بىرىككەن ۇلتتار ۇيىمى ەلدەر ءال-اۋقاتىنىڭ الەمدىك رەيتينگىن ۇسىندى. ونى جاساۋ كەزىندە ءومىردىڭ ۇزاقتىعى, ءتىپتى, جەمقورلىق قىلمىستار سياقتى فاكتورلار دا ەسكەرىلەدى.
بۇۇ باقىتتى ەلدەردى انىقتادى
بىرىككەن ۇلتتار ۇيىمى ەلدەر ءال-اۋقاتىنىڭ الەمدىك رەيتينگىن ۇسىندى. ونى جاساۋ كەزىندە ءومىردىڭ ۇزاقتىعى, ءتىپتى, جەمقورلىق قىلمىستار سياقتى فاكتورلار دا ەسكەرىلەدى.
بۇۇ نۇسقاسى بويىنشا ءبىرىنشى ورىندا دانيا, ودان كەيىنگى ورىنداردا نورۆەگيا مەن شۆەيتساريا تۇر. سونىمەن بىرگە, تروپيكالىق افريكا مەن لاتىن امەريكاسىندا ءال-اۋقات كورسەتكىشتەرىنىڭ ارتىپ كەلە جاتقانىن دا ايتا كەتۋ قاجەت. ەكونوميكالىق داعدارىسقا قاراماستان, بۇتىندەي العاندا ادامدار سوڭعى بەس جىلدا باقىتتىلاۋ جانە جومارتتاۋ بولىپ شىققان. تالداۋ كورسەتكەندەي, باقىتتى ادامدار ۇزاق ءومىر سۇرەدى, ولار مول ەڭبەكاقى تابادى ءارى ءتارتىپتى ازاماتتار بولىپ سانالادى. زەرتتەۋگە قاتىسقان 130 ەلدىڭ 60-ىندا باقىتتىلىق دەڭگەيى كوتەرىلىپ, 41-ىندە قۇلدىراپ كەتكەن.
باس حاتشى قانداي ۇسىنىس جاساماق؟
بۇۇ باس حاتشىسى پان گي مۋن سيريا بويىنشا ساراپشىلاردىڭ باياندامالارى جاريالانعاننان كەيىن ءوزىنىڭ قاۋىپسىزدىك كەڭەسىنە ۇسىنىس ەنگىزەتىنىن مالىمدەدى.
وسىلايشا, بۇۇ باس حاتشىسىنىڭ ۇيىمنىڭ قاۋىپسىزدىك كەڭەسىنە سيريادا حيميالىق قارۋ قولدانعانى ءۇشىن كىنالىلەردىڭ جاۋاپكەرشىلىگى تۋرالى ۇسىنىس دايىنداعانى بەلگىلى بولىپ وتىر. مەن بۇۇ ساراپشىلارىنىڭ حيميالىق قارۋ تۋرالى بايانداماسى قاراۋعا ۇسىنىلعان كەزدە قاۋىپسىزدىك كەڭەسىنە بىرقاتار ۇسىنىستار ەنگىزۋدى ويلاستىرىپ وتىرمىن, دەپ اتاپ كورسەتكەن بۇل تۋرالى پان گي مۋن.
جانكەشتىلەرگە راقىمشىلىق جاسالادى
ساۋد ارابياسى سيريانىڭ ۇكىمەتتىك اسكەرلەرىمەن شايقاسۋ ءۇشىن مىڭنان استام جانكەشتىلەردى جىبەرگەن. بۇل تۋرالى امەريكالىق USAToday ينتەرنەت-باسىلىمى حابارلاعان.
