مادەنيەت باسقارماسىنىڭ باسشىسى ەرلان قالماقوۆتىڭ باستاماسىمەن قولعا الىنعان يگى جوبا ۇيدە وتىرعان كوپشىلىككە ءتۇرلى سالادا جەمىستى ەڭبەك ەتىپ جۇرگەن توبىل-تورعاي ءوڭىرىنىڭ تالانتتى پەرزەنتتەرىمەن Instagram الەۋمەتتىك جەلىسىندە ونلاين بايلانىس ارقىلى ەمەن-جارقىن اڭگىمە دۇكەن قۇرۋعا مۇمكىندىك بەرەدى.
جوبانىڭ العاشقى قوناعى – كۇمىس كومەي ءانشى سۇندەت بايعوجين.
«قادىرلى دوستار! اپتانىڭ العاشقى كۇنىن جاڭا ونلاين جوبامەن باستاعالى وتىرمىز! بۇعان دەيىن حابارلاعانىمىزداي, قوستاناي وبلىسىندا دۇنيەگە كەلىپ, بۇگىندە ەسىمى ەلگە تانىلعان ونەر قايراتكەرلەرى مەن زيالى قاۋىم وكىلدەرىمەن بولاتىن سۇحباتتار سەرياسىنا «سالەم, ساعان, تۋعان ەل» دەگەن ورتاق اتاۋ بەردىك. كەشكى ەفيردە شىعاتىن باسقا دا جوبالاردىڭ بولۋىنا بايلانىستى, ءارى كارانتيندە وتىرعان كوپشىلىككە كۇندىز دە تۇششىمدى دۇنيەلەر ۇسىنۋ ماقساتىندا باستاپقىدا سۇحباتتارىمىزدى كۇندىزگى ۋاقىتقا جوسپارلاپ وتىرمىز.
سىزدەردىڭ وتىنىشتەرىڭىزگە بايلانىستى, العاشقى كەزدەسۋىمىزدى قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى, «قۇرمەت» وردەنىنىڭ كاۆالەرى, تۇڭعىش پرەزيدەنت-ەلباسى قورى سىيلىعىنىڭ لاۋرەاتى سۇندەت بايعوجينمەن @sundetbaigozhin وتكىزەتىن بولامىز. بۇگىن ساع. 16.00-دە تىكەلەي ەفيرگە قوسىلىپ, جەرلەسىمىزبەن جۇزدەسۋگە اسىعىڭىزدار!» - دەگەن ۇندەۋ تاستادى Facebook پاراقشاسىندا ەرلان قالماقوۆ.
قوستاناي وبلىسى