قاراعاندى وبلىسىندا «جامان تۇماۋ» جۇقتىرعانداردىڭ سانى سەكسەننەن اسىپ, توقسانعا جەتىپ قالدى. ازىرگە ءتورت ادام سىرقاتتان قۇلان-تازا ايىعىپ شىقتى. كوبەيسە دەگەن تىلەك بار! قازىر كارانتيننىڭ تارتىبىنە كونىپ, ءتاۋباسىنا كەلگەندەردىڭ قاتارى ارتىپ كەلەدى. دەگەنمەن, اينالاداعى جاعدايعا سالدىر-سالاق قارايتىندار دا كەزدەسىپ قالىپ جاتىر. ولار, ارينە, ازشىلىق. دەگەنمەن, بۇلارعا قاتىستى دا تارتىپتىك ءىس-شارالار كۇشەيتىلسە دەيسىڭ. ويتكەنى, ء«بىر قۇمالاق ءبىر قارىن مايدى شىرىتەدى»... كارانتيندەگى قاراعاندىنىڭ كەزەكتى «قىزىقتارىنىڭ» تاعى ءبىر توپتاماسىن نازارلارىڭىزعا ۇسىندىق, قادىرمەندى وقىرمان. ۇيدە وقي وتىرىڭىز!
توتەنشە جاعدايداعى بوتەنشە بايقاۋ
كوروناۆيرۋس دەگەن پالەكەت ەكى اياقتى ءبىر ەتىككە تىققان مىنا زاماندا قاراعاندى وبلىسىنىڭ توتەنشە جاعداي جونىندەگى دەپارتامەنتى «تۇرمىستاعى ءورت قاۋىپسىزدىگى شارالارى» تاقىرىبى بويىنشا بەينەروليكتەر بايقاۋىن جاريالاپتى.
قازىرگىدەي توتەنشە جاعداي جاريالانىپ, كارانتين ەنگىزىلگەن قاتاڭ ءتارتىپ جاعدايىندا اتالعان ۆەدومستۆو ەشتەڭەگە الاڭداماي, بەس قارۋى تۇگەل ساي, نە نارسەگە بولسا دا دايىن وتىرۋى كەرەك. ال ەندى, بۇل دەپارتامەنت 15-30 ءساۋىر ارالىعىندا بالالار مەن ولاردىڭ اتا-انالارىنان كەلىپ تۇسكەن بەينەروليكتەردى سارالاۋمەن ۋاقىت وتكىزسە, بىزدەردى ورتتەن, تۇرمىستاعى نەشە ءتۇرلى وقىس جاعداياتتاردان كىم ساقتايدى؟
نەگىزى, يدەيانىڭ و باستاعى مۇراتى وڭدى-اق, ارينە. بالالار وسى باستان وپاتتىڭ قايدان كەلەتىنىن بىلە بەرسىن دەگەن جاقسى نيەت قوي. دەگەنمەن, وسى بايقاۋدى توتەنشە جاعداي بىتكەن سوڭ دا ۇيىمداستىرۋعا بولماس پا ەدى؟ كىم بىلەدى, بالانىڭ اتى – بالا. ۇيدە تىپ-تىنىش وتىرعان جۇگەرمەكتەر كارانتيندە قولىنا سمارتفونىن كولدەنەڭ ۇستاپ (كولدەنەڭ ۇستاپ ءتۇسىرۋ – كونكۋرس تالابىنىڭ ءبىرى) كوشە كەزىپ كەتپەي مە دەگەن كۇدىك تە جوق ەمەس...
ساراندىقتىڭ «ساراڭدىعىن» كەشىردى
قاراعاندىعا سەرىكتەس قالا ساراندا «ۆوستوك» دەگەن دۇكەننىڭ يەسى وسىدان ءبىراز بۇرىن اباقتىعا قامالعان بولاتىن. نە ءۇشىن دەيسىز عوي؟ ساۋداگەردىڭ اياقاستى ساراڭدىعى ۇستاپ, مەنشىگىندەگى دۇكەنىنىڭ تابالدىرىعىنا دەزينفەكتسيالىق كىلەمشە تاستاماعان ەكەن. ياعني, توتەنشە جاعداي رەجيمىنىڭ ءتارتىبىن بىلە تۇرا قاساقانا بۇزعان...
دەگەنمەن, دجوحار وتەبەكوۆ دەگەن ادۆوكات, وڭىرلىك كاسىپكەرلەر پالاتاسى وبلىستىق سوتقا ارىز-شاعىمدى قارشا بوراتىپ, جەكە كاسىپكەردى ۋاقىتشا ۇستاۋ يزولياتورىنان بوساتىپ الدى.
«جاڭىلمايتىن – جاق, سۇرىنبەيتىن تۇياق جوق» دەگەن بار. دۇكەن يەسىنىڭ بوستاندىققا شىققانىنا ءبىز دە قۋانىپ قالدى. دەگەنمەن, كاسىپكەر ءۇشىن قۇنى كوك تيىن كىلەمشەگە كەلگەندە ساراڭدىعى ۇستاپ قالعان ساۋداگەرگە, سوسىن باسقا دا ءىرىلى-ۇساقتى دۇكەن ۇستاعاندارعا بۇل وقيعا اششى ساباق بولدى-اۋ دەگەن ۇمىتتەمىز.
«سورەنىڭ» سورى قايناماسىن...
جەزقازعانداعى دۇكەندەردىڭ بىرىندە «قايىرىمدىلىق سورەسى» پايدا بولىپتى. مۇنىڭ ءمانىسى مىنادا ەكەن: مىسالى قالتاسىندا ارتىق-اۋىس اقشاسى بار كەز-كەلگەن جومار جان ازىق-ت ۇلىك ساتىپ الادى ەكەن دە, ونى وسى سورەگە قويىپ كەتەتىن كورىنەدى.
سونان سوڭ, كۇندەلىكتى تىرلىكتە كۇنىن ارەڭ كورىپ جۇرگەندەر اڭدىپ تۇرىپ, الگى سورەدەن كەرەگىن تەگىن الادى دەيدى. قىسىلعاندا قايىرىمدىلىق جاساۋدىڭ تىڭ دا توسىن ءتۇرىن ويلاپ تاپقان جەزقازعاندىقتارعا «بارەكەلدى!», دەپ باس بارماقتى كورسەتكەننەن باسقا امال جوق. ونىڭ ۇستىنە, بىزگە جەتكەن اقپاراتقا سەنسەك, «اكتسيا قالا تۇرعىندارى اراسىندا قولداۋ تاپتى: قايىرىمدىلىق سورەسى ەشقاشان بوس تۇرمايدى», دەيدى.
دەگەنمەن, بۇل «قايىرىمدىلىق سورەسىنىڭ» بولاشاقتاعى تاعدىرى قانداي بولماق دەپ تە ۋايىمدايسىڭ. سەبەبى, مۇندايعا ۇيرەنبەگەن ءبىزدىڭ كەيبىر ازاماتتار جوق-جىتىك, كارى-قۇرتاڭ جەتەم دەگەنشە, الگى سورەنى جىلان جالاعانداي ەتىپ كەتپەسە يگى. الدە, پوليتسيادان كۇزەت قويا ما..؟
ايتەۋىر, 42500 تەڭگەنىڭ «جىرىنداي» بولىپ كەتپەسە ەكەن...
قاراعاندى وبلىسى