قوستاناي وبلىسىنىڭ جەدەل جاردەم قىزمەتى كارانتين جاعدايىندا ەرەكشە جۇمىس تارتىبىنە كوشتى. وبلىس بويىنشا ءبىر تاۋلىك ىشىندە شامامەن 50 شاقتى جەدەل جاردەم توبى كەزەكشىلىك ەتەدى. فەلدشەرلەر دەرلىك جەكە قورعانىش قۇرالدارىمەن قامتاماسىز ەتىلىپ, ادەتتەگى اق حالاتتى بۇكىل دەنە ءبىتىمىن جاۋىپ تۇراتىن قىمتاما كومبينەزوندارمەن اۋىستىرعان.
– مەديتسينا ماماندارىنىڭ سىرتقى تۇرپاتى كارانتين تالاپتارىنا ساي وزگەردى. فەلدشەرلەر الەمدىك تاجىريبەدە قولدانىلاتىن قورعانىش كيىمدەرىمەن قامتاماسىز ەتىلىپ, قازىر شتاتتى رەجىمدە جۇمىس ىستەپ جاتىر. وبلىس تۇرعىندارىنا مىنانى ەسكەرتكىمىز كەلەدى: ەگەر قىزۋىڭىز كوتەرىلىپ, تۇشكىرىپ, جوتەل ءتيىپ قالسا نەمەسە ءىشىڭىز وتە باستاسا ەمحاناعا بارۋدىڭ قاجەتى جوق. مەديتسينا مەكەمەسىنە نەمەسە جەدەل جاردەمگە قوڭىراۋ سوقساڭىز, جەتكىلىكتى. جەدەل جاردەم كوپ كەشىكتىرمەي ۇيىڭىزدە بولادى. كارانتين تالاپتارىنىڭ بۇزىلماۋىن قاداعالاپ, تازالىق ساقتاڭىزدار. بۇگىنگى تاڭدا ءار ادامنىڭ قاۋىپسىزدىگى مەن دەنساۋلىعىنا قاجەت نەگىزگى تالاپ - وسى, - دەپ مالىمدەدى دەنساۋلىق ساقتاۋ باسقارماسىنىڭ ءباسپاسوز قىزمەتى.
قوستاناي وبلىسى