ءماجىلىس دەپۋتاتى, اگرارلىق ماسەلەلەر كوميتەتىنىڭ توراعاسى بەرىك وسپانوۆ پرەمەر-مينيستر اسقار مامينگە جولداعان ساۋالىندا كوكتەمگى دالا جۇمىستارىن قارجىلاندىرۋ ماسەلەسىن كوتەردى.
– توتەنشە جاعداي كەزىندە پرەزيدەنت پارمەنىمەن تۋىنداعان ماسەلەلەردى شەشۋ جونىندە ۋاقتىلى شارالار قابىلدانىپ جاتىر. اۋىل تۇرعىندارىن تولعاندىراتىن اسا وزەكتى ماسەلەنىڭ ءبىرى – كوكتەمگى دالا جۇمىستارىن قارجىلاندىرۋ. اوك سۋبەكتىلەرىن نەسيەلەندىرۋ «قازاگرو» ۇبح-نىڭ «اگرارلىق نەسيە كورپوراتسياسى» اق جانە «اۋىل شارۋاشىلىعىن قارجىلاي قولداۋ قورى» اق ارقىلى, سونداي-اق ەكىنشى دەڭگەيدەگى بانكتەردى جانە كرەديتتىك سەرىكتەستىكتەردى قورلاندىرۋ ارقىلى جۇرگىزىلەدى. شامامەن, 170 ملرد تەڭگە بولىنگەنىنە قاراماستان, بۇل قاراجات تولىق كولەمدە يگەرىلمەۋدە جانە سوڭعى قارىز الۋشىلارعا, ءبىرىنشى كەزەكتە اۋىل شارۋاشىلىعى تاۋار وندىرۋشىلەردىڭ كەپىلدىكتەرىنىڭ بولماۋى نەمەسە جەتىسپەۋى سەبەبىنەن جەتپەي جاتىر, – دەدى دەپۋتات.
بەرىك وسپانوۆتىڭ ايتۋىنشا, قارجىلاندىرۋ پروبلەماسىن شەشۋ جولدارىنىڭ ءبىرى – ءونىمدى فورۆاردتىق ساتىپ الۋدى قولدانۋ بولۋى مۇمكىن. وسى رەتتە ول وڭىرلىك الەۋمەتتىك-كاسىپكەرلىك كورپوراتسيالاردىڭ مۇمكىندىكتەرىن پايدالانۋدى قاراستىرۋدى ۇسىندى. بىرىنشىدەن, اكك اكىمدىكتەردىڭ قارجى ينستيتۋتى رەتىندە قارىز الۋشى تۋرالى تولىق اقپاراتتارى بار. ەكىنشىدەن, ساتىپ الىناتىن ءونىم ەڭ الدىمەن جەرگىلىكتى حالىقتىڭ قاجەتتىلىگى ءۇشىن قاجەت. بۇل تەتىك تۇراقتاندىرۋ قورلارىن تولىقتىرۋعا جانە ونىمدەردى دەلدالسىز ساتۋ ماسەلەلەرىن رەتتەۋگە مۇمكىندىك بەرەدى.
سونداي-اق ماجىلىسمەن جارما, ءداندى, مايلى داقىلدار, كارتوپ جانە كوكونىس سياقتى بىرنەشە باعىت بويىنشا ونىمدەر ساتىپ الۋدى ۇسىنىپ, اكك-ءنى «قازاگرو» اق ارقىلى دا نەمەسە رەسپۋبليكالىق بيۋدجەتتەن بولىنگەن بيۋدجەتتىك كرەديتتەردىڭ ءبىر بولىگىن جەرگىلىكتى بيۋدجەتكە قايتا ءبولۋ جولىمەن دە قارجىلاندىرۋعا بولاتىنىن العا تارتتى.