كوشەنى زالالسىزداندىراتىن كولىك شىعارا باستادى

28 ناۋرىزدا ۇكىمەت باسشىسى اسقار ءماميننىڭ قاتىسۋىمەن قوستانايدا وتاندىق «Chevrolet» كولىكتەرىنىڭ بىرنەشە ۇلگىسىن شىعاراتىن جاڭا ءوندىرىس ىسكە قوسىلعان بولاتىن. ولاردىڭ ىشىندە, اسىرەسە شاعىن جانە ورتا بيزنەسكە ارنالعان «Labo» كوممەرتسيالىق اۆتوكولىگى كوپشىلىك قىزىعۋشىلىعىن وياتىپ وتىر. بۇل اۆتوكولىك وتاندىق نارىقتا ەڭ ءوتىمدى ءارى ەڭ ارزان كولىك رەتىندە تانىلىپ ۇلگەرگەن. «سارىارقااۆتوپروم» سەرىكتەستىگىنىڭ ءباسپاسوز قىزمەتىنىڭ مالىمەتىنشە, كومپانيا ەلدەگى جاعدايدى ەسكەرىپ, «Labo» كولىكتەرىنە كوشەلەردى دەزينفەكتسيالاۋ جانە زالالسىزداندىرۋ جۇيەسى بار قۇرىلعى ورناتۋ تۋرالى شەشىمگە توقتاعان.

كوشە زالالسىزداندىراتىن وتاندىق كولىكتىڭ كولەمى شاعىن عانا, ءتىپتى ساياباقتىڭ ىشىندەگى تار جولعا دا ەركىن كىرىپ جۇرە بەرەدى. سويتە تۇرا, 560 كيلوعا دەيىن جۇك كوتەرە الادى. سانيتار كولىكتىڭ ارقاسىندا 500 ليترلىك قۇتىسى بار. ونىسىن ءبىر تولتىرعاندا 5-10 گەكتار اۋماقتى زالالسىزداندىرا الادى.

كولىكتىڭ ەنى 5 مەتر اۋقىمدى قامتيتىن شاشقىشى اۆتوبۋس ايالدامالارى مەن كوشەدەگى دەمالىس ورىندىق­تارىنا دەيىن دارىلەي الادى. وتاندىق سانيتار كولىك بۇگىندە قاراعاندى, اقمولا وبلىستارى مەن الماتى كوشەلەرىن دەزينفەكتسيالاپ ءجۇر.

قوستاناي وبلىسى