اقمولا وبلىستىق ادەبيەت جانە ونەر مۇراجايىندا قوجا احمەت ءياسساۋيدىڭ «ديۋاني حيكمەت» كىتابىنىڭ شاعاتاي تىلىندەگى تۇپنۇسقاسى ساقتالعان. بۇل تۋرالى «قازاقستان-كوكشەتاۋ» تەلەارناسى حابارلادى.
كەڭەس داۋىرىندە جاسىرىن ساقتالعان بۇل كىتاپقا وسىدان بەس جىل بۇرىن عالىمدار زەرتتەۋ جۇرگىزگەن ەكەن. ونىڭ ناتيجەسى بويىنشا قۇندى دۇنيەنىڭ XVI عاسىردا جازىلعانى بەلگىلى بولدى. جالپى, ەلىمىزدە «ديۋاني حيكمەتتىڭ» 3 داناسى بار. ونىڭ ءبىرى تۇركىستان قالاسىنداعى مۇراجايدا, ال ەكىنشىسىن شىعىستانۋ ۋنيۆەرسيتەتىنىڭ رەكتورى پاريج ەلىنەن اكەلدى, ءۇشىنشى كىتاپ ءبىزدىڭ مۇراجايدا ساقتاۋلى تۇر. بۇل كىتاپتىڭ ەرەكشەلىگى, ورتا عاسىرلىق جازبا ادەبيەت ءتىلى شاعاتاي تىلىندە جازىلعان. قازىر مۇنى استانا قالاسىنداعى يمانعازى نۇراحمەتوۆ باستاعان عالىمدار اۋدارىپ بولدى. ەندى تاياۋ ارادا باسپاعا ۇسىناتىن بولامىز», - دەيدى وبلىستىق ادەبيەت جانە ونەر مۇراجايى ديرەكتورىنىڭ ورىنباسارى گۇلزايرا ءسابيتوۆا.
بىزگە بەلگىلىسى, كونە داۋىردەن ساقتالعان 90 بەتتىك كىتاپ بۇقار پاراعىنان جاسالعان ەكەن. سوندىقتان ونداعى جازبالار سول قالپىندا ساقتالىپتى.
دانيار تۇيمەباي.