بۇگىن «قازمەديا ورتالىعى» اق عيماراتىندا پرەزيدەنت جانىنداعى ورتالىق كوممۋنيكاتسيالار قىزمەتى بازاسىندا «قازاقستان 2050» – قالىپتاسقان مەملەكەتتىڭ جاڭا ساياسي باعىتى» ستراتەگياسىنىڭ جۇزەگە اسىرىلۋ بارىسى جايىندا اقپارات تاراتاتىن جاڭا پورتالدىڭ تانىستىرىلىمى بولدى.
جيىندى پرەزيدەنت جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ اشتى. ال ماڭىزدى جوبانىڭ ىسكە اسىرىلۋىن «قازكونتەنت» اق باسقارما توراعاسىنىڭ ورىنباسارى زارينا باقتيەۆا ءتۇسىندىرىپ بەردى. ونىڭ سوزىنەن ءمالىم بولعانىنداي, «قازكونتەنت» اق جەدەل اقپاراتتار مەن ەكسكليۋزيۆتى تالدامالاردىڭ دەرەككوزىنە اينالاتىن, پايدالانۋشىلاردىڭ ىڭعايىنا وراي بارلىق زاماناۋي مۇمكىندىكتەردى قامتىعان جاڭا ينتەراكتيۆتى پورتالدى ىسكە قوسىپ وتىر.
مۇندا كۇن سايىن 40-تان استام اقپاراتتىق جانە تالداۋ ماتەريالدارى, بەينە, فوتوماتەريالدار ءۇش تىلدە جارىق كورىپ وتىرادى ەكەن.
پورتالدىڭ كورۋ قابىلەتى ناشار جاندارعا ارنالعان ارنايى نۇسقاسى دا بار. سونداي-اق, مۇندا قازاقستاننىڭ ينتەراكتيۆتى كارتاسى ورنالاسقان جانە ەلىمىز وبلىستارىنداعى جوبالار تۋرالى دا مالىمەت الا الاسىز.
مادەنيەت جانە اقپارات ۆيتسە-ءمينيسترى ارمان قىرىقباەۆ, پارلامەنت سەناتىنىڭ دەپۋتاتى سەرىك نوگەربەكوۆ, ءبىلىم جانە عىلىم ۆيتسە-ءمينيسترى مۇرات ابەنوۆ جاڭا ۆەب-پورتالدىڭ اشىلۋىمەن قۇتتىقتاپ, ونىڭ ماڭىزى مەن مۇمكىندىكتەرى جايلى ءوز ويلارىن ورتاعا سالدى.
ايدار ورىسباەۆ.