كەشە ەلىمىزدىڭ مەملەكەتتىك حاتشىسى مارات ءتاجين امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى كەننەن فەيرفاكستى قابىلدادى.
كەشە ەلىمىزدىڭ مەملەكەتتىك حاتشىسى مارات ءتاجين امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى كەننەن فەيرفاكستى قابىلدادى.
م.ءتاجين اقش ەلشىسىن قازاقستانداعى ديپلوماتيالىق ميسسياسىنىڭ اياقتالۋىمەن جانە اتوم ەنەرگياسى جونىندەگى حالىقارالىق اگەنتتىكتىڭ اتقارۋشى ديرەكتورىنىڭ ورىنباسارى لاۋازىمىنا تاعايىندالۋىمەن قۇتتىقتادى. مەملەكەتتىك حاتشى ك.فەيرفاكستىڭ اقش-تىڭ قازاقستانداعى توتەنشە جانە وكىلەتتى ەلشىسى رەتىندە جەمىستى ەڭبەك ەتكەنىن, سونداي-اق, وسى قىزمەتكە تاعايىندالعان ەكى جىلدىڭ ءبىر كۇندەگىدەي سىرعىپ ءوتىپ كەتكەنىن اتاپ وتە كەلە, مەملەكەتارالىق بايلانىستاردى جانداندىرۋعا قوسقان ۇلەسى ءۇشىن العىسىن ءبىلدىردى.
كەزدەسۋ بارىسىندا تاراپتار قازاقستان مەن امەريكا اراسىنداعى كوپقىرلى ستراتەگيالىق ءارىپتەستىكتىڭ جوعارى دەڭگەيىن, ەكى مەملەكەت باسشىلارى اراسىندا دوستىق قارىم-قاتىناس قالىپتاسقانىن اتاپ ءوتتى.
ك.فەيرفاكس ساياسي جانە ەكونوميكالىق ارىپتەستىكتى ىلگەرىلەتۋ, قازاقستان-اقش قارىم-قاتىناسىن ودان ءارى ينستيتۋتتاندىرۋ بويىنشا بىرلەسە اتقارىلعان جۇمىستاردىڭ ناتيجەلەرىنە قاناعاتتانۋشىلىعىن ءبىلدىردى.
كەزدەسۋ سوڭىندا امەريكالىق ديپلومات جۋرناليستەرگە سۇحبات بەردى. «ءبىز كوپتەگەن ماسەلەلەردى, سونىڭ ىشىندە سوڭعى جىلدارى اتقارىلعان جۇمىستار شوعىرىن جانە وسى جۇمىستاردىڭ ناتيجەلەرىن تالقىلادىق. ماسەلەن, كەزدەسۋدە قاۋىپسىزدىك جانە لاڭكەستىككە قارسى كۇرەس جۇرگىزۋ باعىتىندا ىنتىماقتاستىق ورناتۋدىڭ جايى قارالدى. يادرولىق قارۋدى تاراتپاۋ, ءارتۇرلى جاھاندىق ستراتەگيالىق ماسەلەلەر توڭىرەگىندە قازاقستان مەن اقش ءبىر-بىرىنە ۇزاق جىلدار بويى ءوزارا قولداۋ تانىتىپ, ىنتىماقتاستىق ورناتىپ كەلە جاتقانى بارلىقتارىڭىزعا بەلگىلى. بۇعان قوسا, سوڭعى جىلدارى قۇقىق سالاسىندا دا تىعىز ارىپتەستىكتىڭ جولعا قويىلعانىن اتاپ وتۋگە بولادى. ماسەلەن, ەكى ەلدىڭ قۇقىق قورعاۋ ورگاندارىنىڭ وكىلدەرى تەرروريزمگە قارسى كۇرەس سالاسىندا تاجىريبە الماسىپ, تىعىز قارىم-قاتىناس ورناتقان بولاتىن», دەدى ءسوز ورايىندا ول.
سونداي-اق, ك.فەيرفاكس ەكىجاقتى كەزدەسۋ بارىسىندا سوڭعى ۋاقىتتا قازاقستاندا بولعان ساياسي وقيعالار مەن ءىس-شارالاردىڭ جانە قازاقستاننىڭ دەموكراتيالىق ينستيتۋتتاردى دامىتۋ مەن الەۋمەتتىك دامۋ ماسەلەلەرى توڭىرەگىندە قولعا العان جوسپارلارىنىڭ تالقىلانعانىن اتاپ ءوتتى.
«مەنىڭ اقش-تىڭ قازاقستانداعى توتەنشە جانە وكىلەتتى ەلشىسى رەتىندەگى ميسسيامنىڭ مەرزىمى اياقتالعانىن بىلەسىزدەر. سوعان قاراماستان, مەن قازاقستانمەن بۇگىنگى كۇنگە دەيىن قالىپتاسقان تىعىز بايلانىس ءجىبىن ۇزبەي, جالعاستىرا بەرەتىن بولامىن. دالىرەك ايتسام, ەندىگى كەزەكتە اتوم ەنەرگياسى جونىندەگى حالىقارالىق اگەنتتىكتە قىزمەت اتقارا ءجۇرىپ «جاسىل كوپىر», ەكسپو-2017 جوبالارى بويىنشا ەكىجاقتى ىنتىماقتاستىقتى جانداندىرۋعا ايرىقشا نازار اۋداراتىن بولامىز», دەدى ەلشى ءوز سوزىندە.
ءلايلا ەدىقىزى,
«ەگەمەن قازاقستان».