قازاقستاندىق 3-ءشى بىتىمگەرشىلىك روتاسى ۇندىستاندىق باتالون قۇرامىنداعى بۇۇ-نىڭ ليۆانداعى بىتىمگەرشىلىك ميسسياسىن جالعاستىرىپ جاتىر. پاندەمياعا بايلانىستى ميسسيا قولباسشىلىعى ۆيرۋس تارالۋىنىڭ الدىن الۋ ءۇشىن بارلىق ساقتىق شارالارىن قابىلدادى.
قازىر ليۆانداعى جاعداي تۇراقتى. قالىپتاسقان احۋال جەرگىلىكتى بيلىك پەن «ليۆانداعى بۇۇ ۋاقىتشا كۇشتەرى» قولباسشىلىعىنىڭ باقىلاۋىندا. 26 ساۋىرگە دەيىن ەلدە توتەنشە جاعداي جاريالانعان. ديپلوماتيالىق تۇلعالاردى قوسپاعاندا, بۇكىل حالىق ءۇشىن بەيرۋت اۋەجايى, قۇرلىق جانە تەڭىز وتكەلدەرى جابىلعان.
قازاقستاندىق 3-ءشى بىتىمگەرشىلىك روتاسىنىڭ كومانديرى, مايور جانىبەك نۇرلانوۆتىڭ ايتۋىنشا, بىتىمگەرشىلىك بازاسىنداعى جاعداي تۇراقتى. جاۋاپكەرشىلىك ايماعىندا ميسسياداعى 11 مىڭ اسكەري قىزمەتشى مەن ازاماتتىق بىتىمگەرلەردىڭ دەنساۋلىق قاۋىپسىزدىگىن قامتاماسىز ەتۋ ءۇشىن كارانتين ەنگىزىلگەن.
بىتىمگەرلىك بازانىڭ ءاربىر باقىلاۋ-وتكىزۋ پۋنكتىندە مەديتسينالىق پەرسونال كەزەكشىلىك ەتەدى. بايلانىسسىز تەرمومەتريا جۇزەگە اسىرىلىپ, سانيتارلىق-گيگيەنالىق نورمالارىنىڭ قاتاڭ ساقتالۋى باقىلانادى.
بىتىمگەرلەرگە ۆيرۋستى جۇقتىرۋ فاكتىلەرى تىركەلگەن اۋداندارعا ساپار جاساماۋ جانە جەرگىلىكتى حالىقپەن قارىم-قاتىناس جاساۋعا بارىنشا شەكتەۋ ۇسىنىلعان. جەكە قۇراممەن كوروناۆيرۋستىق ينفەكتسيانى جۇقتىرۋدىڭ الدىن الۋ جانە بولدىرماۋ بويىنشا ساباقتار ۇنەمى وتكىزىلەدى.
ء«بىزدىڭ الدىمىزدا تۇرعان ەڭ ماڭىزدى مىندەت – بىتىمگەرلەرىمىزدى ۆيرۋستى جۇقتىرۋدان قورعاۋ. سونىمەن قاتار ونىڭ تارالۋىنىڭ الدىن الۋ. قازىرگى ۋاقىتتا ءبىزدىڭ جۇمىسىمىز وسىعان باعىتتالعان», دەيدى قازاقستاندىق كونتينگەنتتىڭ كومانديرى.
كومانديردىڭ ايتۋىنشا, ءبىزدىڭ بىتىمگەرلەردىڭ مورالدىق-پسيحولوگيالىق جاعدايى جوعارى دەڭگەيدە. ولار بارلىق قاۋىپسىزدىك شارالارىن قاتاڭ ۇستانا وتىرا, «كوگىلدىر سىزىق» بويىندا تۇراقتىلىقتى قامتاماسىز ەتۋ ءۇشىن 24/7 رەجىمىندە جەدەل قىزمەتتى جۇزەگە اسىرۋ سىندى ءوز مىندەتتەرىن ورىنداۋدى جالعاستىرۋدا.
قازاقستاندىق بىتىمگەرشىلىك كونتينگەنتى مودۋلدىك ۇلگىدەگى ەكى بىتىمگەرشىلىك بازادا ورنالاسقانىن اتاپ وتكەن ءجون. كۇندەلىكتى جايلى جاعدايى قالىپتاسقان. بۇۇ تاراپىنان قامتاماسىز ەتىلەتىن ءۇش مەزگىلدىك تاماقتانۋ ۇيىمداستىرىلعان. دەنە شىنىقتىرۋمەن اينالىسۋ ءۇشىن جابدىقتالعان سپورت زالى بار. مىندەتتەردى ورىنداۋدان بوس ۋاقىت كەزىندە بىتىمگەرلەر فۋتبول, ۆولەيبول, شاحمات جانە بيليارد وينايدى. اركىم ءوز وتباسىمەن بەينەبايلانىس ارقىلى حابارلاسا الادى.
ميسسيا باسشىلىعى قازاقستاندىق بىتىمگەرلەردىڭ جاقسى دايىندىعى مەن تارتىپتىلىگىن اتاپ ءوتتى.