كارانتين باستالعالى انشەيىندە ءۇي بەتىن كورمەيتىن بالا-شاعا ءتورت قابىرعانىڭ ىشىنە قامالعان. بەستەن جاڭا اسقان ايتۋار قوناق بولمەدەگى ديۆاننىڭ جۇمساق جاقتاۋىن ات قىپ ءمىنىپ, قۇيعىتىپ شاۋىپ بارادى.
قالا بالاسىنا ءبارى تاڭسىق. اۋەلى الگى ديۆاننىڭ جۇمساق جاقتاۋىنا اتتانار جاعىنا مىنگەنىنە تاڭ قالدىم. ەشكىم ۇيرەتپەگەن, اتقا وسىلاي ءمىنۋ قاجەت ەكەندىگى جونىندە ءجون نۇسقاماعان. بالكىم ات ۇستىندە وتكەن اتا-بابامىزدىڭ قانىنداعى قاسيەت ءوز-وزىنەن داريتىن شىعار. قولىنداعى انشەيىن ادەمىلىك ءۇشىن ىستەگەن كىشكەنتاي قامشىمەن ديۆان-اتتىڭ ساۋىرىنىنان سالىپ-سالىپ قالىپ, شۋ-شۋلەپ قويادى.
وسى ساتتە ويىما شىن اتقا مىنگىزۋ تۇسكەن. كارانتين بىتكەن سوڭ اۋىلعا, ۇلكەن اعايدىڭ شاڭىراعىنا اپارماقپىن. ول ۇيدە ءمىنىس, جۋاس اتتار بار. تەك ەرتوقىم قايدان تابىلار ەكەن. وتكەندە ءبىر اڭگىمەدەن اڭگىمە تۋىنداپ, قازاقى ەرتوقىمنىڭ قات ەكەندىگىن ايتىپ وتىرعان.
– بىزدىكى شىلدىر شۇمەكتىڭ جۋاندىعىنداي تەمىرمەن قاۋسىرا قاپتالعان ورىس ەر توقىمى عوي, – دەگەن اعام, – باربولعىردىڭ جايسىزدىعى سونداي, اتتىڭ شوقتىعىن الىپ تاستايدى. توقىمىن قانشا قالىڭ سالساڭ دا, تەمىردىڭ اتى تەمىر ەمەس پە؟ قازاقى جىلقىنىڭ تۇرقىن كىشىرەيتكەن وسى ورىس ەرتوقىمى ما دەپ ويلايمىن كەيدە.
كىشكەنتاي بالا جاپ-جالپاق ءارى ەرەسەن ەبەدەيسىز ورىس ەرتوقىمىنا وتىرا الماۋى مۇمكىن. بويىن بيلەي الماي, قۇلاپ قالۋى كادىك. ەندى نە ىستەۋ كەرەك. سول ساتتە اشامايدىڭ ەسىمە تۇسكەنى. ءدال قازىر اشامايدى ءبىزدىڭ وڭىردە بالا تۇگىل اتا ساقالى اۋىزىنا شىققاندار دا بىلە بەرمەيدى. ىلە ىندەتە ىزدەدىك, قىرىق جىل جىلقى باققان جەتپىس اعاتايىم دا بىلمەيدى ەكەن. ءتىپتى ەستىمەگەن:
– ول نە, ىرىم با؟ – دەپ سۇرايدى.
اشاماي نەگىزىندە بالانى اتقا مىنۋگە ۇيرەتۋ ءۇشىن پايدالاناتىن ەرتوقىمنىڭ ەڭ قاراپايىم ءتۇرى. ەر سياقتى الدىڭعى, ارتقى قاستارى, ەكى قاپتالى بولادى. ادەتتە ۇزەڭگىنىڭ ورنىنا تەبىنگىگە جاپسىرىلا تىگىلگەن تەپكىشەك تىگىلەدى. جۇقا, جۇمساق بولعان سوڭ بالانىڭ سيراعىن جارالامايدى. ادەمى بولۋى ءۇشىن بەتى كوزتارتارلىقتاي ەتىپ كەستەلەنەدى. اڭعارىمپاز بالانىڭ اڭعال كوڭىلىن اۋلاۋ ءۇشىن قاجەت شىعار. الدىڭعى, ارتقى قاسىنا بالانىڭ قولتىعىنىڭ استىنان بايلايتىن اعاش بەكىتىلەدى. قۇلاپ قالماۋى ءۇشىن. ىلكى زاماندا ءۇش جاسقا تولىسىمەن اتقا اشاماي سالىپ ۇيرەتە باستاعان ەكەن. ال بىزدىكى بەستەن اسىپ كەتتى. ءالى ديۆاننىڭ جاقتاۋىن ات قىپ ءمىنىپ ويناپ وتىر.
وسىدان كارانتين ءبىتسىن دەپ, ىشتەي كىجىندىم مەن. اعاتايىمنىڭ ۇيىنە, ياعني, اتاسىنا الىپ بارامىن. اشامايلاپ اتقا مىنگىزەمىن. بالكىم, باسىرەگە ءبىر تاي اتار. قيال كوكجيەگى باسىرەگە جەتكەندە ۇرى ويدىڭ قىلاڭ بەرگەنى. تاي اتاسا, قىسقى سوعىمنىڭ رەتى كەپ قالار. بىراق, ەسىمدى جيىپ الگى ويدان تەز اينىدىم. بالانىڭ باسىرەسىنە قيانات جاساعانىم ۇيات بولار.