اتىراۋ وبلىسى يندەر اۋداندىق ىشكى ىستەر بولىمىندە قىزمەت اتقارعان پوليتسەي ەسىرتكى ساۋداسىمەن اينالىسقانى ءۇشىن 10 جىلعا باس بوستاندىعىنان ايىرىلدى.
اتىراۋ وبلىسى يندەر اۋداندىق ىشكى ىستەر بولىمىندە قىزمەت اتقارعان پوليتسەي ەسىرتكى ساۋداسىمەن اينالىسقانى ءۇشىن 10 جىلعا باس بوستاندىعىنان ايىرىلدى.
بۇل تۋرالى حابارلاعان وبلىستىق سوتىنىڭ ءباسپاسوز حاتشىسى بورانباي عاليەۆتىڭ ايتۋىنشا, ىشكى ىستەر ءبولىمىنىڭ قىزمەتكەرى حاميت نۇرىموۆ قىلمىستىق كودەكستىڭ 259-بابى 3- تارماعى («اسا ءىرى مولشەردە ەسىرتكى زاتتاردى وتكىزۋ, دايىنداۋ, ۇقساتۋ, جونەلتۋ ماقساتىندا زاڭسىز يەمدەنىپ الۋ, ساقتاۋ») بويىنشا كىنالى دەپ تانىلعان.
ايىپتاۋ ۇكىمىندە اتاپ كورسەتىلگەندەي, يندەر اۋداندىق ىشكى ىستەر ءبولىمىندە جەدەل ۋاكىلەتتى قىزمەتكەرى بولىپ جۇمىس ىستەگەن قىزىلوردا وبلىسىنىڭ 23 جاستاعى تۋماسى وتكىزۋ ماقساتىندا اسا ءىرى مولشەردە ماريحۋانانى زاڭسىز يەمدەنىپ, ساقتاعان. بىلتىرعى جىلدىڭ قىركۇيەگىندە پوليتسەي ءوز تانىسىنا ءبىر كيلوسىن 250-300 مىڭ تەڭگە باعاعا ماريحۋانا ساتىپ الۋشىلاردى تاۋىپ بەرۋدى سۇراعان كورىنەدى. ال تانىسى سول بويدا پوليتسياعا حابار سالعان. قازان ايىندا ەسىرتكى ساۋداگەرىن باتىس وڭىرلىك ۇيىمداسقان قىلمىسپەن كۇرەس باسقارماسىنىڭ قىزمەتكەرلەرى ەسىرتكى ساتپاقشى بولعان پوليتسەيدى قاماۋعا الدى.
قىلمىستىق ىستەر جونىندەگى اۋدانارالىق مامانداندىرىلعان سوتى ح.نۇرىموۆقا مۇلكىن تاركىلەۋمەن قاتار, قاتاڭ رەجيمدەگى كولونيادا 10 جىلعا باس بوستاندىعىن ايىرۋعا ۇكىم شىعاردى. سوت جازا تاعايىنداۋ كەزىندە ونىڭ جازاسىن جەڭىلدەتۋدە نۇرىموۆتىڭ بۇرىن سوتتالماعانىن, سونىمەن قاتار جۇمىس ورنىنان بەرىلگەن وڭ مىنەزدەمەنى قاپەرگە الدى.
قۇرىش نۇرىمبەت.