وسى جىلدىڭ كوكتەمىندە ساۋد ارابياسى وكىمەتىنىڭ ءولىم جازاسىنا كەسىلگەن 1,3 مىڭنان استام تۇتقىندارعا ەگەر ولار سيريالىق ۇكىمەت اسكەرلەرىنە قارسى سوعىسقا قاتىسۋعا باراتىن بولسا, راقىمشىلىق جاساپ, اي سايىن ەڭبەكاقى تولەۋگە ۋادە بەرگەنى بەلگىلى بولىپ وتىر. بۇۇ-داعى سيريانىڭ تۇراقتى وكىلىنىڭ اقپاراتىنا قاراعاندا, ساۋد ارابياسى سيرياداعى سوعىس ءۇشىن جالدامالىلاردى دايىنداپ, ولارعا اقى تولەپ تۇرادى. جانكەشتىلەردىڭ اراسىندا اۋعانستان, يراك, يوردانيا, ەگيپەت, پاكستان, سۋدان, سومالي, يەمەن, كۋۆەيت سياقتى ونداعان مۇسىلمان ەلدەرىنىڭ ازاماتتارى بار ەكەنىن ايتا كەتۋ قاجەت.
وباما ماسكەۋ ۇسىنىسىن قولدايدى
ماسكەۋدىڭ سيرياداعى حيميالىق قارۋعا قاتىستى ۇسىنىسى الەۋەتتى تۇردە وڭ سيپاتقا يە. باراك وباما ەڭ ءىرى امەريكالىق تەلەارناعا بەرگەن سۇحباتىندا رەسەي سىرتقى ىستەر ءمينيسترىنىڭ باستاماسىنا ءوزىنىڭ وسىنداي كوزقاراسىن بىلدىرگەن.
اقش پرەزيدەنتى اراب رەسپۋبليكاسىنىڭ حيميالىق قارۋلارىنىڭ بۇكىل قورىنا حالىقارالىق باقىلاۋ ورناتۋ جونىندەگى سەرگەي لاۆروۆتىڭ ۇسىنىسىنا قولداۋ ءبىلدىرىپ وتىر. اق ءۇي باسشىسىنىڭ پىكىرىنشە, ەگەر سيريا وكىمەتى ءوز قارۋىنان باس تارتۋعا كەلىسسە, مۇنىڭ ءوزى داۋ-جانجالدى توقتاتۋداعى العاشقى قادام بولماق. سونىمەن بىرگە, رەسمي ۆاشينگتوننىڭ ازىرگە اسكەري وپەراتسيادان باس تارتپاي وتىرعانىن دا ايتا كەتۋ كەرەك. اسكەري قيمىلداردى باستاۋ تۋرالى سەناتقا ۇسىنىلعان قاراردىڭ جوباسى بويىنشا داۋىس بەرۋ سارسەنبى كۇنى وتۋگە ءتيىس ەدى, بىراق, پارلامەنتشىلەر ونى كەيىنگە قالدىرىپ وتىر.
ۇلىبريتانيا دا ۇندەۋلەرگە قوسىلماق
ۇلىبريتانيا پرەمەر-ءمينيسترى دەۆيد كەمەرون سيريانىڭ حيميالىق قارۋلارىن حالىقارالىق باقىلاۋعا بەرۋ جونىندەگى رەسەي مەن بۇۇ تالاپتارىنا قوسىلاتىنىن مالىمدەدى.
ەگەر سيريا ءوزىنىڭ حيميالىق قارۋلارىن حالىقارالىق باقىلاۋعا بەرەر بولسا, ونىڭ ءوزى ۇلكەن قادام بولماق, دەپ اتاپ وتكەن كەمەرون. ايتا كەتۋ كەرەك, بۇعان دەيىن رەسەي سىرتقى ىستەر ءمينيسترى سەرگەي لاۆروۆ رەسەيدىڭ حيميالىق قارۋ-جاراقتى حالىقارالىق قوعامداستىقتىڭ باقىلاۋىنا بەرۋ ءۇشىن سيريا باسشىلىعىمەن جۇمىستار جۇرگىزۋدى باستايتىنىن حابارلاعان بولاتىن. كەيىنىرەك, رەسەيدىڭ بۇل باستاماسىنا بۇۇ باس حاتشىسى پان گي مۋن دا قولداۋ كورسەتكەن.
