«قاندىاعاش – ماقات» (160-504كم) اۋقىمدى جوباسى ينفراقۇرىلىمدى دامىتۋدىڭ «نۇرلى جول» مەملەكەتتىك باعدارلاماسىنىڭ اياسىندا جۇزەگە اسىرىلۋدا. جوبا 7 ۋچاسكەگە بولىنگەن. جولدىڭ جالپى ۇزىندىعى 299 شاقىرىمدى قۇرايدى. جوبانىڭ باس مەردىگەرلەرى - «Todini», «Shanghai», «انت», «اقجول» جانە «سپيك اككورد» كومپانيالارى. بۇل تۋرالى يدم ءباسپاسوز قىزمەتى حابارلادى.
جوبا ىسكە اسىرىلا باستاعاننان بەرى جەر توسەمىنىڭ 3909,8 مىڭ تەكشە مەترى توگىلدى. 144,7 شاقىرىمدا توسەمە قابات, 125,4 شاقىرىمدا جول نەگىزدەمەسىنىڭ تومەنگى قاباتى, 108,8 شاقىرىمدا جول نەگىزدەمەسىنىڭ جوعارعى قاباتى جانە 99,7 شاقىرىمدا ءجول توسەمىنىڭ تومەنگى قاباتى جاتقىزىلدى. بۇدان بولەك, جولشىلار 68 سۋ وتكىزۋ قۇبىرىن مونتاجدادى.
كومپانيالار بيىلعى قۇرىلىس ماۋسىمىنا قيىرشىق تاستىڭ 450,63 مىڭ تەكشە مەترىن, تەمىر-بەتوندى بۇيىمداردىڭ 2,36 مىڭ تەكشە مەترىن, بيتۋمنىڭ 2,31 مىڭ تونناسىن دايىنداعان.
2020 جىلدىڭ سوڭىنا دەيىن «قاندىاعاش – ماقات» تاسجولىنىڭ 154 شاقىرىمىندا قوزعالىس اشىلادى دەپ جوسپارلانۋدا.
ايتا كەتۋ كەرەك, قايتا جاڭارتۋ جۇمىستارىنا 1500 قىزمەتكەر جۇمىلدىرىلادى دەپ كۇتىلۋدە. ولاردىڭ 1420-ى جەرگىلىكتى تۇرعىندار قاتارىنان تارتىلماق.
2021 جىلى جوبا اياسىنداعى جۇمىستار اياقتالعان سوڭ رەسپۋبليكالىق ماڭىزعا يە «قاندىاعاش- ماقات» جولى ءىى تەحنيكالىق ساناتقا سايكەستەندىرىلەدى.
ەسكە سالايىق, قازاقستاندا 2020 جىلى قۇرىلىس جانە قايتا جاڭارتۋ جۇمىستارىمەن اۆتوموبيل جولدارىنىڭ 4 مىڭ شاقىرىمى قامتىلسا, قوزعالىس 2 مىڭنان استام شاقىرىم جولدا اشىلادى دەپ جوسپارلانىپ وتىر.