سولتۇستىك قازاقستاننىڭ ايىرتاۋ اۋدانىنداعى كارلوۆكا سەلوسىندا تۇنگى ساعات بىردە باستالعان ءورتتى كورشىسى رينات زاينۋتدينوۆ العاشقى بولىپ كورەدى. بۇل ءۇيدىڭ تۇرعىندارى ءۇش قارت ەكەنىن بىلەتىن ول قۇتقارۋعا كوز جۇمىپ كىرىسىپ كەتەدى.
الدىمەن ءورت ءسوندىرۋ قىزمەتىنە حابارلاسقانىمەن ولار جەتكەنشە ادامداردىڭ شەيىت كەتەتىنىن سەزگەن ول قارىنداسى ليۋبوۆ سترەلكوۆامەن بىرگە كورشىنىڭ ەسىگىن بۇزىپ كىرىپ, الدىمەن قاننەن قاپەرسىز ۇيىقتاپ ەرلى-زايىپتى كلەتسوۆتاردى وياتادى. سوسىن ولاردىڭ كوزى كورمەيتىن شەشەلەرى, وزدىگىنەن جۇرە المايتىن 86 جاستاعى ەميليا گەنريحوۆنانى سىرتقا شىعارادى.
ءسويتىپ, ءورت سوندىرگىشتەر جەتكەنشە ادامداردى كورشىلەرى وتتان قۇتقارعان. ال ءورت سوندىرۋشىلەر وتتىڭ جايىلۋنا جول بەرمەي, تەز ءوشىردى. الايدا ءۇيدىڭ توبەسى كۇيىپ ۇلگەرگەن. ءورت تولىعىمەن تۇنگى ساعات ءۇش جارىم كەزىندە ءوشىرىلدى.
ءدال سول ءتۇنى اۋدان ورتالىعى ساۋمالكول اۋىلىندا دا ءورت شىققان. شوعىن سوندىرمەي ۇيىقتاپ قالعان 68 جاستاعى ءۇي يەسىنىڭ تەمەكىسىنەن تۇسكەن كۇل استىنداعى ماتراتسىن بىقسىتىپ, ءۇيدىڭ ءىشىن قالىڭ ءتۇتىن قىلعان. 68 جاستاعى سەرگەي ۆاسيلەۆيچ الكوگولدىك ماس كۇيىندە بولسا كەرەك. قازىر ول اۋداننىڭ ورتالىق اۋرۋحاناسىنا جەتكىزىلگەن. ونى دا ءۇيدىڭ كوك ءتۇتىن ەكەنىن سىرتتان كورگەن كورشىلەرى رۋسلان بايبوسىنوۆ پەن الەكسەي دوتسەنكو قۇتقارعان. ءسويتىپ, قىراعى كورشىلەر ءبىر تۇندە ءتورت ادامدى اجالدان الىپ قالدى.
سولتۇستىك قازاقستان وبلىسى