بۇگىن مادەنيەت جانە سپورت مينيسترلىگىنىڭ ONLINEda bol جوباسى اياسىندا ءتىل ساياساتى كوميتەتىنىڭ تاپسىرىسىمەن «جاڭا ءالىپبي نەگىزىندەگى ۇلتتىق جازۋدىڭ جاڭعىرۋى» تاقىرىبىندا ونلاين-ءدارىس ءوتتى.
ءتىل ساياساتى كوميتەتىنىڭ تاپسىرىسىمەن ونلاين-ءدارىستى شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى ۇيىمداستىردى.
الەۋمەتتىك جەلى ارقىلى ارقايسىسى 30 مينۋتتان ەكى ءدارىس تىڭدالدى. العاشقى ءدارىستى شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ اتقارۋشى ديرەكتورى, فيلولوگيا عىلىمدارىنىڭ كانديداتى ەربول تىلەشوۆ «ورفوگرافيالىق جۇمىس توبى: ماقساتى, جۇمىس ءپرينتسيپى, ۇيىمداستىرۋ شارالارى, ناتيجەلەر» تاقىرىبىندا وقىدى. ول تۇڭعىش پرەزيدەنت نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا قازاق ءالىپبيىن لاتىن گرافيكاسىنا كوشىرۋ ماسەلەسى نەگىزگى مىندەت ەكەنىن ايتىپ, قر ۇكىمەتى جانىنداعى «قازاق جازۋىن لاتىن الىپبيىنە كوشىرۋ» جونىندەگى ۇلتتىق كوميسسيا جانىنداعى ورفوگرافيالىق جۇمىس توبىنىڭ ماقساتى مەن مىندەتتەرىن, اتقارعان ءىس-شارالارىن, ناتيجەلەرىن جان-جاقتى بايانداپ بەردى.
سونداي-اق ەربول تىلەشەۆ ورفوگرافيالىق جۇمىس توبىنىڭ ۋاقىت تالابىنا ساي عىلىمي, ادىستەمەلىك ناسيحات جۇمىستارىنا بەلسەنە اتسالىسقاندىعىن, قازاق ءالىپبيىن لاتىن گرافيكاسىنا كوشىرۋ بويىنشا وراسان ەڭبەك اتقارعاندىعىن ايتتى.
ەكىنشى ءدارىستى احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى, پروفەسسور ءالىمحان جۇنىسبەك «لاتىن گرافيكالىق ءالىپبيدىڭ فونەتيكالىق نەگىزدەمەسى» تاقىرىبىندا وقىدى.
ءالىمحان جۇنىسبەك ءالىپبي قۇرامىنداعى ءاربىر ءارىپتىڭ زاڭدىلىعى بولاتىنى, ى, ءى, ۇ, ءۇ دىبىستارىنىڭ اكۋستيكا-ارتيكۋلياتسيالىق دايەكتەمەسى, ءتورت دىبىستىڭ ءوزارا تىعىز بايلانىسى, جۇيە قۇراعىش سيپاتى, ءارىپ ءۇستى دايەكشەلەردىڭ تىلدەگى قىزمەتى جايلى ءتىل ماماندارىنا پايدالى اقپارات بەردى.
بۇل دارىستەرگە زەيىن قويىپ تىڭداعاندار وزدەرىنە قاجەتتى پايدالى ماعلۇمات الدى. دارىسكە Zoom سەرۆيسى بويىنشا 78 ءتىل مامانى قاتىستى. فەيسبۋك جەلىسىندەگى ONLINEda bol پاراقشاسى ارقىلى 34 ادام تىڭدادى.