الماتىنىڭ جەدەل شتابى «اتا-انا كۇنىندە» بەيىت باسىنا بارماۋعا شاقىردى. پراۆوسلاۆ ءدىنىنىڭ سالتىنا سايكەس, 28 ءساۋىر «اتا-انالار كۇنى» قارساڭىندا الماتى قالاسى اكىمدىگىنىڭ جانىنان توتەنشە جاعداي رەجيمىن قامتاماسىز ەتۋ جونىندە قۇرىلعان جەدەل شتابى ىندەتتى اۋىزدىقتاۋ ماقساتىندا تۇرعىندارعا ادامدار كوپ جينالاتىن جەرلەرگە, سونىڭ ىشىندە, شىركەۋلەر مەن بەيىتتەرگە بارماۋعا كەڭەس بەرەدى.
بيىل كارانتينگە بايلانىستى زيراتقا تەك جەرلەۋ راسىمدەرىن جۇرگىزۋ ءۇشىن بارۋعا رۇقسات ەتىلگەن.
قالاداعى زيراتقا ادامداردىڭ توپتاسىپ جينالۋىن بولدىرماۋ ءۇشىن پوليتسيا دەپارتامەنتى كەزەكشىلىك ۇيىمداستىرماق.
بۇعان دەيىن ورتالىق كوممۋنيكاتسيالار قىزمەتىنىڭ الاڭىندا وتكەن ءباسپاسوز كونفەرەنتسياسىندا استانا جانە قازاقستان ءميتروپوليتى الەكساندر عيباداتحانالارداعى قۇدايعا قۇلشىلىق ەتۋ سالتتارى جابىق رەجيمدە وتەتىنىن حابارلاعان بولاتىن. مارقۇمداردىڭ ەسىمدەرى جازىلعان حاتتاردى زاماناۋي كوممۋنيكاتسيا قۇرالدارى ارقىلى, ياعني ەلەكتروندى پوشتا نەمەسە مەسسەندجەرلەردى پايدالانا وتىرىپ عيباداتحانالارعا جولداۋعا بولادى.
كارانتين اياقتالعاننان كەيىن بۇكىل قازاقستان بويىنشا پاسحالىق سەنبىلەردىڭ بىرىندە مارقۇمداردى ەسكە الۋ ءۇشىن قۇدايعا قۇلشىلىق ەتۋ راسىمدەرى سالتاناتتى تۇردە وتەدى.