قازاقستان مەن تۇركيا COVID-19 ىندەتىنە قارسى ءبىر-بىرىنە كومەك كورسەتۋدى جالعاستىرۋدا. تۇركيالىق «Nobel İlaç» ءدارى-دارمەك كومپانياسى ەلىمىزگە مەديتسينالىق پرەپاراتتار جىبەردى.
قازاقستاننىڭ تۇركياداعى ەلشىلىگى اتسالىسۋىمەن سەنبى كۇنى الماتى اۋەجايىنا ءدارى-دارمەكتەردەن قۇرالعان جارتى توننالىق جۇك كەلىپ ءتۇستى. وسى قيىن كەزدە تۇرىك اعايىنداردان كەلىپ تۇسكەن ءدارى-دارمەكتەر ەلىمىزدىڭ كوروناۆيرۋسقا قارسى كۇرەس جۇرگىزىپ جاتقان مەديتسينالىق مەكەمەلەرىندە قولدانىلاتىن بولادى.
«Nobel İlaç» كومپانياسىنىڭ باسقارما توراعاسى حاسان ۋلۋسوي قازاقستان رەسپۋبليكاسىنىڭ پرەمەر-ءمينيسترى اسقار مامينگە جولداعان حاتىندا «قازاقستان ەلشىلىگىنەن الىنعان اقپاراتقا سايكەس ەلىڭىزدىڭ كەيبىر ءدارى-دارمەك قاجەتتىلىگىن بىلگەن كەزدە, دەرەۋ ارەكەت ەتتىك. كەيبىرەۋلەرىن ءوزىمىز وندىرسەك, كەيبىرەۋلەرىن باسقا كومپانيالاردان الدىرىپ, ناۋقاستاردىڭ ەمدەلۋىنە سەپتىگىن تيگىزەدى دەگەن نيەتپەن قازاقستان ەلشىلىگىنە جولدادىق. وسىناۋ اۋىرتپالى كەزەڭدە ەڭسەرۋ ءۇشىن ءبىر-بىرىمىزگە بارلىق ماسەلەلەردە دەمەۋ بولۋ وتە ماڭىزدى دەپ سانايمىز. ءبىز باۋىرلاس ەكى ەلدىڭ حالىقتارى مەن بارلىق ادامزات اراسىندا وسى ىندەتتىڭ تارالۋى جاقىن ارادا توقتاۋىن تىلەيمىز. قاجەت بولعان جاعدايدا ەكىنشى ءۇيىمىز سانالاتىن باۋىرلاس قازاقستانعا ءاردايىم كومەك كورسەتۋگە دايىنبىز» - دەپ اتاپ ءوتتى.
«Nobel İlaç» كومپانياسى تۇركيا ءدارى-دارمەك ءوندىرىسى نارىعىندا كوشباسشى كومپانيالاردىڭ ءبىرى بولىپ سانالادى. 2004-ءشى جىلى كومپانيا قازاقستانعا ينۆەستيتسيا قۇيىپ ءوز زاۋىتىن اشتى. قازىرگى تاڭدا كومپانيانىڭ قازاقستانداعى فيليالىندا 420 ادام جۇمىس ىستەۋدە, كومپانيا قازاقستاندا 200-دەن اسا ءدارى-دارمەك ءتۇرىن وندىرەدى. كومپانيانىڭ ونىمدەرى كورشىلەس وزبەكستان, موڭعولياعا, رەسەي جانە قىرعىزستانعا ەكسپورتتالادى.