دۇكەندى اۆتوكولىكپەن شابۋىلدادى
پاريجدە توناۋعا ۇشىراعان دۇكەن يەسىنە ساقتاندىرۋ كومپانياسىنان ۇرلانعان قىمبات م ۇلىكتەر ءۇشىن وتەماقى تولەۋدى عانا ەمەس, سونىمەن بىرگە, تاس-تالقانى شىققان دۇكەندى جوندەۋگە كەتەتىن شىعىنداردىڭ ورنىن تولتىرۋدى دا تالاپ ەتۋىنە تۋرا كەلەدى.
ويتكەنى, توناۋشىلار ۆاندوم الاڭىنداعى زەرگەرلىك دۇكەننىڭ ۆيتريناسىن دا اۆتوماشينامەن قاعىپ كەتكەن. ءاۆتوموبيلدىڭ جوعارى شاپشاڭدىعىمەن دۇكەن ىشىنە كىرىپ كەلگەن قىلمىسكەرلەر شامامەن 2 ميلليون ەۋرو بولاتىن اشەكەي بۇيىمدارىن ۇرلاپ اكەتكەن. ازىرگە پوليتسيا ورتەنىپ كەتكەن اۆتوكولىكتى عانا تاۋىپ وتىر. ال قىلمىسكەرلەر ءىز جاسىرىپ ۇلگەرگەن.
رەسەي ۋكراينالىق پوليگوننان باس تارتتى
رەسەي 2014 جىلدان باستاپ «نيتكا» پوليگونىن ۇشقىشتار دايارلاۋ ءۇشىن پايدالانبايتىنى تۋرالى ۋكراينا جاعىن رەسمي تۇردە حاباردار ەتتى.
كراسنودار ولكەسىندەگى ەيسك قالاسىندا رەسەيلىك «نيتكا» كەشەنىنىڭ قۇرىلىسى اياقتالىپ كەلەدى. ۇستىمىزدەگى جىلعى شىلدەنىڭ ورتاسىندا ميگ-29كۋب ۇشاقتارى وندا العاشقى جاتتىعۋ ۇشۋلارىن جاسادى. وسىعان دەيىن رەسەي ءاتف باس قولباسشىسى ۆ.چيركوۆ ەيسكىدەگى رەسەيلىك ترەناجەردىڭ 2013-2014 جىلدارى ىسكە قوسىلاتىنىن حابارلاعان بولاتىن.
يرانداعى جول اپاتى
يراننىڭ مەملەكەتتىك تەلەديدارى ەكى حالىقارالىق اۆتوبۋستىڭ سوقتىعىسۋى سالدارىنان قازا تاپقاندار سانى 44 ادامعا دەيىن كوبەيگەنىن حابارلاعان. وقيعا ەل استاناسى تەگەراننىڭ وڭتۇستىگىندەگى جول بويىندا ورىن العان.
جول-كولىك اپاتىنىڭ دۇيسەنبى كۇنى كەشكىلىك اۆتوبۋستاردىڭ ءبىرىنىڭ دوڭعالاعىنىڭ جەلىنىڭ شىعىپ كەتۋىنە بايلانىستى, ونىڭ قارسى باعىتقا شىعىپ كەتۋى سالدارىنان ورىن العانى بەلگىلى بولىپ وتىر. اۆتوبۋستىڭ ەكەۋى دە وتقا ورانعان. العاشىندا 40 ادام قۇربان بولدى دەپ حابارلانعانىمەن, سوڭعى مالىمەتتەر بويىنشا, ولاردىڭ 44-كە جەتكەنى بەلگىلى بولىپ وتىر. ونىڭ سىرتىندا 40-تان استام ادام ءتۇرلى دەنە جاراقاتتارىن العان.
ينتەرنەت ماتەريالدارى نەگىزىندە ازىرلەندى.