ءبىز قانداي قيىن كەزەڭدە دە قينالعانعا قول ءۇشىن سوزا بىلگەن, سۇرىنگەندى دەمەگەن, جىلاعاندى جۇباتقان حالىقتىڭ وكىلىمىز. ەلگە, ەرگە دە ۇلكەن سىن بولىپ COVID-19-دىڭ بەت قاراتپاس دۇلەي داۋىلى سوعىپ تۇرعان ساتتە دە اتا-بابالارامىزدان اۋىسقان وسى قاسيەتىمىز بۇگىنگى قوعام مۇشەلەرىنە دە ءسىڭىستى بولعانىنا كوزىمىز جەتىپ وتىر. وسى ورايدا توتەنشە جاعداي كەزىندە حالىقتىڭ وسال توپتارىن قولداۋ مەملەكەتتىڭ باستى مىندەتى دەپ مالىمدەگەن رەسپۋبليكا پرەزيدەنتى قاسىم-جومارت توقاەۆتىڭ مالىمدەمەسى ەل-جۇرتتى ءبىر سەلكىتىپ تاستادى.
بۇل باعىتتا اقتوبە وبلىسىندا كومەككە مۇقتاج حالىقتىڭ وسال توپتارىن الەۋمەتتىك تۇرعىدان قولداۋ جونىندە كەشەندى ءىس-شارالار جوسپارى جاسالىپ ويداعىداي ىسكە اسىپ كەلەدى. وسى ورايدا ءوڭىر تۇرعىندارىنىڭ ون بەس ساناتى بويىنشا ءجۇز مىڭعا جۋىق ادامعا 1 ميلليارد 500 ميلليون تەڭگەدەن استام الەۋمەتتىك كومەكتەر كورسەتىلىپ جاتقانىن ايتقانىمىز ءجون.
ءسوز جوق, بۇل اتاپ ايتۋعا تۇرارلىق سوما. مەملەكەتتىڭ باستى بايلىعى ادامدار دەسەك, توتەنشە جاعداي تۇسىندا ولاردىڭ مۇقتاج توپتارىنا جەرگىلىكتى اتقارۋشى بيلىك تاراپىنان جان-جاقتى قولداۋ كورسەتىلۋى ەلدىكتىڭ بەلگىسى. وسى ءبىر كۇندەردە اقتوبە ايماعىندا اتاۋلى الەۋمەتتىك كومەك الاتىن وتباسىلاردىڭ ءجاي-كۇيى دە تاعى ءبىر ساراپقا سالىنىپ, ولاردىڭ ەڭ مۇقتاجدارىنا قارجىلاي قولداۋ شارالارى الىنعان.
سونىمەن بىرگە اقتوبە وبلىسىنىڭ اكىمى وڭداسىن ورازالين گازەت تىلشىسىنە وبلىستىق بيۋدجەتتەن ءوڭىر تۇرعىندارىنىڭ سەگىز ساناتى بويىنشا 45 مىڭعا جۋىق ادامعا 900 ميلليون تەڭگەگە جۋىق قاراجات بولىنگەنىن ايتىپ بەردى. ءسويتىپ ءبىر جولعى كومەك ءبىر ادامعا شاققاندا جيىرما مىڭ تەڭگەدەن كەلەدى. قازىرگى كارانتين كەزىندە بارلىق قىزمەت كورسەتۋ مەكەمەلەرى, سونىڭ ىشىندە الەۋمەتتىك تولەمدەر تولەۋ ورتالىقتىڭ ەسىگى جابۋلى تۇرعانى بەلگىلى. مۇنداي جاعدايدا تۇرعىندار وزدەرىنە تاعايىندالعان ءبىر جولعى الەۋمەتتىك كومەكتى الۋ ءۇشىن ابىگەرگە ءتۇسىپ جۇرمەي مە؟
- جوق, ولاي بولمايدى. جەرگىلىكتى جەردەن بەلگىلەنگەن ماتەريالدىق كومەكتى الۋ ءۇشىن قوسىمشا قۇجات تاپسىرۋدىڭ نەمەسە جيناق بانكىلەر كاسسالارىنا اياقتاي ءجۇرىپ بارۋدىڭ قاجەتى جوق. ويتكەنى الەۋمەتتىك كومەك الۋشىلاردىڭ دەرەكتەرى مەن ءتىزىمى اقپاراتتىق جۇيە ارقىلى بۇعان دەيىن جاساقتالىپ قويىلعان. اتالعان قاراجات وسىلايشا ونى الۋعا ءتيىستى ادامداردىڭ ەسەپشوتتارىنا اۋدارىلادى, - دەدى ساۋابى مول ءىستىڭ ءمان-جايىنا قاتىستى اقتوبە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى بۇل-بۇل ەلەۋسىنوۆا.
