ۇستەمەاقى COVID-19 ىندەتىنە قارسى كۇرەسىپ جاتقان مەديتسينا قىزمەتكەرلەرىنىڭ كوروناۆيرۋس جۇقتىرۋ تاۋەكەلىنە قاراي ءار دارىگەرگە ءار قالاي تولەنىپ جاتىر.
دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە, وبلىس بويىنشا بۇگىنگە دەيىن 274 مەديتسينا مامانى جالپى كولەمى 41,7 ملن تەڭگە ۇستەمەاقى العان. ماسەلەن, ەكىنشى ساناتتاعى قالىپتى جاعدايدا جۇمىس ىستەيتىن 186 مەديتسينا قىزمەتكەرى 34 ملن تەڭگە السا, ءۇشىنشى دەڭگەيدەگى قاۋىپسىزدىك جاعدايىندا جۇمىس ىستەيتىن 88 مەديتسينا قىزمەتكەرىنە 7,7 ملن تەڭگە تولەنگەن.
جۇماكۇل سەكسەمباەۆا ون جىلدان بەرى تۇبىركۇلەزگە قارسى وبلىستىق ديسپانسەردە سانيتار بولىپ جۇمىس ىستەيدى.
- وزدەرىڭىز بىلەسىزدەر, سانيتارلاردىڭ جۇمىسى وڭاي ەمەس. قازىرگى ەلدەگى جاعدايعا بايلانىستى 26 ناۋرىزدان باستاپ توبىل قالاسىنداعى پروۆيزورلىق ستاتسيوناردا سانيتارلىق قىزمەت اتقارىپ جاتىرمىن. كارانتينگە الىنعانداردى قابىلداپ, ولاردى زارارسىزداندىرۋ جۇمىستارى مەنىڭ مىندەتىم. 3 ساۋىردەن بەرى ءبىز دە كارانتيندە جاتىرمىز. ءوزىم قوستاناي اۋدانىنىڭ قازاقستان اۋىلىندا تۇرامىن. وتباسىمدى كورمەگەلى ەكى اپتاداي ۋاقىت بولدى. بالا-شاعامدى ساعىندىم. امال جوق, شىدامدىلىق تانىتۋىمىز كەرەك. وسىنداي قيىن ساتتە ءبارىمىز بىرگە بولۋىمىز قاجەت. وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن قاداعالاۋ دەپارتامەنتىندە لابورانت بولىپ قىزمەت ىستەيتىن ۇلىم نۇربولىم دا ەكى اپتاعا استاناعا كومەككە كەتتى. ول قازىر ناعىز ىندەت وشاعىنىڭ ورتاسىندا ءجۇر. كۇنى-ءتۇنى ادام ءومىرى ءۇشىن ارپالىسىپ جۇرگەن بالامنىڭ اماندىعىن اللادان تىلەپ وتىرمىن. بىزگە قارجىلاي كومەكتەسىپ جاتقان مەملەكەتكە العىسىمىز شەكسىز. سىياقى دا, ۇستەماقى دا الدىق, ءوز باسىم كوڭىلىم تولادى. باستىسى, ەلىمىز ىندەتتەن ادا بولىپ, تەزىرەك بۇرىنعى مامىراجاي كۇنىمىزگە ورالساق ەكەن. ەلدىڭ تىنىشتىعى مەن حالىقتىڭ اماندىعىنان باسقا ماڭىزدى ەشتەڭە دە جوق, - دەدى تاجىريبەلى سانيتار.
قوستاناي وبلىسى