ونى ءتيىمدى پايدالانۋ – باستى مىندەت
ءبىز ءۇشىن باستى مىندەت – كۇنى ەرتەڭ مەملەكەتتى باسقاراتىن سانالى دا ساۋاتتى ۇرپاق تاربيەلەۋ. بۇگىندە ءبارىمىز وزگەشە ءبىر وشپەندىلىكپەن قارايتىن كەڭەستەر وداعىندا ەڭبەك ادامىن دا, باسقارۋ تەتىكتەرىندە وتىراتىن كادرلاردى دايىنداۋدىڭ دا وزىندىك ۇلگىسى بولدى. ول بالاباقشادان باستالاتىن. يدەولوگياسى ميىنا مىسقىلداپ سىڭىرىلەتىن. بۇگىنگى ۇرپاق تاريح پانىنەن عانا وقيتىن «پيونەر», «كومسومول» ۇعىمدارى سوزىمىزگە دالەل-ءدۇر. قازىر شە؟
ونى ءتيىمدى پايدالانۋ – باستى مىندەت
ءبىز ءۇشىن باستى مىندەت – كۇنى ەرتەڭ مەملەكەتتى باسقاراتىن سانالى دا ساۋاتتى ۇرپاق تاربيەلەۋ. بۇگىندە ءبارىمىز وزگەشە ءبىر وشپەندىلىكپەن قارايتىن كەڭەستەر وداعىندا ەڭبەك ادامىن دا, باسقارۋ تەتىكتەرىندە وتىراتىن كادرلاردى دايىنداۋدىڭ دا وزىندىك ۇلگىسى بولدى. ول بالاباقشادان باستالاتىن. يدەولوگياسى ميىنا مىسقىلداپ سىڭىرىلەتىن. بۇگىنگى ۇرپاق تاريح پانىنەن عانا وقيتىن «پيونەر», «كومسومول» ۇعىمدارى سوزىمىزگە دالەل-ءدۇر. قازىر شە؟
وتكەندى وسى كۇنگە ءيىپ اكەلۋ اسا ءبىر پايدالى ءىس ەمەس سياقتى. ونىڭ ۇستىنە ءبىلىم مەن بىلىك, جاڭا تەحنولوگيالاردى يگەرۋ, العىرلىق پەن الىمدىلىق العا شىعىپ تۇر. بۇل رەتتە قازاقستان ءوز جولىن تاپتى. مەكتەپكە بارعان بالانىڭ بارلىعى عالىم, قايراتكەر, عۇلاما بولماسى انىق. ولاردىڭ ىشىندە دە ىرىكتەۋ جۇرگىزۋ كەرەك. ويتكەنى, قازىر باسەكەنىڭ زامانى. ىرىكتەۋدەن وتكەنى ىرگەلى جەرلەردە ءىلىم الادى. ال ول – «نازارباەۆ زياتكەرلىك مەكتەبى». مۇنداي اتاۋلى مەكتەپ ەڭ العاش رەت 2009 جىلى استانا قالاسىندا سالىندى. وسى ءبىر جاقسى ءۇردىس سولايشا بۇكىل رەسپۋبليكاعا تارالدى. وسىعان دەيىن ەلىمىز بويىنشا 13 «نازارباەۆ زياتكەرلىك مەكتەبى» بوي كوتەردى. ال ونىڭ 14-ءى قىزىلوردادا بوي كوتەردى. ءسوز اراسىندا ايتا كەتەيىك, جۋىق ماڭدا الماتىدا 2 مەكتەپ, پەتروپاۆل, قوستاناي, اتىراۋ جانە اقتاۋدا ءبىر-بىردەن وسىنداي ءبىلىم وشاقتارى اشىلماق.
