەللەندجگە نۇر-سۇلتان قالاسىنداعى وزبەك ەتنومادەني ورتالىعىنىڭ وكىلدەرى العاش بولىپ قولداۋ ءبىلدىردى. ولار ابايدىڭ «كوزىمنىڭ قاراسى» ءانىن قازاق تىلىندە وزبەك ۇلتتىق مۋزىكالىق اسپابى رۋبوبتىڭ سۇيەمەلدەۋىمەن ورىندادى. وزبەك مادەني بىرلەستىگىنىڭ وكىلى نۋريددين مولداباەۆتىڭ ايتۋىنشا, قاشعار رۋبوبى ەڭ تانىمال اسپاپتاردىڭ ءبىرى سانالادى. جىل سايىن ەلوردادا قازاقستان حالقىنىڭ بىرلىگى كۇنىنە وراي ءتۇرلى كونتسەرت, اۋقىمدى اكتسيا مەن مەرەكەلىك شارا وتەدى. الايدا بيىل نۇر-سۇلتان قالاسىندا كوروناۆيرۋس ينفەكتسياسى سالدارىنان كارانتين جاريالانعاندىقتان, مەرەكەلىك شارالاردىڭ فورماتىن وزگەرتۋ تۋرالى شەشىم قابىلداندى. ءىس-شارالاردى ونلاين-رەجىمدە وتكىزۋگە ەرەكشە نازار اۋدارىلىپ وتىر. «بۇگىندە ەلوردادا 130-دان استام وزگە ۇلت وكىلى تۇرادى. قالادا 23 ەتنومادەني بىرلەستىك بار. 12 جەكسەنبىلىك مەكتەپ جۇمىس ىستەيدى جانە ولاردىڭ سانى جىل سايىن ارتۋدا. ەلوردالىق ەتنومادەني بىرلەستىكتەر جاڭا شىعارماشىلىق باستامالارمەن جانە ءتۇرلى ءىس-شارالارمەن ەرەكشەلەنەدى. قازاقستان حالقىنىڭ بىرلىگى كۇنى قارساڭىندا ءبىز ءارتۇرلى ەتنوستىڭ ۇلتتىق مۋزىكالىق اسپاپتارىن ناسيحاتتاۋ اكتسياسىن وتكىزدىك. كارانتيندە مۋزىكا ارقىلى ەلىمىزدەگى ۇلتارالىق كەلىسىم مەن بەيبىتشىلىكتى نىعايتۋ ءۇشىن بارلىق ەتنوستىڭ شىعارماشىلىعىن جەتكىزگىمىز كەلەدى», دەدى نۇر-سۇلتان قالالىق قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا.
قحا قالالىق حاتشىلىعى ەلوردا تۇرعىندارىن اكتسياعا بەلسەندى قاتىسىپ, ءار حالىقتىڭ مۋزىكالىق اسپاپتارىن ءبىلىپ, تاريحىمەن تانىسۋعا جانە ابايدىڭ ءانىن بىرلەسە ورىنداۋعا شاقىرادى. قازاقستان رەسپۋبليكاسىنىڭ تۇڭعىش پرەزيدەنتى, قازاقستان حالقى اسسامبلەياسىنىڭ توراعاسى ن.ءا. نازارباەۆتىڭ توراعالىعىمەن ەلىمىزدە قازاقستان حالقى اسسامبلەياسىنىڭ 25 جىلدىعىنا ارنالعان شارالار وتۋدە.