كەشە استانادا دامۋشى نارىقتاردىڭ ەۋرازيالىق فورۋمى ءوز مارەسىنە جەتتى. ول تۋرالى ارنايى ۇيىمداستىرىلعان بريفينگتە پرەمەر-ءمينيستردىڭ ورىنباسارى ەربول ورىنباەۆ ايتىپ بەردى.
كەشە استانادا دامۋشى نارىقتاردىڭ ەۋرازيالىق فورۋمى ءوز مارەسىنە جەتتى. ول تۋرالى ارنايى ۇيىمداستىرىلعان بريفينگتە پرەمەر-ءمينيستردىڭ ورىنباسارى ەربول ورىنباەۆ ايتىپ بەردى.
ەلوردادا ەكى كۇن بويى وتكەن دامۋشى نارىقتاردىڭ ەۋرازيالىق فورۋمى ءوز جۇمىسىن قورىتىندىلادى. فورۋمعا ەكى جۇزدەن استام حالىقارالىق ساراپشى ماماندار قاتىستى. دامۋشى نارىقتاردىڭ عالامدىق فورۋمى 2005 جىلدان بەرى وتكىزىلىپ كەلەدى. ول قازاقستاندا ءبىرىنشى رەت ۇيىمداستىرىلىپ وتىر, دەدى ۇكىمەت باسشىسىنىڭ ورىنباسارى.
فورۋمعا تەك پارلامەنت پەن ۇكىمەت مۇشەلەرى عانا ەمەس, الىس-جاقىن شەتەلدەردەن كەلگەن بىرقاتار ساياسي تۇلعالار, بۇرىنعى مەملەكەت, ۇكىمەت باسشىلارى, ءىرى حالىقارالىق ۇيىمداردىڭ باسشىلارى مەن اقش-تىڭ, ەۋروپا وداعىنىڭ, جاپونيا, قىتاي, رەسەي, بەلورۋسسيا, قىرعىزستان, ازەربايجان, ارمەنيا, گرۋزيا, لاتىن امەريكاسى ەلدەرىنىڭ بيزنەس وكىلدەرى قاتىسقان. بۇرىنعى مەملەكەت جانە ۇكىمەت باسشىلارى ىشىندە پولشانىڭ ەكس-پرەزيدەنتى الەكساندر كۆاسنەۆسكي, اۆستريانىڭ بۇرىنعى فەدەرالدىق كانتسلەرى الفرەد گۋزەنباەر مەن يتاليانىڭ ەكس-پرەمەر-ءمينيسترى, ەۋروپالىق كوميسسيانىڭ پرەزيدەنتى رومانو پرودي, ءيزرايلدىڭ ەكس-پرەمەر-ءمينيسترى ەحۋد ولمەرت, سونداي-اق, بوليۆيانىڭ بۇرىنعى پرەزيدەنتى حورحو كيروگا بار.
شاراعا الەمدەگى ءتۇرلى دەڭگەيدەگى حالىقارالىق ۇيىمداردىڭ باسشىلارى كەلدى. مىسالى, بۇكىلالەمدىك بانك, حالىقارالىق ۆاليۋتا قورى, ازيا دامۋ بانكى, بۇۇ دب, ەۋروپالىق كوميسسيا, ەۋرازيالىق ەكونوميكالىق قاۋىمداستىق, جاپونيانىڭ حالىقارالىق ىنتىماقتاستىق بويىنشا اگەنتتىگى وكىلدەرى دە قاتىستى.
وسىنشاما حالىقارالىق ۇيىمدار اتسالىسقان فورۋم ەۋرازيا قۇرلىعىندا دامىپ كەلە جاتقان نارىقتاردىڭ بار ەكەنىن دالەلدەدى جانە شىعىس پەن باتىستىڭ ينتەگراتسيالىق ءۇردىسىن كۇشەيتتى. بۇل مىندەتتى اتقارۋ ورتالىق ازياعا, ونىڭ ىشىندە قازاقستانعا جۇكتەلگەندەي بولىپ وتىرعانى ءمالىم. سوندىقتان, اتالعان فورۋمنىڭ قازاقستاندا وتكىزىلۋىندە دە ءمان بار. نەگىزى, ەكى كۇنگە جالعاسقان فورۋمدا ەلباسى نۇرسۇلتان نازارباەۆتىڭ «قازاقستان-2050» ستراتەگياسىن جۇزەگە اسىرۋ ماسەلەلەرى تالقىلاندى. شەتەلدەن كەلگەن ساراپشى ماماندار ەلىمىزدىڭ ستراتەگيالىق دامۋ باعىتىنا جوعارى باعا بەردى, دەدى ە.ورىنباەۆ.
مەملەكەت باسشىسىنىڭ تاپسىرمالارى قازاقستاننىڭ دامىعان 30 ەلدىڭ قاتارىنا ەنۋ جوباسىنىڭ تۇجىرىمداماسىنان كورىنىس تابادى. ال, فورۋمعا قايتا ورالساق, شارادا ءتۇرلى قىزۋ پىكىرتالاستار بولدى. ءوزارا تۇسىنىستىك سيپاتتاعى ۇنقاتىسۋ فورۋمنىڭ ماڭىزىن ارتتىرا ءتۇستى. شەتەلدىك مامانداردىڭ ايتقان ۇسىنىستارى نازارعا الىنىپ, ءوز ماماندارىمىز اراسىندا ارنايى تالقىلاناتىن بولادى, دەپ اياقتادى ءسوزىن پرەمەر-ءمينيستردىڭ ورىنباسارى.
نۇرباي ەلمۇراتوۆ,
«ەگەمەن قازاقستان».