نۇر-سۇلتان قالاسىنداعى حالىقارالىق مەكتەپتىڭ ماتەماتيكا ءپانى مۇعالىمى ەلامان سەرىك 2tors.online وزەكتى وقۋ باعدارلامالارى بويىنشا ونلاين رەپەتيتورلىق سەرۆيسى ۇيىمداستىرعان ماتەماتيكا ءپانى مۇعالىمدەرىنە ارنالعان «Best online teacher of maths» ونلاين وليمپياداسىندا توپ جارىپ, قازاقستاننىڭ ۇزدىك 20 مۇعالىمىنىڭ قاتارىنا ەندى.
2tors.online ونلاين رەپەتيتورلىق سەرۆيسى قازاقستاننىڭ ءبىلىم بەرۋ نارىعىنداعى باستى سەرىكتەستەرىنىڭ ءبىرى BTS Education كومپانياسىنىڭ جوباسى بولىپ تابىلادى.
وليمپياداعا ەلىمىزدىڭ تۇكپىر-تۇكپىرىنەن جالپى سانى 928 مۇعالىم قاتىسۋعا ءوتىنىم تۇسىرگەن. ۇستازداردىڭ ءبىلىم دەڭگەيىن ونلاين تەستىلەۋ ارقىلى انىقتاۋعا نەگىزدەلگەن العاشقى كەزەڭنەن سۇرىنگەندەردىڭ قاتارى كوپ بولعانعا ۇقسايدى. العاشقى سىناقتىڭ ناتيجەلەرىنە سايكەس, حالىقارالىق مەكتەپتىڭ ماتەماتيكا ءپانى مۇعالىمى ەلامان سەرىك جوعارى ناتيجە كورسەتىپ, قازاقستاننىڭ ۇزدىك 20 مۇعالىمى قاتارىنىن كورىنگەن. بۇگىندە ول اۆتوماتتى تۇردە ەكىنشى كەزەڭگە جولداما الىپ, كەلەسى كەزەڭگە دايىندىق ۇستىندە.
– ونلاين وليمپيادا وتەتىندىگى جونىندە ارىپتەسىمنەن ءبىلدىم. تىركەۋدەن ءوتىپ, قاتىسىپ كورۋگە بەل بۋدىم. كۇندەلىكتى جۇمىس قالپىمنان ويىمدى باسقا ارناعا بۇرىپ, تاجىريبە جيناماق ويىم بولدى. تەست تاپسىرمالارى ەش قيىندىق تۋعىزعان جوق. بىراق, تەستىلەۋ ۋاقىتىندا تاپسىرمالاردى ورىنداۋعا ءبىر جارىم ساعات عانا ۋاقىت بەرىلدى. مەن ءدال سول ۋاقىتتا بالالارمەن وزىندىك جۇمىس ورىنداپ وتىرعانمىن. ناتيجەسىندە, تەستىلەۋدى جارتى ساعاتقا كەش باستاپ, كەي سۇراقتاردى جىبەرىپ العانىم بار. ۇزدىك جيىرما مۇعالىمنىڭ تىزىمىنە ەنىپ, ەكىنشى كەزەڭگە وتكەنىمە قۋانىشتىمىن. قازىرگى ۋاقىتتا دايىندىعىمدى پىسىقتاۋدامىن, – دەيدى جاس مامان.
ەكىنشى كەزەڭدە ۇزدىك 20 مۇعالىم ءۇش كۇن ىشىندە بەينەساباقتىڭ ۇلگىسىن ءتۇسىرىپ, ۇيىمداستىرۋشىلارعا جىبەرۋى ءتيىس. بەينە ساباقتار سايتقا جاريالانىپ, ورتاق داۋىس بەرۋ جۇيەسى جانە ءادىل قازى القالارىنىڭ باعالاۋى ارقىلى سارالاناتىن بولادى.
وليمپيادا قاتىسۋشىلارىنا ءادىل باعاسىن بەرىپ, جەڭىمپازداردى انىقتاۋشى قازىلار القاسىنىڭ قاتارىندا BTS Education كومپانياسىنىڭ باسشىسى, قوعام بەلسەندىسى ساياسات نۇربەك, IT كاسىپكەر ارمان سۇلەيمەنوۆ جانە ءبىلىم بەرۋ سالاسىنداعى وزگە دە تاجىريبەلى ماماندار بار.
ءبىز دە ءوز تاراپىمىزدان حالىقارالىق مەكتەپتىڭ ماتەماتيكا ءپانى مۇعالىمى ەلامان سەرىككە شىن مىقتىلار باس قوسقان ءبىلىم بايگەسىندە ساتتىلىك تىلەيمىز! ەكىنشى كەزەڭنەن وق بوگيى وزا شاۋىپ, جەڭىس تۇعىرىنان كورىنۋىنە تىلەكتەسپىز.
ەستەرىڭىزگە سالا كەتسەك, ەلامان سەرىك نۇر-سۇلتان قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ, ەلىمىزدەگى ەڭ ۇزدىك وقۋ ورنى نازارباەۆ ۋنيۆەرسيتەتىنىڭ تۇلەگى.
الماتى