سونداي-اق وڭىردە مەملەكەت تاراپىنان تاعايىندالعان 42 500 تەڭگە مولشەرىندەگى الەۋمەتتىك تولەم مەن Nur Otan پارتياسى بەلگىلەگەن ەلۋ مىڭ تەڭگە كولەمىندەگى ءبىر جاقتى كومەك تولەمدەرىن اۋدارۋ ماسەلەلەرىنە قاتىستى كەڭ اۋقىمدى تۇسىنىك جۇمىستارى جۇرگىزىلدى. اتالعان ماسەلەدە مولدىرلىك, ادىلدىك پەن اشىقتىق قاعيداتتارى العا شىعىپ ونى الۋعا تىركەلگەن ياكي تىركەلمەي قالعان ازاماتتار اراسىندا ورىنسىز وكپە رەنىش پەن تۇسىنبەستىك تۋىنداماۋ ءۇشىن بارلىق قاجەتتى جاعدايلار جاسالدى.
رەسپۋبليكا پرەزيدەنتى قاسىم-جومارت توقاەۆ ء«بىز بىرگەمىز» اكتسياسىن جاريالاپ بارشا قازاقستاندىق قوعام مۇشەلەرىن وسىناۋ كۇردەلى كەزەڭدە ءبىر-بىرىنە قولداۋ كورسەتىپ, كومەگىن تيگىزۋگە شاقىرعانى بەلگىلى. يگى باستامانى اقتوبە ايماعىنىڭ تۇرعىندارى ءوڭىر كاسىپكەرلەرى مەن مەتسەناتتار, وزگە دە ەل-جۇرتقا جاناشىر تۇلعالار قىزۋ قولداي بىلگەنى دە ءبىر مەرەي. اسىرەسە ولار الەۋمەتتىك وسال توپتاعى تۇرعىندارعا قايىرىمدىلىق كومەك كورسەتۋدى باستى پارىزى دەپ ساناي بىلگەندەرى ريزاشىلىق سەزىمىن تۋعىزادى.
سOVID-19 ىندەتىمەن كۇرەستە ءوڭىر دارىگەرلەرى مەن وزگە دە مەديتسينا قىزمەتكەرلەرى جاۋاپتى دا, قاۋىپ-قاتەرى مول ءىستىڭ بەل ورتاسىندا كەلەدى. ولار كوروناۆيرۋس ينفەكتسياسىن وزدەرى دە جۇقتىرىپ الۋى ابدەن مۇمكىن ەكەندىگىنە قاراماستان ادامدارعا اراشا ءتۇسۋدىڭ جانقيارلىق ۇلگىسىن كورسەتۋدە. مىنە, وسىنداي اق حالاتتى ابزال جاندارعا وڭىردەگى داۋلەتتى ازاماتتار مەن الەۋەتى مول كاسىپورىن جەتەكشىلەرى تاراپىنان زاتتاي جانە قارجىلاي تۇرىندە كومەكتەر كورسەتىلىپ كەلەدى. شاپاعاتى مول ءىستىڭ باسىندا «اكتەپ» جشس پەن كازحروم اق-نىڭ نار تۇلعالى باسشىلارى نۇرلان ساعىنالين مەن ارمان ەسەنجولوۆتار بولعانى دا اتاپ ايتۋعا تۇرارلىق.
بۇعان قوسارىمىز اقتوبە ايماعىندا اتقارۋشى ورگاندار تاراپىنان ەلىمىزدە توتەنشە جاعداي ەنگىزىلگەننەن بەرى تۇرمىسى تومەن كوپبالالى وتباسىلارعا جانە مۇگەدەك جاندار مەن زەينەتكەرلەرگە ازىق-ت ۇلىك پاكەتى مەن گيگيەنالىق قۇرالدار جانە مەديتسينالىق بەت-پەردەلەر مەن اقشالاي كومەكتەر كورسەتىلىپ جۇرگەندىگى. مىنە, وسىلايشا قازىرگى كۇنى دە وڭىردە حالىقتىڭ وسال توپتارىن الەۋمەتتىك تۇرعىدان قولداۋ شارالادى ودان ءارى جالعاسىپ كەلەدى.
اقتوبە