سونىمەن, بيىلعى وقۋ جىلىنا سىر بويىنداعى ءشاكىرتتەرگە «نازارباەۆ زياتكەرلىك مەكتەبى» ەسىگىن ايقارا اشتى. ءبىلىم نارىمەن سۋسىنداتاتىن 90 ۇستازدىڭ ءوزى ۇلكەن ىرىكتەۋدەن سوڭ جۇمىسقا الىندى. مەكتەپ 7-11 سىنىپ ارالىعىنداعى وقۋشىلاردى وقىتادى. 1 قىركۇيەكتەن باستاپ زياتكەرلىك مەكتەپتىڭ پارتاسىنا 553 دارىندى بالا وتىردى. تۇڭعىش پرەزيدەنت اتىن يەمدەنگەن مەكتەپتىڭ اشىلۋ سالتاناتىنا وبلىس باسشىسى قىرىمبەك كوشەرباەۆ قاتىسىپ, قۇتتىقتاۋ ءسوز سويلەدى. سونداي-اق «نازارباەۆ زياتكەرلىك مەكتەبى» اق ءتورايىمى كۇلاش شامشيدينوۆا ارنايى كەلىپ قاتىستى.
قىزىلوردا وبلىسىندا جاڭا وقۋ جىلىنا تاعى بىرنەشە مەكتەپ پايدالانۋعا بەرىلدى. ماسەلەن, قىزىلوردا قالاسىنىڭ تاريحىندا تۇڭعىش رەت ءبىر مەزەتتە 4 جاڭا مەكتەپ ۇستازدار مەن وقۋشىلاردىڭ يگىلىگىنە تاپسىرىلدى. ولار تۇركىستان كوشەسىندە ورنالاسقان 1200 ورىندىق, بىرقازان اۋىلىنداعى 50 ورىندىق مەكتەپ جانە 20 ورىندىق شاعىن ورتالىق, دوسان اۋىلىنداعى 100 ورىندىق مەكتەپ پەن 20 ورىندىق شاعىن ورتالىق جانە ناۋرىز شاعىن اۋدانىنداعى 300 ورىندىق مەكتەپ عيماراتتارى. بۇدان وزگە, 4 مەكتەپ كۇردەلى, 5 مەكتەپ اعىمداعى جوندەۋدەن وتكىزىلدى. شاتىرىنان سۋ كەتىپ, بالالاردىڭ ءبىلىم الۋىندا قولايسىزدىق تۋعىزىپ كەلگەن قالاداعى 5 مەكتەپ جوندەۋدەن وتكىزىلدى.
سونىمەن قاتار, قازالى اۋدانىنداعى بايقوجا ەلدى مەكەنىندە 50 ورىندىق جاڭا مەكتەپ 20 ورىندىق بالاباقشاسىمەن بىرگە 1 قىركۇيەك – ءبىلىم كۇنى پايدالانۋعا بەرىلدى. وسىعان دەيىن مەكتەپ بەيىمدەلگەن تەمىر جول مەكەمەسىنىڭ عيماراتىندا ورنالاسقان ەدى.
جاڭا ءبىلىم ورداسىندا تەرەڭ بiلiم, ونەگەلi تاربيە الۋعا بارلىق جاعداي جاسالعان. 50 بالاعا ارنالعان تيپتىك سپورت زالى, اسحاناسى, اكت زالى بار. مۋلتيمەديالىق كابينەتكە ءتيىستى زاماناۋي قۇرال-جابدىقتار قويىلعان. ەڭ ماڭىزدىسى جاستارىمىزدى ەڭبەككە باۋلۋ ءۇشىن ەر جانە قىز بالالارعا ارنالعان شەبەرحانالار دا سالىنعان.
سونىمەن, جاڭا وقۋ جىلىندا سۋ جاڭا مەكتەپتەر پايدالانۋعا بەرىلدى. ەندىگى مىندەت ساپالى ءبىلىم الۋ مەن بەرۋدە بولىپ تۇر.
ەرجان بايتىلەس,
«ەگەمەن قازاقستان».
قىزىلوردا وبلىسى.